சாவர்க்கர் குறித்து கருத்து.. ராகுல் காந்தி மீதான கிரிமினல் அவதூறு வழக்கு ரத்து!

Rahul Gandhi in Savarkar Row : சாவர்க்கர் குறித்த ராகுல் காந்தியின் கருத்துகள் தொடர்பான அவதூறு வழக்கு புகாரை உச்ச நீதிமன்றம் ரத்து செய்தது.

ராகுல் காந்தி

BySaranya JK

Published on: August 14, 2026 at 1:24 pm

புதுடெல்லி, ஆக.14, 2026: சாவர்க்கர் குறித்த கருத்து விவகாரத்தில், காங்கிரஸ் எம்.பி. மற்றும் மக்களவை எதிர்க்கட்சித் தலைவரான ராகுல் காந்திக்கு உச்ச நீதிமன்றம் நிம்மதி அளித்துள்ளது. அவருக்கு எதிராகத் தொடரப்பட்ட குற்றவியல் அவதூறு வழக்கையும், மாஜிஸ்திரேட் பிறப்பித்த சம்மனையும் வெள்ளிக்கிழமை நீதிமன்றம் ரத்து செய்தது.

இந்த வழக்கில், உத்தரப் பிரதேச அரசு சட்டப்படி தேவைப்படும் அனுமதியை வழங்கவில்லை என்பதைக் கவனித்த நீதிபதிகள் தீபங்கர் தத்தா மற்றும் ஷீல் நாகு அடங்கிய அமர்வு, வழக்கு நடவடிக்கைகளை ரத்து செய்தது.

சாவர்க்கரை ஆங்கிலேயர்களின் கூட்டாளி என்று ராகுல் காந்தி குறிப்பிட்டதாகக் கூறி, இந்திய தண்டனைச் சட்டத்தின் பிரிவு 153-A மற்றும் 505 ஆகியவற்றின் கீழ் குற்றச்சாட்டுகள் சுமத்தப்பட்டிருந்தன. இதனை அடிப்படையாகக் கொண்டு, விசாரணை நீதிமன்றம் அவருக்கு சம்மன் அனுப்பியது.

அலகாபாத் உயர் நீதிமன்றம் இந்த நடவடிக்கைகளை நிறுத்த மறுத்ததைத் தொடர்ந்து, ராகுல் காந்தி உச்ச நீதிமன்றத்தை நாடினார். உத்தரப் பிரதேச அரசு தாக்கல் செய்த பிரமாணப் பத்திரத்தில், வழக்கு தொடர அனுமதி வழங்கப்பட்டதற்கான எந்தத் தகவலும் இல்லை என்பதைக் குறிப்பிட்டது.

இதனை அடிப்படையாகக் கொண்டு, “மாஜிஸ்திரேட் பிறப்பித்த உத்தரவுகள் ரத்து செய்யப்படுகின்றன” என்று உச்ச நீதிமன்றம் தெரிவித்ததாக ‘பார் அண்ட் பெஞ்ச்’ செய்தி வெளியிட்டுள்ளது. இதன் மூலம், ராகுல் காந்தி மீது தொடரப்பட்ட அவதூறு வழக்கு முடிவுக்கு வந்துள்ளது.

இதையும் படிங்க : ராகுல் காந்தி சொத்து குவிப்பு வழக்கு.. அமலாக்கத்துறை விசாரணை?