மணம் கமகமக்கும்.. ருசி அள்ளும்.. சுவையான பிரான் பிரியாணி இப்படி பண்ணுங்க!

Food: ஹோட்டல் சுவையில் வீட்டிலேயே பிரான் பிரியாணி இப்படி பண்ணுங்க.

பிரான் பிரியாணி

ByDravidan Times Bureau

Published on: February 10, 2025 at 9:30 am

குழந்தைகள் முதல் பெரியவர்கள் வரை அனைவரும் விரும்பி உண்ணக்கூடிய உணவு வகைகளுள் ஒன்று பிரியாணி. சுவையான பிரான் பிரியாணி எளிமையாக எப்படி செய்யலாம் என்று பார்க்கலாம்.

தேவையான பொருள்கள்

இறால் (பிரான்) – ½ கிலோ
பாஸ்மதி ரைஸ் -2 கப் (400 கிராம்)
தண்ணீர் -3 கப்
எண்ணெய் -2 டேபிள் ஸ்பூன்
நெய் – 2 டேபிள் ஸ்பூன்
பிரியாணி இலை -1
பட்டை -1
கிராம்பு -3
ஏலக்காய் -2
பெரிய வெங்காயம் -2
தக்காளி -2
மஞ்சள் தூள் -¼ டீஸ்பூன்
மிளகாய் தூள் -2 டீஸ்பூன்
கரம் மசாலா -2 டீஸ்பூன்
புதினா இலை- 1 கைப்பிடி அளவு
மல்லி இலை -1 கைப்பிடி அளவு
உப்பு – தேவையான அளவு

அரைக்க வேண்டியவை

இஞ்சி -1 துண்டு
பூண்டு -4
மிளகாய் -2
கொத்தமல்லி இலை – சிறிதளவு

செய்முறை

குக்கரில் எண்ணெய் மற்றும் நெய் சேர்த்து எண்ணெய் காய்ந்ததும் அதில் பிரியாணி இலை, பட்டை, கிராம்பு மற்றும் ஏலக்காய் சேர்த்து வறுக்கவும். பின்னர் இதனுடன் நீல வாக்கில் நறுக்கிய பெரிய வெங்காயம் சேர்த்து வெங்காயம் பொன்னிறமாக மாறும் வரை நன்கு வதக்க வேண்டும். வெங்காயம் நிறம் மாறி நன்கு வதங்கிய பின்னர் ஒரு மிக்ஸி ஜாரில் இஞ்சி, பூண்டு, மிளகாய் மற்றும் சிறிது கொத்தமல்லி இலைகளை சேர்த்து நன்கு அரைத்து இதனுடன் சேர்த்து கலந்து விட வேண்டும்.

இஞ்சி பூண்டு விழுதின் பச்சை வாடை நீங்கிய பின்னர் இதனுடன் தக்காளி சேர்த்து வதக்கவும். பின்னர் இதனுடன் மஞ்சள் தூள், மிளகாய் தூள், கரம் மசாலா சேர்த்து கலந்து விட வேண்டும். பின்னர் இதனுடன் கழுவி சுத்தம் செய்த இறால்களை சேர்த்து கலந்து விட வேண்டும். பின்னர் இதனுடன் ஒரு கைப்பிடி அளவு புதினா இலை மற்றும் கொத்தமல்லி இலைகளை சேர்க்க வேண்டும்.

இவை தொக்கு பதத்தில் வந்த பின்னர் தேவையான அளவு உப்பு சேர்த்துக் கொள்ளவும். அரை மணி நேரம் தண்ணீரில் ஊற வைத்த இரண்டு கப் பாஸ்மதி அரிசியை தண்ணீரை வடித்த பின்னர் இதனுடன் சேர்த்துக் கொள்ளவும். இப்போது பிரியாணிக்கு தேவையான தண்ணீர் சேர்க்கவும். இரண்டு கப் பாஸ்மதி அரிசிக்கு மூன்று கப் தண்ணீர் சேர்க்க வேண்டும்.

தண்ணீர் சேர்த்த பின்னர் பிரியாணிக்கு தேவையான காரம், உப்பு சரிபார்த்துக் கொள்ளவும். உப்பு சிறிது அதிகமாக இருக்கும் படி பார்த்துக் கொள்ளவும். ஒருமுறை அரிசியை நன்கு கலந்துவிட்டு பின்னர் குக்கரை மூடி வைக்கவும். அடுப்புத்தியை மீடியம் ஃப்ளேமில் வைத்து ஒரு விசில் வரும் வரை வேக விடவும். விசில் வரவில்லை என்றாலும் பத்து நிமிடத்தில் அடுப்பு தீயை ஆப் செய்ய வேண்டும். குக்கரில் ஆவி முழுமையாக வெளியேறிய பின்னர் குக்கர் மூடியை திறந்து அரிசி உடையாமல் வேறு பாத்திரத்தில் மாற்றவும். இப்போது சுவையான பிரான் பிரியாணி தயார்.

இதையும் படிங்க : அசத்தலான சுவையில் முருங்கைக் கீரை, கருவேப்பிலை குழம்பு : இப்படி செஞ்சு பாருங்க !