Virat Kohli: 38 வயதிலும் ஆட்டம், துடிப்பில் குறைவு இல்லை்; டெஸ்ட் கிரிக்கெட் ஓய்வுக்கு பின்னர் விராத் கோலியின் ஆட்டத்தில் ஏற்பட்ட மாற்றம் என்ன தெரியுமா?
Virat Kohli: 38 வயதிலும் ஆட்டம், துடிப்பில் குறைவு இல்லை்; டெஸ்ட் கிரிக்கெட் ஓய்வுக்கு பின்னர் விராத் கோலியின் ஆட்டத்தில் ஏற்பட்ட மாற்றம் என்ன தெரியுமா?
Published on: September 27, 2026 at 12:31 pm
புதுடெல்லி, செப்.27, 2026: 38 வயதிலும் விராட் கோலியின் ஆட்டத்திலும் உடல்மொழியிலும் வேகம் குறையவில்லை. டெஸ்ட் கிரிக்கெட்டில் இருந்து ஓய்வு பெற்ற பின்னர், ஆறு மாத இடைவெளிக்குப் பிறகு மீண்டும் ஒருநாள் போட்டிகளில் கவனம் செலுத்தி வரும் கோலி, முன்பைவிட அதிக சுதந்திரத்துடனும் ஆக்ரோஷத்துடனும் விளையாடி வருவதாக கூறப்படுகிறது. 2022ஆம் ஆண்டு தொடக்கத்தில் ஃபார்ம் குறைவு மற்றும் இந்திய அணியின் கேப்டன் பதவியில் இருந்து நீக்கப்பட்டதன் பின்னணியில் சவால்களை சந்தித்த அவர், அதன்பிறகு வலுவாக மீண்டு வந்தார். சத வறட்சியை முடிவுக்கு கொண்டு வந்ததுடன், 2022 டி20 உலகக் கோப்பையில் பாகிஸ்தானுக்கு எதிரான மறக்க முடியாத இன்னிங்ஸையும் விளையாடினார்.
அதன்பின்னர் 2023 ஒருநாள் உலகக் கோப்பையில் இந்திய அணிக்காக அதிக ரன்கள் குவித்த வீரராகவும் கோலி திகழ்ந்தார். ஒருநாள் கிரிக்கெட்டில் மீண்டும் முதலிடத்தை எட்டிய அவர், வெள்ளைப் பந்து கிரிக்கெட்டில் தனது ஆதிக்கத்தை தொடர்ந்து வெளிப்படுத்தினார். இந்நிலையில், டெஸ்ட் கிரிக்கெட்டில் இருந்து ஓய்வு பெற்ற பிறகு காணப்படும் கோலியின் அணுகுமுறை, அவரது முந்தைய காலகட்டத்தைவிட மேலும் தாக்குதல் நிறைந்ததாக இருப்பதாக கூறப்படுகிறது. கடந்த 10 இன்னிங்ஸ்களில் மட்டும் 760 ரன்கள் குவித்துள்ள கோலி, இதில் 3 சதங்கள் மற்றும் 5 அரைசதங்களையும் பதிவு செய்துள்ளார்.
தனது அணுகுமுறையில் ஏற்பட்ட மாற்றம் குறித்து விராட் கோலி, இனிமேல் அதிக சுதந்திரத்துடன் விளையாட வேண்டும் என்று தனக்குத்தானே உறுதியளித்ததாக தெரிவித்துள்ளார். மக்கள் தன்னிடம் வைத்திருக்கும் எதிர்பார்ப்புகளைப் பற்றி கவலைப்படாமல் விளையாட முடிவு செய்துள்ளதாகவும் அவர் கூறியுள்ளார். நீண்ட காலமாக தனது பங்கு, ஆட்டத்தை நிலைப்படுத்தி அணியை வெற்றிப் பாதையில் கொண்டு செல்வதாக இருந்தது என்றும், அந்தப் பொறுப்பு காரணமாக சில நேரங்களில் தன்னால் இயல்பான தாக்குதல் ஆட்டத்தை வெளிப்படுத்த முடியாமல் போனதாகவும் கோலி தெரிவித்துள்ளார்.
சவாலான சூழ்நிலை அல்லது கடினமான ஆடுகளத்தில் விளையாடும்போது, தன்னால் ஷாட்களை அடிக்க முடியும் என்றாலும், தனக்கு வழங்கப்பட்டுள்ள பொறுப்பை கருத்தில் கொண்டு ஆட்டத்தை கட்டுப்படுத்த வேண்டிய சூழல் இருந்ததாக கோலி விளக்கியுள்ளார். ஆனால் தற்போது ஆட்டத்தில் தன்னால் மாற்றத்தை ஏற்படுத்த முடியும் என உணரும் தருணங்களில், கூடுதலாக 30 முதல் 40 ரன்களை அணிக்காக பெற்றுத் தரும் வகையில் ஆபத்தான ஷாட்களையும் தேர்வு செய்ய விரும்புவதாக அவர் தெரிவித்துள்ளார். அதே நேரத்தில், ஒரு கட்டத்தில் ரிஸ்க் எடுக்காமல் இருப்பது கூட பின்னர் சரியான நேரத்தில் வேகத்தை அதிகரிப்பதற்கான திட்டத்தின் ஒரு பகுதியாக இருக்கலாம் என்றும் கூறியுள்ளார்.
இதனால், டெஸ்ட் ஓய்வுக்குப் பிறகு விராட் கோலியின் ஆட்டத்தில் ஏற்பட்டுள்ள மாற்றம் அவரது மனநிலையுடன் நேரடியாக தொடர்புடையதாக அவரது பேச்சில் இருந்து தெரிகிறது. நீண்ட காலமாக இந்திய அணியின் சேஸ்மாஸ்டராகவும், இன்னிங்ஸை நிலைநிறுத்தும் முக்கிய வீரராகவும் செயல்பட்ட கோலி, தற்போது தனது அனுபவத்துடன் சேர்த்து அதிக சுதந்திரமான அணுகுமுறையையும் பயன்படுத்தி வருகிறார். மேற்கிந்திய தீவுகளுக்கு எதிரான 3 போட்டிகள் கொண்ட ஒருநாள் தொடரை எதிர்நோக்கும் நிலையில், கோலியின் இந்த புதிய அணுகுமுறை மீதான எதிர்பார்ப்பு ரசிகர்கள் மத்தியில் அதிகரித்துள்ளது.
இதையும் படிங்க : மேற்கிந்திய தீவுகளுக்கு எதிரான போட்டி.. யஷஸ்வி ஜெய்ஸ்வாலுக்கு வாய்ப்பு உண்டா?
திராவிடன் டைம்ஸின் செய்திகளை உடனுக்குடன் தெரிந்துக்கொள்ள
திராவிடன் டைம்ஸ்.காம் (www.dravidantimes.com) ஆன்லைன் செய்தித்தளம் ஆகஸ்ட் 18 2024ல் தொடங்கப்பட்டது. தமிழ்நாடு, இந்தியா, சர்வதேசம், வணிகம், லைஃப்ஸ்டைல், சினிமா, ஆன்மிகம், தொழில்நுட்பம், கல்வி மற்றும் வேலைவாய்ப்பு என பலதரப்பட்ட செய்திகளை பக்கச்சார்பின்றி வெளியிடுகிறது.
© 2024 dravidantimes.com – developed and designed by Thirdvizion.com
