தமிழக மீனவர்கள் 11 பேர் விடுதலை.. அபராதம் விதித்த இலங்கை நீதிமன்றம்!

Sri Lanka Releases TN Fishermen : இலங்கையில் வாடிய தமிழக மீனவர்கள் 11 பேர் விடுதலை செய்யப்பட்டனர். இவர்களுக்கு அந்நாட்டு பண மதிப்பில் ரூ.50 ஆயிரம் அபராதம் விதிக்கப்பட்டுள்ளது.

தமிழக மீனவர்கள் விடுதலை

BySaranya JK

Published on: September 19, 2026 at 12:55 pm

திருச்சி, செப்.19, 2026: ராமேஸ்வரத்தைச் சேர்ந்த 11 மீனவர்கள் இலங்கையில் கைது செய்யப்பட்ட நிலையில், அவர்களை அந்நாட்டு நீதிமன்றம் அபராதம் விதித்து விடுதலை செய்துள்ளது. சூறைக்காற்று காரணமாக படகு திசைமாறி இலங்கை கடற்பகுதிக்குள் சென்ற நிலையில், கரை ஒதுங்கிய மீனவர்கள் மீது இலங்கை அதிகாரிகள் நடவடிக்கை எடுத்திருந்தனர். தற்போது நீதிமன்ற விசாரணைக்குப் பின்னர் அவர்கள் விடுதலை செய்யப்பட்டுள்ளனர்.

கடந்த ஆகஸ்ட் 6-ம் தேதி கடலில் ஏற்பட்ட சூறைக்காற்று காரணமாக ராமேஸ்வரத்தைச் சேர்ந்த 11 மீனவர்கள் சென்ற படகு திசைமாறியுள்ளது. இதையடுத்து, அவர்கள் இலங்கையின் நெடுந்தீவு அருகே உள்ள குயிந்தா கடற்கரை பகுதியில் கரை ஒதுங்கியதாக கூறப்படுகிறது. இலங்கை கடற்பரப்பில் மீனவர்கள் கரை ஒதுங்கியதைத் தொடர்ந்து, அவர்களை அந்நாட்டு அதிகாரிகள் கைது செய்தனர்.

இதையடுத்து கைது செய்யப்பட்ட 11 மீனவர்களும் இலங்கையில் உள்ள நீதிமன்றத்தில் ஆஜர்படுத்தப்பட்டனர். அவர்களின் வழக்கு தொடர்பான விசாரணை ஊர்க்காவல்துறை நீதிமன்றத்தில் நடைபெற்றது. மீனவர்கள் இலங்கை கடற்பரப்பிற்குள் நுழைந்தது தொடர்பான வழக்கு விசாரணை மேற்கொள்ளப்பட்ட நிலையில், நீதிமன்றம் அவர்களுக்கு அபராதம் விதித்து விடுதலை செய்ய உத்தரவிட்டது.

நீதிமன்ற உத்தரவின்படி, 11 மீனவர்களுக்கும் தலா இலங்கை மதிப்பில் ரூ.50,000 அபராதம் விதிக்கப்பட்டுள்ளது. அபராதம் செலுத்திய பின்னர் அவர்கள் விடுதலை செய்யப்பட உள்ளனர். சூறைக்காற்றால் ஏற்பட்ட கடல் சீற்றம் மற்றும் வானிலை காரணமாகவே மீனவர்கள் திசைமாறி இலங்கை கடற்கரையில் கரை ஒதுங்கியதாக தெரிவிக்கப்பட்டுள்ளது.

இலங்கை நீதிமன்றத்தின் உத்தரவால் 11 ராமேஸ்வரம் மீனவர்களும் மீண்டும் தமிழகம் திரும்புவதற்கான நடவடிக்கைகள் மேற்கொள்ளப்பட உள்ளன. கடலில் நிலவும் மோசமான வானிலை மற்றும் இயற்கைச் சூழல் காரணமாக தமிழக மீனவர்கள் இலங்கை கடற்பகுதிக்குள் தவறுதலாகச் செல்லும் சம்பவங்கள் அவ்வப்போது நடைபெற்று வருகின்றன. இந்நிலையில், தற்போது 11 மீனவர்கள் அபராதத்துடன் விடுதலை செய்யப்பட்டிருப்பது அவர்களது குடும்பத்தினரிடையே நிம்மதியை ஏற்படுத்தியுள்ளது.

இதையும் படிங்க : தனியார் பள்ளிகள் அனுமதிக்கு லஞ்சம்? அன்பில் மகேஷிடம் கேட்கப்பட்ட 246 கேள்விகள்!