ராமேஸ்வரத்தில் விமான நிலையம்.. மத்திய அரசின் அனுமதியை கோரும் தமிழக அரசு!

Rameswaram Airport Project: ராமேஸ்வரத்தில் புதிய விமான நிலையம் அமைக்கும் திட்டத்தை முன்னெடுத்துள்ள தமிழக அரசு, ராமநாதபுரம் மாவட்டம் மாணிக்கனேரியில் விமான நிலையம் அமைப்பதற்கான இட அனுமதியை மத்திய அரசிடம் கோரத் தயாராகி வருகிறது.

ராமேஸ்வரத்தில் புதிய விமான நிலையம்

ByPushpa Gopinath

Published on: October 4, 2026 at 11:38 am

சென்னை, அக்.4, 2026: ராமேஸ்வரத்தில் புதிய விமான நிலையம் அமைக்கும் திட்டத்தை முன்னெடுத்துள்ள தமிழக அரசு, ராமநாதபுரம் மாவட்டம் மாணிக்கனேரியில் விமான நிலையம் அமைப்பதற்கான இட அனுமதியை மத்திய அரசிடம் கோரத் தயாராகி வருகிறது.

சுமார் 600 ஏக்கர் பரப்பளவில் விமான நிலையம் அமைக்கத் திட்டமிடப்பட்டுள்ள நிலையில், இந்திய விமான நிலைய ஆணைய அதிகாரிகள் நடத்திய ஆய்வுகளுக்குப் பிறகு மாணிக்கனேரி இடம் தேர்வு செய்யப்பட்டுள்ளது. ராமேஸ்வரம் ராமநாதசுவாமி கோயில், தனுஷ்கோடி, அரிச்சல்முனை மற்றும் முன்னாள் குடியரசுத் தலைவர் ஏ.பி.ஜே. அப்துல் கலாமின் நினைவிடம் உள்ளிட்ட முக்கிய சுற்றுலா மற்றும் ஆன்மிகத் தலங்களை கொண்டுள்ளதால், விமான நிலையம் அமைந்தால் அப்பகுதிக்கான போக்குவரத்து இணைப்பு மேம்படும் என எதிர்பார்க்கப்படுகிறது.

இந்தத் திட்டத்திற்கான அடுத்தகட்ட நடவடிக்கையாக, தமிழ்நாடு தொழில் வளர்ச்சி நிறுவனம் (TIDCO), மத்திய விமானப் போக்குவரத்து அமைச்சகத்திடம் ‘Site Clearance’ எனப்படும் இட அனுமதியைப் பெற விண்ணப்பிக்க உள்ளது. முன்னதாக ராமநாதபுரம் மாவட்டத்தில் பாலன்குளம், தேவிப்பட்டினம், கும்பரம், களரி மற்றும் மாணிக்கனேரி ஆகிய 5 இடங்கள் பரிசீலிக்கப்பட்டு, கும்பரம் மற்றும் மாணிக்கனேரி ஆகியவை தேர்வு செய்யப்பட்டன. பின்னர் இரு இடங்களிலும் AAI குழுவினர் ஆய்வு மேற்கொண்ட நிலையில், மாணிக்கனேரி விமான நிலையத்துக்கு ஏற்ற இடமாக தேர்வு செய்யப்பட்டது. தற்போது நிலம் கையகப்படுத்தும் பணிகளும் முன்னெடுக்கப்பட்டு வருகின்றன.

ராமேஸ்வரத்துக்கு தற்போது பெரும்பாலும் சாலை மற்றும் ரயில் போக்குவரத்து மூலமே பொதுமக்களும் சுற்றுலாப் பயணிகளும் சென்று வருகின்றனர். புதிய விமான நிலையத் திட்டம் செயல்படுத்தப்பட்டால் ராமேஸ்வரம் மற்றும் சுற்றுவட்டாரப் பகுதிகளுக்கான விமானப் போக்குவரத்து வசதி மேம்பட்டு, சுற்றுலா மற்றும் பிராந்திய பொருளாதார நடவடிக்கைகளுக்கு உதவும் என தமிழக அரசு கருதுகிறது. எனினும், தற்போது கிடைத்துள்ள தகவலின்படி விமான நிலையத்திற்கான கட்டுமானத் தொடக்க தேதி, திட்டச் செலவு அல்லது விமான சேவை தொடங்கும் தேதி ஆகியவை இறுதி செய்யப்படவில்லை; மத்திய அரசின் இட அனுமதி பெறுவது அடுத்த முக்கிய கட்டமாக உள்ளது.

இதையும் படிங்க : ஏரியில் மண் எடுக்கப்பட்டதாக புகார்.. வழக்கை ரத்து செய்யக்கோரி எ.வ வேலு மகன் மனு!