இயற்பியலுக்கான நோபல் பரிசு பெரும் பெல்ஜியம் விஞ்ஞானி!

Nobel Physics: தென் துருவத்தில் செயல்படும் IceCube நியூட்ரினோ ஆய்வகத்துக்கான முக்கிய பங்களிப்புகள் மற்றும் உயர் ஆற்றல் நியூட்ரினோக்களை கண்டறிந்ததற்காக பெல்ஜியத்தில் பிறந்த விஞ்ஞானி பிரான்சிஸ் ஹால்செனுக்கு 2026-ம் ஆண்டுக்கான இயற்பியல் நோபல் பரிசு அறிவிக்கப்பட்டுள்ளது.

பிரான்சிஸ் ஹால்சென்

ByPushpa Gopinath

Published on: October 7, 2026 at 11:39 am

ஸ்டாக்ஹோம், அக்.7, 2026: 2026-ம் ஆண்டுக்கான இயற்பியல் துறைக்கான நோபல் பரிசு பெல்ஜியத்தில் பிறந்த விஞ்ஞானி பிரான்சிஸ் ஹால்செனுக்கு அறிவிக்கப்பட்டுள்ளது. அமெரிக்காவின் விஸ்கான்சின்–மாடிசன் பல்கலைக்கழகத்துடன் இணைந்து செயல்பட்டு வரும் 82 வயதான ஹால்செனுக்கு, IceCube நியூட்ரினோ ஆய்வகத்துக்கான தீர்க்கமான பங்களிப்புகள் மற்றும் வானியல் தோற்றம் கொண்ட உயர் ஆற்றல் நியூட்ரினோக்களை கண்டுபிடித்ததற்காக இந்த விருது வழங்கப்படுகிறது.

தென் துருவத்தில் அமைந்துள்ள IceCube நியூட்ரினோ ஆய்வகத்தை உருவாக்குவதில் பிரான்சிஸ் ஹால்சென் முக்கிய பங்காற்றினார். சுமார் ஒரு கன கிலோமீட்டர் பரப்பளவிலான பனிப்பரப்பில் ஒளி உணரிகள் பொருத்தப்பட்டுள்ள இந்த ஆய்வகம், விண்வெளியில் இருந்து பூமியை வந்தடையும் உயர் ஆற்றல் நியூட்ரினோக்களை கண்டறியும் வகையில் உருவாக்கப்பட்டுள்ளது.

நியூட்ரினோக்கள் மிகக் குறைந்த அளவில் பொருளுடன் தொடர்பு கொள்ளும் துணை அணுத் துகள்களாகும். இதனால் அவை பூமி மற்றும் மனித உடல் உள்ளிட்ட பொருட்களின் வழியாகவும் எளிதாகச் செல்லக்கூடியவை. IceCube ஆய்வகத்தின் மூலம் கண்டறியப்படும் உயர் ஆற்றல் நியூட்ரினோக்கள், தொலைதூர விண்வெளியில் நிகழும் சூப்பர்நோவா வெடிப்புகள், காமா கதிர் வெடிப்புகள் உள்ளிட்ட மிக அதிக ஆற்றல் கொண்ட அண்ட நிகழ்வுகள் குறித்த புதிய தகவல்களை வழங்குகின்றன.

இந்த ஆண்டுக்கான இயற்பியல் நோபல் பரிசின் தொகை 1 கோடியே 20 லட்சம் சுவீடிஷ் குரோனா ஆகும். பிரான்சிஸ் ஹால்செனுக்கு இந்த விருது டிசம்பர் மாதம் நடைபெறும் நோபல் பரிசு வழங்கும் விழாவில் வழங்கப்பட உள்ளது. 2026-ம் ஆண்டுக்கான நோபல் பரிசு அறிவிப்புகளில் மருத்துவத் துறையைத் தொடர்ந்து தற்போது இயற்பியல் துறைக்கான விருது அறிவிக்கப்பட்டுள்ளது.

இதையும் படிங்க: ஒ.பி.சி, எம்.பி.சி, சிறுபான்மை ஸ்காலர்ஷிப் போர்டல் அக்.21 திறப்பு.. முழு விவரம்!