சென்னை டூ பெங்களூரு.. பி.ஆர் சுந்தர் பாலியல் புகாரில் கைது!

P.R. Sundar Arrest: சென்னை தொழிலதிபர் பி.ஆர் சுந்தர் பாலியல் புகாரில் பெங்களூருவில் கைது செய்யப்பட்டுள்ளார்.

பி.ஆர் சுந்தர்

ByJayakrishnan R

Published on: August 6, 2026 at 4:07 pm

சென்னை, ஆக.6, 2026: சென்னை ஐஸ் ஹவுஸ் காவல் நிலையத்தின் சிறப்புப் படையினர், பாலியல் துன்புறுத்தல் புகாரின் பேரில் தொழிலதிபர் பி.ஆர். சுந்தரை பெங்களூருவில் கைது செய்துள்ளனர். தனியார் தொலைக்காட்சி ஒன்றில் பணிபுரியும் பெண் செய்தி வாசிப்பாளர் அளித்த புகாரின் அடிப்படையில் இந்த நடவடிக்கை எடுக்கப்பட்டது. கைது செய்யப்பட்ட சுந்தர், விசாரணை மற்றும் அடுத்தகட்ட சட்ட நடவடிக்கைகளுக்காக சென்னைக்கு அழைத்து வரப்பட்டார்.

அப்பெண்மணி, சுந்தர் தன்னை பாலியல் ரீதியாக துன்புறுத்தியதாகவும், தனது அலுவலகத்தில் சுமார் மூன்று மணி நேரம் சட்டவிரோதமாக சிறைவைத்து, கடுமையான விளைவுகளை சந்திக்க நேரிடும் என்று மிரட்டியதாகவும் குற்றம் சாட்டியுள்ளார்.

இந்த புகாரின் அடிப்படையில், காவல்துறையினர் பாலியல் துன்புறுத்தல், சட்டவிரோத சிறைவைப்பு மற்றும் குற்றவியல் மிரட்டல் உள்ளிட்ட பாரதிய நியாய சன்ஹிதாவின் (BNS) ஐந்து பிரிவுகளின் கீழ் வழக்கு பதிவு செய்துள்ளனர்.

சுந்தர் மீது பதிவு செய்யப்பட்ட வழக்கு, சமூகத்தில் பெரும் அதிர்ச்சியை ஏற்படுத்தியுள்ளது. குறிப்பாக, ஊடகத் துறையில் பணிபுரியும் பெண்கள் பாதுகாப்பு குறித்து மீண்டும் கேள்விகள் எழுந்துள்ளன.

இந்த வழக்கு தொடர்பான விசாரணை தற்போது நடைபெற்று வருகிறது. சட்டத்தின் கீழ் தேவையான நடவடிக்கைகள் எடுக்கப்படும் என காவல்துறை அதிகாரிகள் தெரிவித்துள்ளனர்.

இதையும் படிங்க : ‘குடி’மகன்களுக்கு நற்செய்தி.. டாஸ்மாக்கில் இனி பில்? சென்னை ஐகோர்ட் அதிரடி உத்தரவு!