ஜஸ்பிரித் பும்ரா இல்லை.. இலங்கையில் இந்திய அணிக்கு பின்னடைவு?

Jasprit Bumrah: ஜஸ்பிரித் பும்ரா இல்லாத நிலையில், இலங்கை அணிக்கு எதிரான டெஸ்ட் தொடரில் இந்தியா ஆரம்பத்திலேயே சற்றே பின்னடைவைச் சந்திக்கும் என கிரிக்கெட் நிபுணர்கள் கூறுகின்றனர்.

ஜஸ்பிரித் பும்ரா

ByPunitha Rajesh

Published on: August 14, 2026 at 1:11 pm

சென்னை, ஆக.14, 2026: ஜஸ்பிரித் பும்ரா இல்லாத நிலையில், இலங்கை அணிக்கு எதிரான டெஸ்ட் தொடரில் இந்தியா ஆரம்பத்திலேயே சற்றே பின்னடைவைச் சந்திக்கும் என எதிர்பார்க்கப்படுகிறது. குறிப்பாக காலே மைதானம் வேகப்பந்து வீச்சுக்குச் சாதகமாக இல்லாத சூழலில், பும்ரா இல்லாதது அணிக்கு பெரும் பாதிப்பை ஏற்படுத்தும்.

பும்ரா இல்லாமலேயே இந்தியா சில முக்கியமான வெற்றிகளைப் பெற்றுள்ளது. 2020-21 பார்டர்-கவாஸ்கர் கோப்பையில், அவர் கடைசி டெஸ்ட்டில் விளையாடவில்லை; ஆனால் முகமது சிராஜ் தலைமையிலான அணி பிரிஸ்பேனில் வெற்றி பெற்று தொடரை கைப்பற்றியது. அதேபோல், கடந்த ஆண்டு இங்கிலாந்தில் நடைபெற்ற ஐந்தாவது டெஸ்ட்டில், சிராஜ் மற்றும் பிரசித் கிருஷ்ணா ஆகியோர் சிறப்பாக பந்து வீசி தொடரை சமன் செய்ய உதவினர்.

ஆனால் அந்த ஆடுகளங்கள் வேகப்பந்து வீச்சுக்குச் சாதகமாக இருந்தன. இலங்கையில் உள்ள ஆடுகளங்கள் பெரும்பாலும் சுழற்பந்து வீச்சாளர்களுக்கு ஆதரவாக இருக்கும். அத்தகைய சூழலில் பும்ரா போன்ற தரமான பந்து வீச்சாளர் இருந்தால், அணிக்கு மிகுந்த தன்னம்பிக்கை கிடைக்கும். அவர் தனது யார்க்கர் மற்றும் reverse swing மூலம், வெற்றி வாய்ப்பே இல்லை என்று தோன்றும் தருணங்களிலும் ஆட்டத்தை மாற்றும் திறன் கொண்டவர்.

காலே மைதானத்தின் சூழலைக் கருத்தில் கொண்டு, இந்தியா மூன்று சுழற்பந்து வீச்சாளர்கள் மற்றும் இரண்டு வேகப்பந்து வீச்சாளர்களுடன் களமிறங்க வாய்ப்புள்ளது. சிராஜ் மற்றும் பிரசித் கிருஷ்ணா வேகப்பந்து பொறுப்பை ஏற்க, குல்தீப் யாதவ், ரவீந்திர ஜடேஜா மற்றும் மானவ் சுதர் சுழற்பந்து துறையை வழிநடத்தலாம்.

மேலும், கடந்த மாதம் அதே மைதானத்தில் இலங்கை ‘ஏ’ அணிக்கு எதிராக 10 விக்கெட்டுகளை வீழ்த்திய குர்னூர் பிராரை அணியில் சேர்ப்பது குறித்தும் பரிசீலிக்கப்படலாம். பும்ரா இல்லாத சூழலில், இந்தியா தனது பந்துவீச்சு வியூகத்தை சுழற்பந்து வீரர்களின் திறமையை அடிப்படையாகக் கொண்டு அமைக்க வேண்டியிருக்கும்.

இதையும் படிங்க : விராத், ரோஹித் ஓய்வுக்கு பின் பயிற்சியாளராக மாறுவார்களா? அஸ்வின் பதில்