வெளிநாட்டு முதலீட்டாளர்கள் பங்கு விற்பனை.. இந்திய பங்குச் சந்தை சரிவு ஏன்?

Stock Market Opens Lower: இரண்டு நாட்கள் தொடர்ந்து உயர்வை சந்தித்த இந்திய பங்குச்சந்தைகள், அக்டோபர் 7ஆம் தேதி காலை வர்த்தகத்தில் சரிவுடன் தொடங்கின.

இந்தியப் பங்குச் சந்தை

BySaranya JK

Published on: October 7, 2026 at 1:04 pm

Updated on: October 7, 2026 at 1:05 pm

மும்பை, அக்.7, 2026: இரண்டு நாட்கள் தொடர்ந்து உயர்வை சந்தித்த இந்திய பங்குச்சந்தைகள், அக்டோபர் 7ஆம் தேதி காலை வர்த்தகத்தில் சரிவுடன் தொடங்கின. மும்பை பங்குச்சந்தையின் சென்செக்ஸ் குறியீடு தொடக்க வர்த்தகத்தில் 460 புள்ளிகள் சரிந்து 72,599.05 புள்ளிகளாக இருந்தது. தேசிய பங்குச்சந்தையின் நிஃப்டி 164.80 புள்ளிகள் குறைந்து 22,610.85 புள்ளிகளாக வர்த்தகமானது.

சர்வதேச சந்தையில் கச்சா எண்ணெய் விலை உயர்ந்தது மற்றும் ரிசர்வ் வங்கியின் நிதிக் கொள்கை முடிவை முதலீட்டாளர்கள் எதிர்பார்த்து காத்திருந்தது ஆகியவை சந்தை சரிவுக்கு முக்கிய காரணங்களாகக் கூறப்பட்டன. உலகளாவிய எண்ணெய் விலையான பிரெண்ட் கச்சா எண்ணெய் ஒரு சதவீதத்துக்கும் மேல் உயர்ந்து பீப்பாய்க்கு 101.6 அமெரிக்க டாலராக வர்த்தகமானது. இதனுடன், வெளிநாட்டு முதலீட்டாளர்களின் பங்கு விற்பனையும் சந்தையில் அழுத்தத்தை ஏற்படுத்தியது.

சென்செக்ஸ் குறியீட்டில் இடம்பெற்றுள்ள நிறுவனங்களில் டைட்டன், ஏசியன் பெயிண்ட்ஸ், பாரத் எலக்ட்ரானிக்ஸ், மாருதி சுசுகி, ஆக்சிஸ் வங்கி மற்றும் மஹிந்திரா & மஹிந்திரா உள்ளிட்ட பங்குகள் சரிவை சந்தித்தன. அதேநேரத்தில் பஜாஜ் ஃபைனான்ஸ் மற்றும் பார்தி ஏர்டெல் பங்குகள் ஏற்றம் கண்டன. இதற்கிடையே, ஆசிய சந்தைகளிலும் தென்கொரியாவின் கோஸ்பி, ஜப்பானின் நிக்கி 225 மற்றும் ஹாங்காங் ஹேங் செங் குறியீடுகள் சரிவுடன் காணப்பட்டன.

முந்தைய நாளான அக்டோபர் 6ஆம் தேதி சென்செக்ஸ் 685.34 புள்ளிகள் உயர்ந்து 73,067.81 புள்ளிகளிலும், நிஃப்டி 220.35 புள்ளிகள் அதிகரித்து 22,776.10 புள்ளிகளிலும் நிறைவடைந்திருந்தன. இந்நிலையில், இன்று ரிசர்வ் வங்கியின் நிதிக் கொள்கைக் குழு கூட்ட முடிவை சந்தை எதிர்பார்த்தது. வெளிநாட்டு நிறுவன முதலீட்டாளர்கள் செவ்வாய்க்கிழமை மட்டும் ரூ.2,961.30 கோடி மதிப்பிலான பங்குகளை விற்றதாக பங்குச்சந்தை தரவுகள் தெரிவிக்கின்றன.

இதையும் படிங்க : துவரம் பருப்பு கொள்முதலில் ரூ.187.56 கோடி சேமிப்பு.. தமிழ்நாடு அரசு