காங்கிரஸின் துரோகம் புதிய அரசிலும் தொடரும்.. தி.மு.க. இளைஞரணி கூட்டத்தில் தீர்மானம்!

DMK Youth Wing Meet : காங்கிரஸ் துரோகம் இழைத்துவிட்டது என தி.மு.க. இளைஞரணி தீர்மானம் நிறைவேற்றியுள்ளது.

தி.மு.க. இளைஞரணி கூட்டம்

ByPushpa Gopinath

Published on: May 23, 2026 at 10:28 pm

சென்னை, மே 23, 2026: சென்னையில் நடைபெற்ற தி.மு.க இளைஞர் அணி கூட்டத்தில் காங்கிரசுக்கு எதிராக தீர்மானங்கள் நிறைவேற்றப்பட்டன. சென்னை அண்ணா அறிவாலயத்தில் நடைபெற்ற டிஎம்கே இளைஞர் அணி கூட்டத்தில், காங்கிரசுக்கு எதிராக கோஷங்கள் எழுப்பப்பட்டன. இளைஞர் அணி செயலாளர் மற்றும் எதிர்க்கட்சித் தலைவர் உதயநிதி ஸ்டாலின் தலைமையில் நடைபெற்ற கூட்டத்தில், காங்கிரஸ் தேர்தலுக்குப் பிறகு கூட்டணியை முறித்தது குறித்து கடுமையாக விமர்சிக்கப்பட்டது.

“காங்கிரஸ் கூட்டணியை இரவோடு இரவாக மாற்றியது; அதன் துரோகம் புதிய கூட்டணியிலும் தொடரும்” என தீர்மானத்தில் குறிப்பிடப்பட்டது. இந்தக் கூட்டத்தில் மொத்தம் ஒன்பது தீர்மானங்கள் நிறைவேற்றப்பட்டன. அதில், தேர்தல் பிரசாரத்தில் கட்சித் தலைமையின் பங்களிப்பை பாராட்டும் தீர்மானம் நிறைவேற்றப்பட்டது.

மேலும், தேர்தல் தோல்விக்கான காரணங்களை ஆய்வு செய்ய அமைக்கப்பட்ட 36 உறுப்பினர் குழுவின் பணிகளை வரவேற்கும் தீர்மானமும் நிறைவேற்றப்பட்டது. அப்போது, இளைஞர் அணி, கட்சியின் அமைப்பு மறுசீரமைப்பு முயற்சிகளுக்கு முழு ஒத்துழைப்பு அளிப்பதாக உறுதியளித்தது. தொடர்ந்து, தேர்தல் தோல்வி ஏற்பட்டாலும், தி.மு.க மீண்டும் எழுச்சி பெறும் திறன் கொண்டது என வலியுறுத்தப்பட்டது.

இதற்கிடையில், கூட்டத்தில், கோயம்புத்தூரில் சிறுமி பாலியல் வன்கொடுமை செய்யப்பட்டு கொல்லப்பட்ட சம்பவம் குறித்து, ஆளும் தமிழக வெற்றி கழக அரசை கண்டிக்கும் தீர்மானம் நிறைவேற்றப்பட்டது. மேலும், புதிய அரசு பதவியேற்ற சில நாட்களிலேயே, சட்டம் மற்றும் ஒழுங்கு நிலைமை மோசமடைந்துள்ளது என குற்றச்சாட்டு முன்வைக்கப்பட்டது என்பது குறிப்பிடத்தக்கது.

இதையும் படிங்க : புனித ஜார்ஜ் கோட்டை தேவாலயத்தில் முதல்வர் விஜய்.. உற்சாக வரவேற்பு