New Uniforms for Tasmac Employees: டாஸ்மாக் ஊழியர்களுக்கு புதிய சீருடை திட்டம் விரைவில் அறிமுகமாக உள்ளது. மேலும், ஊழியர்களுக்கு முன்பணமாக ரூ.20 ஆயிரம் வழங்கப்பட உள்ளது.
New Uniforms for Tasmac Employees: டாஸ்மாக் ஊழியர்களுக்கு புதிய சீருடை திட்டம் விரைவில் அறிமுகமாக உள்ளது. மேலும், ஊழியர்களுக்கு முன்பணமாக ரூ.20 ஆயிரம் வழங்கப்பட உள்ளது.
Published on: September 20, 2026 at 7:55 pm
சென்னை, செப்.20, 2026: டாஸ்மாக் சில்லறை விற்பனை கடைகளில் பணியாற்றும் ஊழியர்களுக்கு புதிய சீருடை திட்டத்தை டாஸ்மாக் நிர்வாகம் அறிமுகம் செய்துள்ளது. இதுதொடர்பாக வெளியிடப்பட்டுள்ள வழிமுறைகளின்படி, கடை மேற்பார்வையாளர்களுக்கு இளநீல நிற சட்டையும், கடற்படை நீல நிற பேன்ட்டும் சீருடையாக நிர்ணயிக்கப்பட்டுள்ளது. அதேபோல், விற்பனையாளர்கள் மற்றும் உதவி விற்பனையாளர்களுக்கு பீஜ் நிற சட்டையும், அடர் சாம்பல் நிற பேன்ட்டும் சீருடையாக அறிவிக்கப்பட்டுள்ளது.
சீருடை சட்டையின் இடது மார்புப் பகுதியில் டாஸ்மாக் நிறுவனத்தின் சின்னம் பொருத்தப்பட வேண்டும் என தெரிவிக்கப்பட்டுள்ளது. மேலும், ஊழியர்கள் சட்டையை பேன்ட்டுக்குள் செருகியோ அல்லது வெளியே விட்டோ அணிந்து கொள்ளலாம் எனவும் வழிமுறைகளில் குறிப்பிடப்பட்டுள்ளது. சீருடைக்கான துணிகளை டாஸ்மாக் நிர்வாகம் அங்கீகரித்துள்ள நிறங்களில் மட்டுமே கொள்முதல் செய்ய வேண்டும் என்றும் அறிவுறுத்தப்பட்டுள்ளது.
இந்த புதிய சீருடை திட்டம் வரும் நவம்பர் 15-ஆம் தேதி முதல் அமலுக்கு வர உள்ளதாக தெரிவிக்கப்பட்டுள்ளது. ஒவ்வொரு ஊழியருக்கும் 3 சீருடைகளுக்கு தலா ரூ.2,000 வீதம் மொத்தம் ரூ.6,000 அவர்களது வங்கிக் கணக்கில் செலுத்தப்பட உள்ளதாக கூறப்படுகிறது. இதன்மூலம் சில்லறை விற்பனை கடைகளில் பணியாற்றும் ஊழியர்களுக்கு ஒரே மாதிரியான சீருடை நடைமுறை கொண்டுவரப்பட உள்ளது.
இதனிடையே, டாஸ்மாக் சில்லறை விற்பனை கடை ஊழியர்களுக்கு பண்டிகை முன்பணம் உள்ளிட்ட பல்வேறு நலத்திட்டங்களை வழங்க வேண்டும் என தொழிற்சங்கங்கள் மற்றும் தொழிலாளர் அமைப்புகள் தொடர்ந்து கோரிக்கை விடுத்து வந்தன. இதனைத் தொடர்ந்து, கடந்த ஆகஸ்ட் 31-ஆம் தேதி நடைபெற்ற டாஸ்மாக் நிர்வாகக் குழு கூட்டத்தில் பல்வேறு நலத்திட்டங்களுக்கு ஒப்புதல் அளிக்கப்பட்டதாக தெரிவிக்கப்பட்டுள்ளது. அதன்படி, தகுதியுள்ள சில்லறை விற்பனை கடை ஊழியர்களுக்கு ஆண்டுக்கு ஒருமுறை ரூ.20,000 பண்டிகை முன்பணம் வழங்க நிர்வாகம் உத்தரவிட்டுள்ளது. இந்த முன்பணத்துக்கு வட்டி வசூலிக்கப்படாது என்றும் தெரிவிக்கப்பட்டுள்ளது.
ஊழியர்கள் தங்களுக்கு விருப்பமான ஒரு பண்டிகையைத் தேர்வு செய்து இந்த முன்பணத்தைப் பெறலாம். அதன்படி, பொங்கல், தீபாவளி, கிறிஸ்துமஸ், ரம்ஜான், பக்ரீத் உள்ளிட்ட பண்டிகைகளில் ஏதேனும் ஒன்றைத் தேர்வு செய்யலாம் என தெரிவிக்கப்பட்டுள்ளது. மேலும், தமிழக அரசால் அனுமதிக்கப்படும் அல்லது அறிவிக்கப்படும் பிற மதப் பண்டிகைகளுக்கும் இந்த முன்பணம் வழங்கப்படலாம் என கூறப்பட்டுள்ளது. புதிய சீருடை திட்டத்துடன், பண்டிகை முன்பணம் உள்ளிட்ட நலத்திட்டங்களும் நடைமுறைக்கு வருவதால் டாஸ்மாக் ஊழியர்களுக்கான பணிச்சூழல் மற்றும் நலன்கள் தொடர்பான நடவடிக்கைகள் அதிகரித்துள்ளன.
இதையும் படிங்க : தமிழ்நாட்டில் ஜில்ஜில் ஆகப்போகும் 21 மாவட்டங்கள்.. தஞ்சை இருக்கு.. முழு விவரம்!
திராவிடன் டைம்ஸின் செய்திகளை உடனுக்குடன் தெரிந்துக்கொள்ள
திராவிடன் டைம்ஸ்.காம் (www.dravidantimes.com) ஆன்லைன் செய்தித்தளம் ஆகஸ்ட் 18 2024ல் தொடங்கப்பட்டது. தமிழ்நாடு, இந்தியா, சர்வதேசம், வணிகம், லைஃப்ஸ்டைல், சினிமா, ஆன்மிகம், தொழில்நுட்பம், கல்வி மற்றும் வேலைவாய்ப்பு என பலதரப்பட்ட செய்திகளை பக்கச்சார்பின்றி வெளியிடுகிறது.
© 2024 dravidantimes.com – developed and designed by Thirdvizion.com
