CJP Alleges SIR : தமிழ்நாட்டில் 44 தொகுதிகளில் எஸ்.ஐ.ஆர் கைவரிசை காட்டியுள்ளதாக சி.ஜே.பி குற்றஞ்சாட்டியுள்ளது.
CJP Alleges SIR : தமிழ்நாட்டில் 44 தொகுதிகளில் எஸ்.ஐ.ஆர் கைவரிசை காட்டியுள்ளதாக சி.ஜே.பி குற்றஞ்சாட்டியுள்ளது.
Published on: October 2, 2026 at 9:57 pm
Updated on: October 2, 2026 at 9:58 pm
சென்னை, அக்.2, 2026: தமிழ்நாட்டில் வாக்காளர் பட்டியல் சிறப்பு தீவிர திருத்தப் பணியான SIR மூலம் சுமார் 70 லட்சம் வாக்காளர்களின் பெயர்கள் நீக்கப்பட்டதாகவும், பட்டியல் நீக்கங்கள் பட்டியலினத்தவர் மற்றும் பழங்குடியின மக்கள் அதிகம் வசிக்கும் 44 சட்டமன்றத் தொகுதிகளில் குறிப்பாக மேற்கொள்ளப்பட்டதாகவும் காக்ரோச் ஜனதா கட்சி (CJP) தமிழக ஒருங்கிணைப்பாளர் செல்வ கார்த்திக் குற்றம்சாட்டியுள்ளார். சென்னை ராஜரத்தினம் மைதானத்தில் வெள்ளிக்கிழமை நடைபெற்ற போராட்டத்தில் அவர் இந்தக் குற்றச்சாட்டுகளை முன்வைத்தார்.
குறிப்பாக, தாராபுரம் சட்டமன்றத் தொகுதியில் சுமார் 50 ஆயிரம் வாக்காளர்களின் பெயர்கள் வாக்காளர் பட்டியலில் இருந்து நீக்கப்பட்டுள்ளதாக செல்வ கார்த்திக் தெரிவித்தார். தாராபுரம் தொகுதிக்கு அக்டோபர் 6ஆம் தேதி இடைத்தேர்தல் நடைபெற உள்ள நிலையில், இந்தக் குற்றச்சாட்டு முன்வைக்கப்பட்டுள்ளது. தாராபுரம் மற்றும் மதுராந்தகம் ஆகிய இரு தொகுதிகளிலும் இடைத்தேர்தல் நடைபெறுகிறது.
SIR நடவடிக்கையில் முறைகேடுகள் நடைபெற்றுள்ளதாகவும், இதன் காரணமாக தகுதியான வாக்காளர்களின் வாக்குரிமை பாதிக்கப்பட்டுள்ளதாகவும் CJP தரப்பில் குற்றம்சாட்டப்பட்டுள்ளது. மேலும், தேர்தல் நடைமுறையில் அதிக வெளிப்படைத்தன்மை வேண்டும் என்றும், தகுதியான எந்தவொரு வாக்காளரும் வாக்களிக்கும் உரிமையை இழக்காத வகையில் தேர்தல் ஆணையம் நடவடிக்கை எடுக்க வேண்டும் என்றும் அக்கட்சி வலியுறுத்தியுள்ளது.
இந்தக் குற்றச்சாட்டுகளின் அடிப்படையில், தலைமைத் தேர்தல் ஆணையர் ஞானேஷ் குமாரை பதவி விலகுமாறு CJP வலியுறுத்தியுள்ளது. மேலும், தேர்தல் நடைமுறையில் ஏற்பட்டுள்ளதாகக் கூறப்படும் முறைகேடுகளுக்கு எதிராக எதிர்க்கட்சிகள் ஒன்றிணைந்து போராட வேண்டும் என்றும், தேர்தல் ஆணையத்தின் நடவடிக்கைகளுக்கு எதிராக போராட்டங்களை தீவிரப்படுத்த வேண்டும் என்றும் செல்வ கார்த்திக் அழைப்பு விடுத்துள்ளார்.
இதற்கிடையில், தேர்தல் ஆணையம் SIR நடவடிக்கையில் பெயர்கள் நீக்கப்படுவது மரணம், நிரந்தரமாக வேறு இடத்துக்கு குடிபெயர்தல், ஒரே வாக்காளர் பெயர் ஒன்றுக்கும் மேற்பட்ட இடங்களில் இடம்பெறுதல் அல்லது பலமுறை தேடியும் வாக்காளரை கண்டுபிடிக்க முடியாத நிலை போன்ற காரணங்களுக்குப் பிறகே நடைபெறும் என தெரிவித்துள்ளது. பெயர் நீக்கப்படுவதற்கு முன் உரிய நடைமுறைகள் மற்றும் சரிபார்ப்புகள் மேற்கொள்ளப்படுவதாகவும், வரைவு வாக்காளர் பட்டியல் வெளியிடப்பட்ட பிறகு உரிமைகோரல்கள் மற்றும் ஆட்சேபனைகளைத் தெரிவிக்க வாய்ப்பு வழங்கப்படுவதாகவும் மத்திய அரசு தெரிவித்துள்ளது.
இதையும் படிங்க : பெண்கள், திருநங்கைகள் இலவச பயணம்.. வெற்றிப் பயணத் திட்டம் தொடக்கம்!
திராவிடன் டைம்ஸின் செய்திகளை உடனுக்குடன் தெரிந்துக்கொள்ள
திராவிடன் டைம்ஸ்.காம் (www.dravidantimes.com) ஆன்லைன் செய்தித்தளம் ஆகஸ்ட் 18 2024ல் தொடங்கப்பட்டது. தமிழ்நாடு, இந்தியா, சர்வதேசம், வணிகம், லைஃப்ஸ்டைல், சினிமா, ஆன்மிகம், தொழில்நுட்பம், கல்வி மற்றும் வேலைவாய்ப்பு என பலதரப்பட்ட செய்திகளை பக்கச்சார்பின்றி வெளியிடுகிறது.
© 2024 dravidantimes.com – developed and designed by Thirdvizion.com
