எல்.இ.டி பயங்கரவாதி ஹஷிம் மூசா சுட்டுக்கொலை.. ஜம்மு காஷமீரில் பரபரப்பு

Hashim Musa Killed: ஜம்மு காஷ்மீரின் புத்காம் மாவட்டத்தில் பாதுகாப்புப் படையினர் நடத்திய என்கவுன்டரில், லஷ்கர்-இ-தொய்பா (LeT) அமைப்பைச் சேர்ந்த முக்கிய தீவிரவாதி முகமது ஆசிப் என்ற ஹஷிம் மூசா கொல்லப்பட்டார்.

பயங்கரவாதி முகமது ஆசிப் என்ற ஹஷிம் மூசா

BySaranya JK

Published on: September 30, 2026 at 2:02 pm

ஜம்மு, செப்.30, 2026: ஜம்மு காஷ்மீரின் புத்காம் மாவட்டத்தில் பாதுகாப்புப் படையினர் நடத்திய என்கவுன்டரில், லஷ்கர்-இ-தொய்பா (LeT) அமைப்பைச் சேர்ந்த முக்கிய தீவிரவாதி முகமது ஆசிப் என்ற ஹஷிம் மூசா கொல்லப்பட்டதாக அதிகாரிகள் தெரிவித்துள்ளனர். பல ஆண்டுகளாக பிர் பஞ்சால் மலைத்தொடரின் இருபுறங்களிலும் நடைபெற்றதாகக் கூறப்படும் பல்வேறு தாக்குதல்களுடன் அவருக்கு தொடர்பு இருப்பதாகவும், இதனால் பாதுகாப்புப் படையினரால் அவர் தேடப்பட்டு வந்ததாகவும் அதிகாரிகள் தெரிவித்தனர்.

புத்காம் மாவட்டத்தில் யூஸ்மார்க் அருகே உள்ள கொராக் பகுதியில் இந்த நடவடிக்கை மேற்கொள்ளப்பட்டது. இந்திய ராணுவத்தின் சினார் கார்ப்ஸ், ஜம்மு காஷ்மீர் போலீசார் மற்றும் மத்திய ரிசர்வ் போலீஸ் படை (CRPF) இணைந்து நடத்திய கூட்டு பயங்கரவாத எதிர்ப்பு நடவடிக்கைக்கு ‘ஆபரேஷன் கொராக்’ என பெயரிடப்பட்டது. இந்த நடவடிக்கையின்போது பாதுகாப்புப் படையினர் சந்தேகத்திற்கிடமான நடமாட்டத்தை கவனித்ததாக தெரிவிக்கப்பட்டுள்ளது.

இதையடுத்து, சந்தேகத்திற்கிடமான நபர்களை பாதுகாப்புப் படையினர் எச்சரித்து சவால் விடுத்ததாகவும், அதற்கு அவர்கள் துப்பாக்கிச்சூடு நடத்தி பதிலளித்ததாகவும் ராணுவம் தெரிவித்துள்ளது. இதனைத் தொடர்ந்து இருதரப்புக்கும் இடையே கடுமையான துப்பாக்கிச் சண்டை நடைபெற்றது. இதில் ஒரு தீவிரவாதி கொல்லப்பட்டதாக ராணுவம் தனது எக்ஸ் சமூக வலைதளப் பதிவில் தெரிவித்துள்ளது.

கொல்லப்பட்டவர் முகமது ஆசிப் என்ற ஹஷிம் மூசா என பாதுகாப்பு அதிகாரிகள் அடையாளம் கண்டுள்ளனர். இந்த மாத தொடக்கத்தில் யூஸ்மார்க் மலைப்பகுதிகளில் பாதுகாப்புப் படையினர் மேற்கொண்ட நடவடிக்கையின்போதும் அவர் தப்பிச் சென்றதாக கூறப்படுகிறது. பல்வேறு தாக்குதல் சம்பவங்களில் தொடர்புடையதாகத் தேடப்பட்டு வந்த நிலையில், தற்போது நடைபெற்ற கூட்டு நடவடிக்கையில் அவர் சுட்டுக்கொல்லப்பட்டதாக அதிகாரிகள் தெரிவித்துள்ளனர்.

இந்த நடவடிக்கையின்போது மூசா, துத்பத்ரி பகுதியில் உள்ள தொலைதூர வனப்பகுதியில் கொல்லப்பட்டதாக தெரிவிக்கப்பட்டுள்ளது. அப்பகுதியில் தொடர்ந்து பாதுகாப்புப் படையினர் தேடுதல் நடவடிக்கைகளை மேற்கொண்டதாகவும், அங்கு வேறு யாரேனும் பதுங்கியுள்ளனரா என்பது குறித்து கண்காணிப்பு தீவிரப்படுத்தப்பட்டதாகவும் தகவல்கள் தெரிவிக்கின்றன. ‘ஆபரேஷன் கொராக்’ நடவடிக்கையின் தொடர்ச்சியாக பாதுகாப்புப் படையினர் நிலைமையை கண்காணித்து வருகின்றனர்.

இதையும் படிங்க : டெல்லி மாணவர் சங்க தேர்தல்.. கன்ஹையா குமாரை ஏன் அழைத்தார் ராகுல் காந்தி?