கருங்கடலில் ரஷ்ய ட்ரோன் தாக்குதல்.. உயிர் தப்பிய 3 இந்தியர்கள்!

Russian Drone Attack: கருங்கடலில் ரஷ்ய ட்ரோன் தாக்குதலில் உயிர் தப்பிய 3 இந்தியர்கள் ருமேனியாவிலிருந்து தாயகம் புறப்பட்டனர்!

கருங்கடலில் ரஷ்யா தாக்குதல்

BySaranya JK

Published on: October 11, 2026 at 5:25 pm

லண்டன், அக்.11, 2026: கருங்கடல் பகுதியில் ரஷ்ய ட்ரோன் தாக்குதலுக்கு உள்ளான துருக்கி நாட்டுக்குச் சொந்தமான சரக்குக் கப்பலில் இருந்து மீட்கப்பட்ட மூன்று இந்தியர்கள், ருமேனியாவிலிருந்து தாயகம் திரும்பப் புறப்பட்டுள்ளனர். சாஹில் சந்து, அஸ்வினி குமார், ஹர்மன் சிங் ஆகிய மூவரும் அக்டோபர் 10-ஆம் தேதி சனிக்கிழமை இந்தியாவுக்குப் புறப்பட்டதாக, ருமேனியாவின் புக்கரெஸ்டில் உள்ள இந்தியத் தூதரகம் தெரிவித்துள்ளது.

‘எம்.வி. ராயத் மம்மதோவ்’ என்ற அந்தச் சரக்குக் கப்பல், உக்ரைனின் இஸ்மாயில் துறைமுகத்திலிருந்து இத்தாலியின் ரவென்னா நகருக்குச் சோளத்தை ஏற்றிச் சென்றுகொண்டிருந்தது. அப்போது, அக்டோபர் 5-ஆம் தேதி திங்கட்கிழமை, ருமேனியாவின் கடல் எல்லைக்கு வெளியே கருங்கடல் பகுதியில் கப்பல் ட்ரோன் தாக்குதலுக்கு உள்ளானது. இந்தத் தாக்குதலில் இரண்டு வெளிநாட்டுக் கடற்பணியாளர்கள் உயிரிழந்ததுடன், பலர் காயமடைந்தனர். கப்பலில் பணியாற்றிய மூன்று இந்தியர்களும் உயிர் தப்பினர். அவர்களில் ஒருவர் காயமடைந்ததால் ருமேனியாவில் உள்ள மருத்துவமனையில் சிகிச்சை பெற்றார்.

இந்தியர்கள் பாதுகாப்பாகத் தாயகம் திரும்புவதற்குத் தேவையான அனைத்து உதவிகளையும் இந்தியத் தூதரகம் வழங்கியதாகத் தெரிவித்துள்ளது. அக்டோபர் 7-ஆம் தேதி தூதரக அதிகாரி மூவரையும் நேரில் சந்தித்தபோது, இருவர் விடுதியில் தங்க வைக்கப்பட்டிருந்தனர்; காயமடைந்த மற்றொருவர் கான்ஸ்டான்டா மாவட்ட மருத்துவமனையில் சிகிச்சை பெற்று வந்தார். மூவரின் உடல்நிலையும் சீராக இருப்பதாக அப்போது தூதரகம் தெரிவித்திருந்தது.

கப்பல் நிறுவனத்தின் உள்ளூர் முகவர் மூலம் அவர்களுக்குத் தேவையான அத்தியாவசியப் பொருட்கள், செல்போன்கள் உள்ளிட்டவை வழங்கப்பட்டதுடன், இந்திய உணவும் ஏற்பாடு செய்யப்பட்டது. மீட்புப் பணியில் விரைந்து செயல்பட்ட ருமேனிய அதிகாரிகள், மீட்புக் குழுவினர் மற்றும் மருத்துவமனை நிர்வாகத்துக்கு இந்தியத் தூதரகம் நன்றி தெரிவித்துள்ளது. ரஷ்யா–உக்ரைன் போர் காரணமாக கருங்கடல் பகுதியில் வணிகக் கப்பல்களின் பாதுகாப்பு குறித்த கவலைகள் அதிகரித்துள்ள நிலையில், தாக்குதலில் உயிர் தப்பிய மூன்று இந்தியர்களும் தாயகம் திரும்புவதற்குப் புறப்பட்டிருப்பது குறிப்பிடத்தக்கது.

இதையும் படிங்க : பெண் கவிஞருக்கு இலக்கிய நோபல் பரிசு.. யார் இந்த ஆன் கார்சன்?