ஆசிய விளையாட்டில் ஹாக்கியில் தங்கம்.. ஒலிம்பிக் வாய்ப்பை உறுதி செய்த இந்தியா!

Asian Games 2026: ஜப்பானில் நடைபெற்று வரும் 20-வது ஆசிய விளையாட்டுப் போட்டிகளில் ஆடவர் ஹாக்கியில் இந்திய அணி தங்கப் பதக்கம் வென்றுள்ளது.

ஆடவர் ஹாக்கியில் தங்கப் பதக்கம் வென்ற இந்தியா

ByPunitha Rajesh

Published on: October 4, 2026 at 1:06 pm

புதுடெல்லி, அக்.4, 2026: ஜப்பானில் நடைபெற்று வரும் 20-வது ஆசிய விளையாட்டுப் போட்டிகளில் ஆடவர் ஹாக்கியில் இந்திய அணி தங்கப் பதக்கம் வென்றுள்ளது. ககாமிகஹாராவில் சனிக்கிழமை நடைபெற்ற இறுதிப்போட்டியில் மலேசியாவை 5-1 என்ற கோல் கணக்கில் வீழ்த்தி இந்தியா சாம்பியன் பட்டத்தை தக்கவைத்தது.

இதன் மூலம் ஆசிய விளையாட்டுப் போட்டிகளில் தொடர்ச்சியாக இரண்டாவது முறையாக ஆடவர் ஹாக்கியில் இந்தியா தங்கம் வென்றுள்ளது. மேலும், இந்த வெற்றியின் மூலம் 2028-ம் ஆண்டு லாஸ் ஏஞ்சல்ஸ் ஒலிம்பிக் போட்டிக்கான நேரடி தகுதியையும் இந்திய அணி பெற்றுள்ளது.

இறுதிப்போட்டியில் இந்திய அணியின் கேப்டன் ஹர்மன்பிரீத் சிங் 11-வது மற்றும் 57-வது நிமிடங்களில் தலா ஒரு கோல் அடித்தார். ஜுக்ராஜ் சிங் 23-வது நிமிடத்திலும், ஹார்திக் சிங் 42-வது நிமிடத்திலும், ஷிலானந்த் லக்ரா 54-வது நிமிடத்திலும் கோல் அடித்தனர். மலேசிய அணிக்காக ஷெல்லோ சில்வெரியஸ் 14-வது நிமிடத்தில் ஒரு கோல் அடித்தார். இந்தியா மொத்தம் 14 பெனால்டி கார்னர் வாய்ப்புகளைப் பெற்ற நிலையில், மலேசியா 2 வாய்ப்புகளை மட்டுமே பெற்றது.

இந்த வெற்றியின் மூலம் ஆசிய விளையாட்டுப் போட்டிகளில் தொடர்ச்சியாக ஆடவர் ஹாக்கி தங்கம் வென்ற பாகிஸ்தானுக்கு அடுத்த இரண்டாவது அணியாக இந்தியா சாதனை படைத்துள்ளது.

இந்தியாவுக்கு இது ஆசிய விளையாட்டுப் போட்டிகளில் ஆடவர் ஹாக்கியில் 5-வது தங்கப் பதக்கமாகும். கேப்டன் ஹர்மன்பிரீத் சிங், இரண்டு முறை ஆசிய விளையாட்டுத் தங்கம் வென்ற முதல் இந்திய ஆடவர் ஹாக்கி கேப்டன் என்ற சாதனையையும் படைத்துள்ளார். மேலும், பெண்கள் அணியும் தங்கம் வென்று 2028 ஒலிம்பிக் தகுதியை பெற்ற நிலையில், ஒரே ஆசிய விளையாட்டுப் போட்டியில் இந்திய ஆடவர் மற்றும் மகளிர் ஹாக்கி அணிகள் இரண்டும் தங்கம் வென்றிருப்பது குறிப்பிடத்தக்கது.

இதையும் படிங்க : வாஷிங்டன் சுந்தருக்கு ரூ.75 லட்சம் பரிசு.. முதல்வர் விஜய் அறிவிப்பு!