ஹோர்முஸ் நீரிணை விவகாரம்.. ஈரான் மீது அமெரிக்கா புதிய தாக்குதல்!

US Strikes Iran Again : ஹோர்முஸ் நீரிணை விவகாரத்தில், ஈரான் மீது அமெரிக்கா புதிய தாக்குதலை தொடுத்துள்ளது.

அமெரிக்கா தாக்குதல்

ByPushpa Gopinath

Published on: July 8, 2026 at 12:32 pm

நியூயார்க், ஜூலை 8, 2026: ஹார்முஸ் நீரிணையில் மூன்று வணிகக் கப்பல்கள் தாக்கப்பட்ட சில மணிநேரங்களிலேயே, அமெரிக்க ராணுவம் ஈரானுக்கு எதிராக புதிய தாக்குதல்களைத் தொடங்கியுள்ளது. சர்வதேச நீர்வழியில் அப்பாவிப் பொதுமக்களால் இயக்கப்படும் வணிகக் கப்பல்களை குறிவைத்து தாக்கியதற்காக கடுமையான விளைவுகளை ஏற்படுத்தும் நோக்கில் இந்த நடவடிக்கை மேற்கொள்ளப்பட்டதாக அமெரிக்க மத்திய கட்டளை மையம் (US Central Command) சமூக ஊடகங்களில் வெளியிட்ட அறிக்கையில் தெரிவித்துள்ளது.

அமெரிக்க ராணுவம் ஈரானின் வான் பாதுகாப்பு அமைப்புகள், கடலோரக் கண்காணிப்பு அமைப்புகள், தரை-வான் ஏவுகணைகள், கப்பல் எதிர்ப்பு ஏவுகணைகள் மற்றும் ட்ரோன்களை ஏவும் தளங்களை குறிவைத்து தாக்குதல் நடத்தியதாக அதிகாரிகள் தெரிவித்துள்ளனர். மேலும், ஈரானின் துறைமுக வசதிகளும் தாக்குதலுக்குள்ளாகியுள்ளன. கெஷ்ம் மற்றும் பண்டார் அப்பாஸ் பகுதிகளில் வெடிசத்தங்கள் கேட்டதாக ஈரானிய அரசு ஊடகங்கள் செய்தி வெளியிட்டுள்ளன.

இந்த தாக்குதல்கள் இடைக்கால ஒப்பந்தத்தை மீறும் செயல் என்று ஈரானின் வெளியுறவுத்துறை துணை அமைச்சர் காசெம் கரிபாபாடி கடுமையாக விமர்சித்துள்ளார். அமெரிக்காவின் நடவடிக்கை, இரு நாடுகளுக்கிடையிலான சமரச முயற்சிகளை பாதிக்கும் வகையில் உள்ளது என்றும், இது பிராந்தியத்தில் பதற்றத்தை அதிகரிக்கும் என்றும் அவர் கூறியுள்ளார்.

மேலும், இடைக்கால ஒப்பந்தத்தின் ஒரு பகுதியாக ஈரானிய எண்ணெய் விற்பனைக்கு வழங்கப்பட்ட உரிமத்தை அமெரிக்கா ரத்து செய்துள்ளது. ஹார்முஸ் நீரிணையில் ஈரானின் நடவடிக்கைகள் ஏற்றுக்கொள்ள முடியாதவை என்பதால் இந்த உரிமம் ரத்து செய்யப்பட்டதாக அமெரிக்க அதிகாரிகள் தெரிவித்துள்ளனர். இதனை ஈரானிய வெளியுறவு அமைச்சகம் கண்டித்து, ஒப்பந்தத்தை மீறும் இந்த செயல் காரணமாக ஏற்படும் விளைவுகளுக்கு அமெரிக்க அரசாங்கமே பொறுப்பேற்க வேண்டும் என்று வலியுறுத்தியுள்ளது.

இதையும் படிங்க : இப்படியெல்லாம் செய்தால் பேச்சுவார்த்தை கிடையாது.. ஈரான் திட்டவட்டம்