‘ஜெயிலர் 2’ இந்தி வெளியீடு குறித்து படக்குழு விளக்கம்.. அக்டோபர் 15-ல் உலகம் முழுவதும் ரிலீஸ்!

Jailer 2 Release Update: ‘ஜெயிலர் 2’ இந்தி வெளியீடு குறித்து படக்குழு விளக்கம் அளித்துள்ளது; இப்படம், அக்டோபர் 15-ல் உலகம் முழுவதும் ரிலீஸ் ஆகிறது.

ஜெயிலர் 2 படத்தில் ரஜினிகாந்த்

ByThilahavathy P

Published on: October 13, 2026 at 12:36 pm

சென்னை, அக்.13, 2026: சூப்பர் ஸ்டார் ரஜினிகாந்த் நடிப்பில், நெல்சன் திலீப்குமார் இயக்கத்தில் உருவாகியுள்ள ‘ஜெயிலர் 2’ திரைப்படம், வரும் அக்டோபர் 15ஆம் தேதி தமிழ், தெலுங்கு உள்ளிட்ட மொழிப் பதிப்புகளுடன் இந்தியிலும் திரையரங்குகளில் வெளியாகும் என்று படக்குழு அதிகாரப்பூர்வமாகத் தெளிவுபடுத்தியுள்ளது.

இப்படத்தின் இந்திப் பதிப்பு வெளியாகாது என்று பரவிய தகவல்களுக்கு மறுப்பு தெரிவித்து, அக்டோபர் 12ஆம் தேதி படத்தின் விளம்பரப் பிரிவு அறிக்கை வெளியிட்டது. அதில், ஏற்கெனவே திட்டமிட்டபடி இந்திப் பதிப்பின் வெளியீட்டுத் தேதியில் எந்த மாற்றமும் இல்லை என்றும், வட இந்தியாவில் பென் மருதர் என்டர்டெயின்மென்ட் நிறுவனம் படத்தை விநியோகம் செய்யும் என்றும் தெரிவிக்கப்பட்டுள்ளது. உறுதிப்படுத்தப்படாத தகவல்களை ஊடகங்களும் சமூக வலைதளங்களும் பரப்ப வேண்டாம் என்றும் படக்குழு கேட்டுக்கொண்டுள்ளது.

‘ஜெயிலர் 2’ படத்தின் இந்திப் பதிப்பு வெளியீடு தொடர்பாகச் சர்ச்சை எழுந்ததற்கு, படத்தின் ஓடிடி வெளியீட்டு ஒப்பந்தம் முக்கியக் காரணமாகக் கூறப்படுகிறது. படத்தின் டிஜிட்டல் உரிமையை அமேசான் பிரைம் வீடியோ நிறுவனம் சுமார் ரூ.160 கோடிக்கு வாங்கியுள்ளதாகச் செய்திகள் வெளியாகியுள்ளன. திரையரங்குகளில் படம் வெளியான பிறகு ஓடிடியில் வெளியிடுவதற்கான கால இடைவெளி தொடர்பாக, படத் தயாரிப்பு நிறுவனம் மற்றும் முக்கியத் திரையரங்கச் சங்கிலிகளான பிவிஆர் ஐநாக்ஸ் (PVR INOX), சினிபோலிஸ் (Cinépolis) ஆகியவற்றுக்கு இடையே கருத்து வேறுபாடு ஏற்பட்டதாகத் தகவல்கள் தெரிவிக்கின்றன.

பொதுவாக இந்தித் திரைப்படங்களுக்கு எட்டு வாரங்கள் வரை திரையரங்கு வெளியீட்டுக்குப் பிறகான இடைவெளியை முக்கியத் திரையரங்குகள் எதிர்பார்க்கும் நிலையில், ‘ஜெயிலர் 2’ படத்திற்கு நான்கு வார கால இடைவெளி மட்டுமே ஒப்புக்கொள்ளப்பட்டதாகக் கூறப்படுகிறது. இதனால், வட இந்தியாவில் உள்ள முக்கிய மல்டிபிளெக்ஸ் திரையரங்குகளில் படத்தின் வெளியீடு பாதிக்கப்படலாம் என்ற செய்திகள் பரவின. இருப்பினும், இந்தித் திரைப்பட வெளியீட்டுத் தேதி மாற்றப்படவில்லை என்று படக்குழு தற்போது உறுதிப்படுத்தியுள்ளது.

2023ஆம் ஆண்டு வெளியாகி பெரும் வரவேற்பைப் பெற்ற ‘ஜெயிலர்’ திரைப்படத்தின் தொடர்ச்சியாக ‘ஜெயிலர் 2’ உருவாகியுள்ளது. இதில், ஓய்வுபெற்ற சிறைக் காவல் அதிகாரியான டைகர் முத்துவேல் பாண்டியன் கதாபாத்திரத்தில் ரஜினிகாந்த் மீண்டும் நடித்துள்ளார். குடும்பத்தைப் பாதுகாக்கவும், ஆபத்தான குற்றக் கும்பலை எதிர்கொள்ளவும் அவர் மேற்கொள்ளும் போராட்டத்தை மையமாகக் கொண்டு கதை அமைக்கப்பட்டுள்ளது.

இப்படத்தில் மோகன்லால், சிவராஜ்குமார், ஜாக்கி ஷெராஃப், மிதுன் சக்ரவர்த்தி, வித்யா பாலன், எஸ்.ஜே. சூர்யா, சூரஜ் வெஞ்சாரமூடு உள்ளிட்ட பலர் நடித்துள்ளனர். சன் பிக்சர்ஸ் தயாரிக்கும் இப்படத்திற்கு அனிருத் ரவிச்சந்தர் இசையமைத்துள்ளார். அக்டோபர் 15ஆம் தேதி உலகம் முழுவதும் திரையரங்குகளில் வெளியாகத் திட்டமிடப்பட்டுள்ள இப்படத்தின் இந்திப் பதிப்பும் திட்டமிட்டபடி வெளியாகும் என்ற படக்குழுவின் அறிவிப்பு, வட இந்திய ரசிகர்களிடையே நிலவிய குழப்பத்துக்கு முற்றுப்புள்ளி வைத்துள்ளது.

இதையும் படிங்க : ரேகா மீது காதல் இருந்ததா? அமிதாப் பச்சன் பதில் மீண்டும் வைரல்!