Asian Games 2026: 2026 ஆசிய விளையாட்டுப் போட்டியின் மகளிர் ஹாக்கி இறுதிப்போட்டியில் இந்திய அணி சீனாவை 1-0 என்ற கோல் கணக்கில் வீழ்த்தி தங்கப் பதக்கம் வென்றது.
Asian Games 2026: 2026 ஆசிய விளையாட்டுப் போட்டியின் மகளிர் ஹாக்கி இறுதிப்போட்டியில் இந்திய அணி சீனாவை 1-0 என்ற கோல் கணக்கில் வீழ்த்தி தங்கப் பதக்கம் வென்றது.
Published on: October 2, 2026 at 10:11 pm
Updated on: October 2, 2026 at 10:12 pm
டோக்கியோ, அக்.2, 2026: 2026 ஆசிய விளையாட்டுப் போட்டியின் மகளிர் ஹாக்கி இறுதிப்போட்டியில் இந்திய அணி சீனாவை 1-0 என்ற கோல் கணக்கில் வீழ்த்தி தங்கப் பதக்கம் வென்றது. ஜப்பானின் கிஃபு நகரில் நடைபெற்ற இந்தப் போட்டியில், 1982ஆம் ஆண்டுக்குப் பிறகு 44 ஆண்டுகள் கழித்து இந்திய மகளிர் ஹாக்கி அணி ஆசிய விளையாட்டில் மீண்டும் தங்கம் வென்றுள்ளது.
போட்டி தொடங்குவதற்கு முன்பு சுமார் ஒரு மணி நேரம் தாமதம் ஏற்பட்டது. ஆட்டம் தொடங்கியதும் சீனா ஆரம்பத்தில் தாக்குதல் ஆட்டத்தை வெளிப்படுத்திய நிலையில், இந்திய வீராங்கனைகள் சிறப்பாக தடுப்பாட்டம் மேற்கொண்டனர். 10வது நிமிடத்தில் சாக்ஷி ராணா வழங்கிய பாஸை பெற்ற லால்ரெம்சியாமி, ரிவர்ஸ்-ஸ்டிக் மூலம் அபாரமாக கோல் அடித்து இந்தியாவுக்கு 1-0 முன்னிலை பெற்றுத் தந்தார். இந்தப் போட்டி அவருக்கு 200வது சர்வதேச போட்டியாகவும் அமைந்தது.
இதன்பிறகு சீனா தொடர்ந்து தாக்குதல் நடத்தி இந்தியாவின் முன்னிலையை சமன் செய்ய முயன்றது. 18வது நிமிடத்தில் சீனாவுக்கு பெனால்டி கார்னர் கிடைத்தபோதும், இந்திய வீராங்கனைகள் அதை திறம்பட தடுத்தனர். 24வது நிமிடத்தில் சீனாவுக்கு பெனால்டி ஸ்ட்ரோக் வாய்ப்பு கிடைத்தது. ஆனால் இந்திய கோல் கீப்பர் சவிதா புனியா சிறப்பாக செயல்பட்டு அந்த வாய்ப்பை தடுத்து, அணியின் முன்னிலையை தக்க வைத்தார்.
இரண்டாவது மற்றும் மூன்றாவது கால்பகுதிகளில் சீனா கடுமையான அழுத்தத்தை ஏற்படுத்தியபோதும், இந்திய அணியின் தடுப்பாட்டம் தொடர்ந்து வலுவாக இருந்தது. சீன வீராங்கனைகளின் அடுத்தடுத்த தாக்குதல்களை இந்திய வீராங்கனைகள் ஒருங்கிணைந்து முறியடித்தனர். இறுதி வரை இந்தியாவின் முன்னிலை மாறாமல் இருந்ததால், 1-0 என்ற கோல் கணக்கில் இந்தியா வெற்றியை பதிவு செய்தது.
இந்த வெற்றியின் மூலம் ஆசிய விளையாட்டுப் போட்டியில் இந்திய மகளிர் ஹாக்கி அணி 44 ஆண்டுகளுக்குப் பிறகு மீண்டும் தங்கப் பதக்கத்தை கைப்பற்றியுள்ளது. 1998 மற்றும் 2018ஆம் ஆண்டுகளில் இறுதிப்போட்டிக்கு முன்னேறியிருந்த இந்திய அணி வெள்ளிப் பதக்கத்துடன் திரும்பிய நிலையில், தற்போது சீனாவை வீழ்த்தி சாம்பியன் பட்டத்தை வென்றுள்ளது. மேலும், இந்த தங்கப் பதக்கத்தின் மூலம் 2028 லாஸ் ஏஞ்சல்ஸ் ஒலிம்பிக் போட்டிக்கும் இந்திய மகளிர் ஹாக்கி அணி நேரடித் தகுதி பெற்றுள்ளது.
இதையும் படிங்க : 2027 கிரிக்கெட் உலகக் கோப்பை.. வெளியான அட்டவணை.. முழு விவரம்!
திராவிடன் டைம்ஸின் செய்திகளை உடனுக்குடன் தெரிந்துக்கொள்ள
திராவிடன் டைம்ஸ்.காம் (www.dravidantimes.com) ஆன்லைன் செய்தித்தளம் ஆகஸ்ட் 18 2024ல் தொடங்கப்பட்டது. தமிழ்நாடு, இந்தியா, சர்வதேசம், வணிகம், லைஃப்ஸ்டைல், சினிமா, ஆன்மிகம், தொழில்நுட்பம், கல்வி மற்றும் வேலைவாய்ப்பு என பலதரப்பட்ட செய்திகளை பக்கச்சார்பின்றி வெளியிடுகிறது.
© 2024 dravidantimes.com – developed and designed by Thirdvizion.com
