தமிழ்நாட்டில் மதுபானங்கள் விலை உயர்வு? பரபரப்பு தகவல்கள்!

Liquor Prices Hike: தமிழ்நாட்டில் மதுபானங்களின் விலை உயர இருப்பதாக தகவல்கள் வெளியாகி உள்ளன; இது மது பிரியர்களுக்கு அதிர்ச்சியை கொடுத்துள்ளது.

தமிழ்நாட்டில் மது விலை உயர வாய்ப்பு

ByPushpa Gopinath

Published on: August 8, 2026 at 6:10 pm

சென்னை ஆகஸ்ட் 8, 2026; தமிழகத்தில் மதுபான விலை உயரக்கூடும்; அரசு புதிய “பசுமை வரி” (Green Cess) அறிமுகப்படுத்தும் மசோதாவை தாக்கல் செய்துள்ளது. ஒவ்வொரு பாட்டிலுக்கும் அதிகபட்சம் ரூ.20 வரை கூடுதல் வரி விதிக்கப்படலாம்.

தமிழக வரி சட்ட திருத்த மசோதா, 2026, வணிக வரிகள் மற்றும் பதிவுத்துறை அமைச்சர் டி. லோகேஷ் தமிழ்செல்வன் தாக்கல் செய்துள்ளார். இந்த மசோதா, 2006 ஆம் ஆண்டு மதிப்புக் கூட்டு வரி சட்டத்தில் புதிய பிரிவு 3-A சேர்த்து, “சுற்றுச்சூழல் மற்றும் சமூக நல வரி” என்ற பெயரில் ஒவ்வொரு மதுபானக் கொள்கலனுக்கும் கூடுதல் வரி விதிக்க அனுமதிக்கிறது. பாட்டில், ஜார், டின், கேன், டெட்ரா பேக் என எந்த வடிவிலும் விற்பனை செய்யப்படும் மதுபானங்களுக்கு இந்த வரி பொருந்தும்.

அரசு தனது விளக்கக் குறிப்பில், மதுபானக் கொள்கலன்களால் ஏற்படும் கண்ணாடி மற்றும் பிளாஸ்டிக் கழிவுகள் சுற்றுச்சூழலுக்கு தீங்கு விளைவிப்பதாகவும், வனவிலங்குகளுக்கு ஆபத்தாக இருப்பதாகவும் குறிப்பிட்டுள்ளது. நீதிமன்ற அழுத்தத்தையும் கருத்தில் கொண்டு, இந்த பசுமை வரி, சுற்றுச்சூழல் சுத்திகரிப்பு முயற்சிகளுக்கும், மதுவிலக்கு மற்றும் மறுவாழ்வு திட்டங்களுக்கும் நிதி திரட்டும் நோக்கத்துடன் கொண்டு வரப்பட்டுள்ளது.

இந்த வரி மூலம் கிடைக்கும் வருவாய், ஆறு முக்கிய நோக்கங்களுக்கு ஒதுக்கப்படும்: கொள்கலன்களின் மறுசுழற்சி மற்றும் பாதுகாப்பான அகற்றம், மறுவாழ்வு மற்றும் மதுவிலக்கு திட்டங்கள், மதுவால் பாதிக்கப்பட்ட குடும்பங்களுக்கு வாழ்வாதார ஆதரவு, மதுவின் ஆரோக்கிய மற்றும் சுற்றுச்சூழல் பாதிப்புகள் குறித்த விழிப்புணர்வு, காடு மற்றும் சூழல் மீட்பு, மற்றும் பிற சமூக நல திட்டங்கள். முக்கியமாக, இந்த வரி வியாபாரிகளின் வரி வருவாயில் சேர்க்கப்படாது என மசோதா குறிப்பிடுகிறது.

இந்த சட்டம், அரசு அறிவிக்கும் தேதியிலிருந்து அமலுக்கு வரும். மதுபான விலை உயர்வு, பொதுமக்களின் செலவினத்தில் நேரடி தாக்கத்தை ஏற்படுத்தும். அதேசமயம், சுற்றுச்சூழல் பாதுகாப்பு மற்றும் சமூக நல திட்டங்களுக்கு நிதி திரட்டும் முயற்சியாக இது அரசியல் மற்றும் சமூக ரீதியாக முக்கியத்துவம் பெறுகிறது.

இதையும் படிங்க; தமிழக முதல்வர் விஜய் கூட்டிய எம்.பி.க்கள் ஆலோசனைக் கூட்டம்.. புறக்கணிக்கும் திமுக, அதிமுக!