ஆளுநரின் அனுமதி கோரிய அன்பில் மகேஷ்.. திமுகவின் பழைய கருத்தை நினைவுபடுத்திய ஐகோர்ட்!

Anbil Mahesh: கட்சி நிதி வசூல் வழக்கில், ஆளுநரின் ஒப்புதலை வலியுறுத்திய அன்பில் மகேஷ்; திமுகவின் பழைய கருத்தை நினைவுபடுத்திய உயர் நீதிமன்றம்.

அன்பில் மகேஷ், சென்னை உயர் நீதிமன்றம்

BySaranya JK

Published on: October 13, 2026 at 12:51 pm

சென்னை, அக்.13, 2026: தனியார் பள்ளிகளிடம் கட்சி நிதி என்ற பெயரில் பணம் வசூலித்ததாக எழுந்த புகாரில், முன்னாள் பள்ளிக்கல்வித்துறை அமைச்சர் அன்பில் மகேஷ் பொய்யாமொழிக்கு எதிராகப் பதிவு செய்யப்பட்ட முதல் தகவல் அறிக்கையை (FIR) ரத்து செய்யக் கோரிய மனு சென்னை உயர் நீதிமன்றத்தில் விசாரணைக்கு வந்தது. அப்போது, ஆளுநர் பதவியை முன்பு தேவையற்றது என்றும், “ஆட்டுக்குத் தாடி எதற்கு?” என்றும் திமுக விமர்சித்ததை நீதிபதி வி. லட்சுமிநாராயணன் சுட்டிக்காட்டினார்.

ஊழல் தடுப்புச் சட்டத்தின் 17-ஏ பிரிவின்படி, ஆளுநரிடமிருந்து பெற வேண்டிய முன் அனுமதி, ஆளுநர் மாளிகையிடமிருந்து பெறப்படாமல் அரசுச் செயலரிடமிருந்து பெறப்பட்டதாக அன்பில் மகேஷ் தரப்பில் வாதிடப்பட்டது. இதைக் கேட்ட நீதிபதி, ஆளுநரின் அதிகாரங்களை எதிர்த்து வந்த திமுக, தற்போது அதே ஆளுநரின் ஒப்புதலை வலியுறுத்துவது ஏன் என்று கேள்வி எழுப்பினார். மேலும், அன்பில் மகேஷ் முன்ஜாமீன் கோருவதற்கான மனுவை எப்போது தாக்கல் செய்யத் திட்டமிட்டுள்ளார் என்றும் நீதிபதி கேள்வி எழுப்பினார்.

தமிழ்நாடு தனியார் பள்ளிகள் சங்கத்தின் முன்னாள் பொதுச்செயலாளர் அளித்த புகாரின் அடிப்படையில் இந்த வழக்கு உருவானது. சங்கத் தலைவர் பி.டி. அரசகுமார் மற்றும் பிற நிர்வாகிகள், தனியார் பள்ளிகளுக்கு தடையின்மைச் சான்றிதழ் (NOC), உரிமம், அங்கீகாரம் மற்றும் அங்கீகாரப் புதுப்பித்தல் ஆகியவற்றைப் பெற்றுத் தருவதாகக் கூறி பள்ளி நிர்வாகங்களிடம் பணம் வசூலித்ததாகவும், ஆனால் வாக்குறுதிகளை நிறைவேற்றவில்லை என்றும் புகாரில் தெரிவிக்கப்பட்டது.

முதலில் பாரதிய நியாய சன்ஹிதாவின் 316(5), 318(4) மற்றும் 3(5) ஆகிய பிரிவுகளின் கீழ் வழக்குப் பதிவு செய்யப்பட்டது. பின்னர், ஊழல் தடுப்புச் சட்டத்தின் 7 மற்றும் 12 ஆகிய பிரிவுகளையும் சேர்த்து, அன்பில் மகேஷையும் குற்றம் சாட்டப்பட்டவராக இணைக்கக் கோரி காவல்துறை தரப்பில் நீதிமன்றத்தில் அறிக்கை தாக்கல் செய்யப்பட்டது. இதையடுத்து, தனக்கு எதிரான முதல் தகவல் அறிக்கையை ரத்து செய்யக் கோரி அன்பில் மகேஷ் உயர் நீதிமன்றத்தை அணுகினார்.

இந்த வழக்கில் நான்கு ஆண்டுகள் தாமதமாகப் புகார் அளிக்கப்பட்டதாகக் கூறப்படுவதை சென்னை மத்திய குற்றப்பிரிவு காவல்துறை மறுத்துள்ளது. புகார் 2026 ஜூன் 23ஆம் தேதி பெறப்பட்டதாகவும், ஜூன் 27ஆம் தேதி முதல் தகவல் அறிக்கை பதிவு செய்யப்பட்டதாகவும் காவல்துறை தனது பதில் மனுவில் தெரிவித்துள்ளது. கட்சி நிதி என்ற பெயரில் பள்ளி நிர்வாகங்களிடம் பணம் வசூலிக்கப்பட்டதாக விசாரணையில் தெரியவந்துள்ளதாகவும், தனியார் பள்ளிகள் தொடர்பான கோரிக்கைகளில் அன்பில் மகேஷுக்குத் தொடர்பு இருப்பதைக் காட்டும் தகவல்கள் கிடைத்துள்ளதாகவும் காவல்துறை கூறியுள்ளது. மேலும், ஆளுநரின் ஒப்புதல் தேவையில்லை என்றும், விசாரணை தொடர்ந்து நடைபெற்று வருவதால் வழக்கை ரத்து செய்வதோ அல்லது விசாரணைக்குத் தடை விதிப்பதோ ஆதாரங்களைச் சேகரிப்பதற்கும் பாதுகாப்பதற்கும் பாதிப்பை ஏற்படுத்தும் என்றும் தெரிவித்துள்ளது.

எனவே, அன்பில் மகேஷின் மனுவைத் தள்ளுபடி செய்ய வேண்டும் என காவல்துறை வலியுறுத்தியுள்ளது. இந்த வழக்கின் அடுத்தகட்ட விசாரணையை அக்டோபர் 29ஆம் தேதிக்கு நீதிமன்றம் ஒத்திவைத்துள்ளது. இந்த நிலையில், அன்பில் மகேஷுக்கு எதிரான குற்றச்சாட்டுகள் நீதிமன்றத்தில் நிரூபிக்கப்பட்டதாகக் கருத முடியாது; வழக்கு விசாரணை தொடர்ந்து நடைபெற்று வருகிறது.

இதையும் படிங்க : அதிமுகவின் 6 எம்.எல்.ஏ.க்கள் ராஜினாமா செல்லும்.. சென்னை உயர் நீதிமன்றம் தீர்ப்பு!