வெங்காயம் தொடர்பான புகார்கள்.. வாட்ஸ்அப் எண் அறிவிப்பு!

Onion Sale Complaints: வெங்காயம் விற்பனை தொடர்பான புகார்களுக்கு வாட்ஸ்அப் எண் அறிவிக்கப்பட்டுள்ளது.

வெங்காயம்

BySaranya JK

Published on: October 11, 2026 at 3:51 pm

சென்னை, அக்.11, 2026: தமிழகத்தில் நியாயவிலைக் கடைகள் மற்றும் கூட்டுறவு விற்பனை நிலையங்களில் வெங்காயம் விற்பனை செய்வது தொடர்பாகப் பொதுமக்கள் புகார் அளிக்கவும், சந்தேகங்களுக்கு விளக்கம் பெறவும் 96005 61969 என்ற வாட்ஸ்அப் எண்ணைத் தமிழக கூட்டுறவுத் துறை அறிவித்துள்ளது.

வெங்காய விலை தொடர்ந்து உயர்ந்து வரும் நிலையில், பொதுமக்களுக்கு மலிவு விலையில் வெங்காயம் கிடைப்பதை உறுதி செய்யும் நோக்கில் தமிழக அரசு இந்த நடவடிக்கையை மேற்கொண்டுள்ளது. இதன்படி, தமிழகம் முழுவதும் 8,914 நியாயவிலைக் கடைகள் மற்றும் கூட்டுறவு விற்பனை நிலையங்கள் மூலம் ஒரு கிலோ வெங்காயம் ரூ.35-க்கு விற்பனை செய்யப்படுகிறது. வெங்காயம் விற்பனை தொடர்பான குறைகள் மற்றும் விசாரணைகளைப் பொதுமக்கள் இந்த வாட்ஸ்அப் எண்ணுக்குத் தெரிவிக்கலாம் என அதிகாரப்பூர்வ அறிவிப்பில் குறிப்பிடப்பட்டுள்ளது.

வெங்காயத்தின் விலையேற்றத்தைக் கட்டுப்படுத்தவும், ஏழை மற்றும் நடுத்தரக் குடும்பங்களின் பொருளாதாரச் சுமையைக் குறைக்கவும் அரசு இந்த நடவடிக்கைகளை மேற்கொண்டுள்ளது. இதன் ஒரு பகுதியாக, தேசிய கூட்டுறவு நுகர்வோர் கூட்டமைப்பான என்.சி.சி.எஃப் மூலம் 700 மெட்ரிக் டன் வெங்காயத்தை விநியோகிக்க உத்தரவிடப்பட்டுள்ளது.

வெங்காயக் கொள்முதல் மற்றும் விநியோகப் பணிகளில் தேசிய வேளாண் கூட்டுறவு சந்தைப்படுத்தல் கூட்டமைப்பான நஃபீத் (NAFED) மற்றும் என்.சி.சி.எஃப் (NCCF) ஆகிய அமைப்புகள் ஈடுபட்டுள்ளன. சென்னையில் சனிக்கிழமை தொடங்கிய வெங்காய விற்பனை, ஞாயிற்றுக்கிழமை முதல் பிற மாவட்டங்களிலும் விரிவுபடுத்தத் திட்டமிடப்பட்டுள்ளது. குடும்ப அட்டைதாரர்கள் இந்தத் திட்டத்தின் கீழ் வெங்காயத்தைப் பெற்றுக்கொள்ளலாம். மலிவு விலை வெங்காய விற்பனையில் ஏதேனும் குறைபாடுகள் ஏற்பட்டால், அறிவிக்கப்பட்ட வாட்ஸ்அப் எண்ணில் பொதுமக்கள் புகார் தெரிவிக்கலாம்.

இதையும் படிங்க : டாடா கன்சல்டன்சி சர்வீசஸ் இரண்டாவது காலாண்டு முடிவுகள் வெளியீடு.. நிதிநிலை எப்படி?