திருமண ஆசைகாட்டி ரூ.15.37 லட்சம் மோசடி? பெண் காவலர் உட்பட 3 பேர் கைது!

Marriage Fraud Case: திருவாரூர் அருகே திருமணம் செய்து கொள்வதாகக் கூறி ரூ.15.37 லட்சம் மோசடி செய்ததாக அளிக்கப்பட்ட புகாரில், CRPF பெண் காவலர் செமிலா, அவரது தாய் மற்றும் சகோதரர் கைது செய்யப்பட்டனர். இதில் செமிலாவுக்கு நீதிமன்றம் ஜாமீன் வழங்கியது.

செமிலா, அவரது தாய் சசிகலா மற்றும் சகோதரர் கோகுல்ராஜ்

ByPushpa Gopinath

Published on: October 2, 2026 at 6:58 pm

திருவாரூர் அக்.2, 2026: திருவாரூர் அருகே திருமணம் செய்து கொள்வதாகக் கூறி ரூ.15.37 லட்சம் மோசடி செய்ததாக அளிக்கப்பட்ட புகாரின் பேரில், மத்திய ரிசர்வ் காவல் படையைச் (CRPF) சேர்ந்த பெண் காவலர் உள்ளிட்ட மூன்று பேரை போலீசார் கைது செய்தனர். இந்தச் சம்பவம் அப்பகுதியில் பரபரப்பை ஏற்படுத்தியுள்ளது.

திருவாரூர் மாவட்டம், தென்னவராயநல்லூரைச் சேர்ந்த ராஜமாணிக்கம் (36), வெளிநாட்டில் பணியாற்றி வந்தபோது, தனது தூரத்து உறவினரான செமிலா (29) மற்றும் அவரது குடும்பத்தினருக்கு பல்வேறு தவணைகளில் பணம் வழங்கியதாகக் கூறப்படுகிறது. செமிலா தன்னைத் திருமணம் செய்து கொள்வார் என்ற நம்பிக்கையில் மொத்தம் ரூ.15.37 லட்சம் வழங்கியதாகத் தெரிகிறது.

இதற்கிடையே, செமிலா மற்றொரு மத்திய ரிசர்வ் காவல் படை காவலரைத் திருமணம் செய்து கொண்டதாகக் கூறப்படுகிறது. இதனால் அதிர்ச்சியடைந்த ராஜமாணிக்கம், தன்னிடம் திருமணம் செய்து கொள்வதாகக் கூறி பணம் பெற்றதாகத் திருவாரூர் தாலுகா காவல் நிலையத்தில் புகார் அளித்தார்.

இந்தப் புகாரின் அடிப்படையில் விசாரணை நடத்திய போலீசார், செமிலா, அவரது தாய் சசிகலா மற்றும் சகோதரர் கோகுல்ராஜ் ஆகிய மூவரையும் கைது செய்தனர். பின்னர், நீதிமன்றத்தில் ஆஜர்படுத்தப்பட்ட சசிகலா மற்றும் கோகுல்ராஜ் சிறையில் அடைக்கப்பட்டனர். செமிலாவுக்கு நீதிமன்றம் ஜாமீன் வழங்கியது.

இதையும் படிங்க : நமக்கே இது பத்தாது; எதற்காக இவர்கள்? மதுக்குடிக்கும் போது தகராறு.. நண்பர் கொலை!