சில்வர் ETF முதலீடு, 56 சதவீத இழப்பு.. என்ன காரணம்?

Silver ETF Investment: கடந்த ஓராண்டில் வெள்ளியின் விலை 98 சதவீதம் உயர்ந்துள்ள நிலையில், சில்வர் ETF-களில் முதலீடு செய்த சராசரி முதலீட்டாளருக்கு கிடைத்த வருமானம் 18 சதவீதமாக மட்டுமே காணப்படுகிறது.

சில்வர் இ.டி.எஃப் முதலீடு

BySaranya JK

Published on: October 4, 2026 at 5:02 pm

சென்னை, அக்.4, 2026: கடந்த ஓராண்டில் வெள்ளியின் விலை 98 சதவீதம் உயர்ந்துள்ள நிலையில், சில்வர் ETF-களில் முதலீடு செய்த சராசரி முதலீட்டாளருக்கு கிடைத்த வருமானம் 18 சதவீதமாக மட்டுமே இருந்ததாக DSP மியூச்சுவல் ஃபண்டின் செப்டம்பர் 2026 அறிக்கை தெரிவித்துள்ளது. மேலும், கடந்த 12 மாதங்களில் சில்வர் ETF-களில் முதலீடு செய்யப்பட்ட பணத்தில் 56 சதவீதம், 2026 ஜூலை 31 நிலவரப்படி இழப்பில் இருந்ததாக கூறப்பட்டுள்ளது.

இதற்கு முக்கிய காரணமாக முதலீட்டாளர்கள் வெள்ளியின் விலை ஏற்கனவே வேகமாக உயர்ந்த பின்னர் அதிகளவில் முதலீடு செய்தது குறிப்பிடப்பட்டுள்ளது. குறிப்பாக, 2026 ஜனவரியில் மட்டும் சில்வர் ETF-களில் ரூ.11,761 கோடி முதலீடு செய்யப்பட்டது. இது அந்த காலகட்டத்தின் மிகப்பெரிய மாதாந்திர முதலீடாக இருந்ததுடன், வெள்ளி விலை உயர்ந்திருந்த காலத்திலும் அதிக பணம் சந்தைக்குள் வந்ததை அறிக்கை சுட்டிக்காட்டுகிறது.

வெள்ளியின் ஒட்டுமொத்த வருமானமும், முதலீட்டாளர் உண்மையில் பெறும் வருமானமும் வெவ்வேறாக இருக்கலாம் என்பதை இந்த தரவுகள் காட்டுகின்றன. முதலீடு செய்த நேரம் மற்றும் விலை ஆகியவை வருமானத்தில் முக்கிய தாக்கத்தை ஏற்படுத்துகின்றன. எனவே, கடந்த காலத்தில் கிடைத்த அதிக வருமானத்தை மட்டும் அடிப்படையாகக் கொண்டு எதிர்கால வருமானத்தையும் அதே அளவில் எதிர்பார்க்கக்கூடாது என அறிக்கை வலியுறுத்துகிறது.

இதையும் படிங்க : செல்வ மகள் சேமிப்பு திட்டம், பி.பி.எஃப்.. புதிய வட்டி விகிதம் என்ன?