ரூ.1 லட்சம் சம்பளம், சுற்றுலா விசா.. ஓமனில் 8 மாதங்கள் தவித்த தமிழக மீனவர்கள்!

Fishermen Return from Oman: ஓமனில் சுமார் 8 மாதங்கள் சிக்கித் தவித்த கன்னியாகுமரி மற்றும் ராமநாதபுரம் மாவட்டங்களைச் சேர்ந்த 5 தமிழக மீனவர்கள் சொந்த ஊர் திரும்பினர்.

சொந்த ஊர் திரும்பிய மீனவர்கள்

ByPushpa Gopinath

Published on: October 4, 2026 at 12:29 pm

Updated on: October 4, 2026 at 12:32 pm

சென்னை, அக்.4, 2026: ஓமனில் சுமார் 8 மாதங்கள் சிக்கித் தவித்த கன்னியாகுமரி மற்றும் ராமநாதபுரம் மாவட்டங்களைச் சேர்ந்த 5 தமிழக மீனவர்கள் புதன்கிழமை சொந்த ஊர் திரும்பினர். கன்னியாகுமரி மாவட்டம் கீழமுட்டம் பகுதியைச் சேர்ந்த சோர்ண ஜோஷுவா, அலெக்ஸ் ரவி, கோவளம் பகுதியைச் சேர்ந்த ராபின் ஜார்ஜ், தாமஸ் அருள் மற்றும் ராமநாதபுரம் மாவட்டத்தைச் சேர்ந்த மரியப்பன் ஜெட்லி ஆகியோர், மாதம் ரூ.1 லட்சம் சம்பளம் கிடைக்கும் எனக் கூறிய முகவரின் வாக்குறுதியை நம்பி கடந்த ஜனவரி 21-ம் தேதி சுற்றுலா விசாவில் ஓமன் சென்றதாக தெரிவித்தனர். அங்கு தனியார் மீன்பிடி படகில் பணியில் சேர்ந்த அவர்களிடம், சுற்றுலா விசாவை ஒரு மாதத்திற்குள் வேலை விசாவாக மாற்றித் தருவதாக முகவர் கூறியதாகவும், ஆனால் அது நிறைவேற்றப்படவில்லை என்றும் மீனவர்கள் குற்றம்சாட்டினர்.

வேலை விசா கிடைக்காததால், ஓமன் துறைமுகத்திலேயே பல மாதங்கள் தங்க வேண்டிய நிலை ஏற்பட்டதாக மீனவர்கள் தெரிவித்தனர். செல்லுபடியாகும் ஆவணங்கள் இல்லாததால் கைது செய்யப்படுவோமோ என்ற அச்சத்தில் துறைமுகத்தை விட்டு வெளியேற முடியாமல் இருந்ததாகவும், உணவு மற்றும் தூக்கத்திற்குக்கூட சிரமப்பட்டதாகவும் அவர்கள் கூறினர். மேலும், தங்களது பாஸ்போர்ட்டுகளை முகவர் பெற்று படகு உரிமையாளரிடம் ஒப்படைத்ததாகவும், தினமும் சுமார் 15 மணி நேரம் வரை வேலை செய்ததாகவும் மீனவர்கள் தெரிவித்துள்ளனர். பின்னர் மற்ற தமிழக மீனவர்களின் உதவியுடன் உணவு உள்ளிட்ட அடிப்படை தேவைகளைப் பெற்றதுடன், வேறு படகுகளில் பணியாற்றியதாகவும் கூறினர்.

இந்த விவகாரம் தொடர்பாக சர்வதேச மீனவர் மேம்பாட்டு அறக்கட்டளை (INFIDET) தலைவர் பி.ஜஸ்டின் ஆண்டனி, ஆகஸ்ட் 16-ம் தேதி இந்திய தூதரகம், பிரதமர் நரேந்திர மோடி மற்றும் மத்திய வெளியுறவு அமைச்சகத்திடம் உதவி கோரி தகவல் அளித்ததாக தெரிவித்துள்ளார். இதையடுத்து ஓமனில் உள்ள இந்திய தூதரகம் தலையிட்டு, இரண்டு மாதங்களுக்கு மீனவர்களுக்கு தங்குமிட வசதி ஏற்பாடு செய்ததுடன், அவர்கள் தமிழகம் திரும்புவதற்கான நடவடிக்கைகளையும் மேற்கொண்டது. சட்டவிரோதமாக தங்கியதாக ஓமன் அதிகாரிகள் ஒவ்வொருவருக்கும் சுமார் ரூ.1.20 லட்சம் அபராதம் விதித்திருந்த நிலையில், இந்திய தூதரகத்தின் பேச்சுவார்த்தைக்குப் பிறகு அந்த அபராதம் தள்ளுபடி செய்யப்பட்டதாக தெரிவிக்கப்பட்டுள்ளது. நாடு திரும்பிய 5 பேரும், தங்களுக்கு வேலை வழங்குவதாகக் கூறி ஏமாற்றியதாக குற்றம்சாட்டிய முகவர் மீது நடவடிக்கை எடுக்கக் கோரி கன்னியாகுமரி மாவட்ட ஆட்சியரிடம் மனு அளித்துள்ளனர்.

இதையும் படிங்க : ராமேஸ்வரத்தில் விமான நிலையம்.. மத்திய அரசின் அனுமதியை கோரும் தமிழக அரசு!