பா.ஜ.க.வுக்கு டாட்டா போட்ட த.மா.கா.. என்ன காரணம்?

Tamil Maanila Congress quits NDA : பா.ஜ.க தலைமையிலான தேசிய ஜனநாயக கூட்டணியில் இருந்து ஜி.கே வாசனின் தமிழ் மாநில காங்கிரஸ் அதிகாரப்பூர்வமாக விலகியுள்ளது.

த.மா.கா செயற்குழு கூட்டம்

ByJayakrishnan R

Published on: June 15, 2026 at 12:16 pm

சென்னை, ஜூன் 15, 2026: சென்னை எழும்பூரில் நடைபெற்ற செயற்குழுக் கூட்டத்திற்குப் பின், தமிழ் மாநில காங்கிரஸ் தலைவர் ஜி.கே.வாசன், தனது கட்சி தேசிய ஜனநாயக கூட்டணியில் இருந்து விலகுவதாக அறிவித்தார். கட்சியை வலுப்படுத்தும் நோக்கத்துடன் நட்பு ரீதியாகவே கூட்டணியில் இருந்து விலகுவதாகவும், கூட்டணிக் கட்சிகளுடனான உறவு சுமுகமாகவே தொடரும் என்றும் அவர் தெரிவித்தார்.

தமிழ் மாநில காங்கிரஸ் இயக்கம் தொடங்கி 12 ஆண்டுகள் ஆன நிலையில், இன்னும் இலக்குகள் நிறைவேறவில்லை என்றும், சமீபத்திய சட்டமன்றத் தேர்தலில் எதிர்பார்த்த வெற்றி கிடைக்கவில்லை என்றும் வாசன் கூறினார். கூட்டணியில் இருப்பது அடிமட்டத் தொண்டர்களின் பொறுப்புகளை குறைக்கும் என்பதால், சுதந்திரமாக செயல்பட வேண்டும் என்ற கருத்தை பெரும்பாலான நிர்வாகிகள் கூட்டத்தில் வெளிப்படுத்தியதாகவும் அவர் குறிப்பிட்டார்.

பாஜக, அதிமுக ஆகிய கட்சிகளுடனும் நட்புறவை பேணி வந்தாலும், தற்போது தேசிய ஜனநாயக கூட்டணியில் அங்கம் வகிக்கவில்லை என்று வாசன் விளக்கினார். எந்தவிதமான கருத்து வேறுபாடுகளோ, சண்டைகளோ இல்லாமல், நல்லிணக்கத்தை பேணும் உதாரணமாக தமிழ் மாநில காங்கிரஸ் திகழ்கிறது என்றும் அவர் வலியுறுத்தினார்.

கடந்தகால தேர்தல் கூட்டணிகளை நினைவுபடுத்திய வாசன், 2024 நாடாளுமன்றத் தேர்தலில் தேசிய ஜனநாயக கூட்டணியுடனும், 2026 சட்டமன்றத் தேர்தலில் அதிமுக தலைமையிலான கூட்டணியுடனும் பயணித்ததாக கூறினார். எதிர்கால கூட்டணி குறித்து தேர்தல் சமயத்தில் மட்டுமே முடிவு எடுக்கப்படும் என்றும் அவர் தெரிவித்தார்.

தமிழ்நாடு அரசியலில் எதிர்பாராத மாற்றங்கள் நிகழ்ந்து வருவதாகவும், அவை ஆளும் கட்சி மற்றும் எதிர்க்கட்சிகளுக்கு அதிர்ச்சியளிக்கும் வகையில் உள்ளதாகவும் வாசன் குறிப்பிட்டார். எதிர்காலத்தில் தேர்தல் வெற்றிகளைப் பெறக்கூடிய வலுவான அமைப்பை உருவாக்குவதே தமிழ் மாநில காங்கிரஸின் முன்னுரிமை எனவும் அவர் தெரிவித்தார்.

இதையும் படிங்க : நிச்சயம் திரும்பி வருவார்கள்.. யாரைச் சொல்கிறார் வானதி சீனிவாசன்?