இந்திய இறக்குமதி பொருட்கள் மீது 10% கூடுதல் வரி.. டொனால்ட் ட்ரம்ப் அறிவிப்பு!

Donald Trump: இந்தியாவிலிருந்து இறக்குமதி செய்யப்படும் பொருட்கள் மீது 10% கூடுதல் வரி விதிப்பதாக அமெரிக்கா அறிவித்துள்ளது.

டொனால்ட் ட்ரம்ப்

BySaranya JK

Published on: July 24, 2026 at 2:02 pm

புதுடெல்லி, ஜூலை 24, 2026: அமெரிக்கா, இந்தியாவைச் சேர்த்து 60 வர்த்தகப் பங்காளிகளிடமிருந்து இறக்குமதி செய்யப்படும் பொருள்கள் மீது புதிய வரிகளை அறிவித்துள்ளது.

முன்னதாக, இந்தியா மீது 12.5% என்ற அதிகபட்ச வரி விதிக்கப்படும் என எதிர்பார்க்கப்பட்ட நிலையில், தொழிலாளர் தொடர்பான விவகாரங்களில் அமெரிக்காவுடன் நடைபெற்ற ஆக்கபூர்வமான பேச்சுவார்த்தைகளின் விளைவாக, இந்தியா குறைந்தபட்சமான 10% வரிப் பிரிவில் சேர்க்கப்பட்டது. இங்கிலாந்து, கனடா, இந்தோனேசியா, வங்கதேசம், மெக்சிகோ போன்ற நாடுகளுடன் சேர்த்து, இந்தியாவும் 10% வரி விதிக்கப்படும் 17 நாடுகளில் ஒன்றாகும்.

அமெரிக்க அதிபர் டொனால்ட் டிரம்ப், கட்டாய உழைப்பு மூலம் தயாரிக்கப்பட்ட பொருட்களின் இறக்குமதியைத் தடுக்கும் நடவடிக்கைகளை போதுமான அளவில் மேற்கொள்ளாத நாடுகளுக்கு எதிராக இந்த உத்தரவைப் பிறப்பித்துள்ளார்.

உலகளாவிய விநியோகச் சங்கிலிகளில் இருந்து கட்டாய உழைப்பை அகற்றுவதற்கான முயற்சியில் அமெரிக்கா முன்னிலை வகிக்கிறது. “கட்டாய உழைப்பு மூலம் தயாரிக்கப்பட்ட பொருட்களின் இறக்குமதிக்குத் தடை விதித்து, அதைத் திறம்பட அமல்படுத்தும் ஒரே நாடு அமெரிக்கா” என்று அமெரிக்க வர்த்தகப் பிரதிநிதி அலுவலகம் (USTR) வலியுறுத்தியுள்ளது.

அமெரிக்க வர்த்தகப் பிரதிநிதி தூதர் ஜேமிசன் கிரீர், பல தசாப்தங்களாக மேற்கொள்ளப்பட்ட தார்மீக வலியுறுத்தல்கள் உலகளாவிய விநியோகச் சங்கிலிகளில் இருந்து கட்டாய உழைப்பை ஒழிக்கவில்லை என்பதை சுட்டிக்காட்டினார். இந்த நடவடிக்கை, உலகளாவிய தொழிலாளர்களின் நலனை மேம்படுத்தும் முயற்சியாகவும், மனித உரிமை மீறல்களைத் தடுக்கும் முயற்சியாகவும் பார்க்கப்படுகிறது.

இதையும் படிங்க : ஜெனரிக் மருந்து இறக்குமதிக்கு 200% வரி.. ட்ரம்ப் அறிவிப்பால் பார்மஸி பங்குகள் கடும் சரிவு!