தமிழ்நாட்டில் கூட்டணி ஆட்சி.. அதிகாரத்தில் வி.சி.க.. தொல். திருமாவளவன் மகிழ்ச்சி!

VCK Joins Cabinet : தமிழ்நாட்டில் கூட்டணி ஆட்சி மலர்ந்துள்ளது; ஆட்சி அதிகாரத்தில் விடுதலை சிறுத்தைகள் பங்கெடுத்துள்ளது. முதலமைச்சர் விஜய்க்கு நன்றி எனக் கூறினார் தொல். திருமாவளவன்.

முதலமைச்சர் விஜய்யுடன், வி.சி.க தலைவர் தொல். திருமாவளவன்

ByPushpa Gopinath

Published on: May 22, 2026 at 9:00 pm

சென்னை, மே 22, 2026: விடுதலைச் சிறுத்தைகள் கட்சியின் சட்டமன்ற உறுப்பினர் வன்னி அரசு, இன்று காலை சமூக நீதித் துறை அமைச்சராக பதவியேற்றார். சென்னை தலைமைச் செயலகத்தில், விசிக தலைவர் தொல். திருமாவளவன் எம்.பி., பொதுப்பணித் துறை அமைச்சர் ஆதவ் அர்ஜுனா, எம்.பி. ரவிக்குமார், பொதுச் செயலாளர் சிந்தனைச்செல்வன் ஆகியோர் முன்னிலையில் அவர் பொறுப்பேற்றுக் கொண்டார்.

வன்னி அரசின் கருத்து

“திருமாவளவனுக்கும், திண்டிவனம் மக்களுக்கும் நன்றி. இது, தனிப்பட்ட மகிழ்ச்சி இல்லை; மக்களுக்காக போராடிய எனக்கு அதிகாரத்தில் இருந்து பணியாற்றும் வாய்ப்பு கிடைத்துள்ளது. மிகப் பெரிய பொறுப்பை தலைவர் வழங்கியுள்ளார். எந்த மாற்றமாக இருந்தாலும் அது மக்களுக்கான மாற்றமாக இருக்க வேண்டும்.

சமூக நீதித் துறையில் பல்வேறு மாற்றங்கள் நடைபெறும்; அதை மக்கள் காணப்போகிறார்கள்.” என்றார்.

திருமாவளவனின் கருத்து

“இன்று விசிக ஆட்சியில் பங்கு பெறும் அளவுக்கு உயர்ந்துள்ளது. எங்கள் கனவு நனவாகியுள்ளது. தமிழ்நாட்டில் கூட்டணி ஆட்சி மலர வேண்டும் என்று பத்து ஆண்டுகள் பேசி வந்தோம்; இன்று அது நிறைவேறியுள்ளது.

விளிம்பு நிலையைச் சார்ந்தவர்கள் இரண்டு இடங்களை பெற்றிருந்தாலும் கூட ஆட்சியில் பங்கு பெறும் வாய்ப்பு கிடைத்திருப்பது மகிழ்ச்சி அளிக்கிறது. இதற்கு பொதுமக்கள், கூட்டணி கட்சிகள், மற்றும் தவெக தலைவர் முதல்வர் விஜய்க்கு நன்றி.” என்றார்.

அரசியல் முக்கியத்துவம்

விசிக, தமிழ்நாட்டில் கூட்டணி அரசின் ஒரு பகுதியாக அதிகாரத்தில் பங்கு பெறுகிறது. இந்நிலையில், சமூக நீதி துறையில் புதிய மாற்றங்கள் ஏற்படும் என எதிர்பார்க்கப்படுகிறது. இது, விளிம்பு நிலை சமூகங்களுக்கு அரசியல் அதிகாரத்தில் பங்கு கிடைத்துள்ள வரலாற்று தருணமாகக் கருதப்படுகிறது.

இதையும் படிங்க : என் வீட்டுத் தென்னை..எதிர் வீட்டிற்கு இளநீர் தந்தால்.. விசிக மீது ஆ. ராசா விமர்சனம்