மீண்டும் விசாரணை வளையத்தில் அன்பில் மகேஷ்.. 5 மணி நேரம் சோதனை!

Anbil Mahesh: தி.மு.க. முன்னாள் அமைச்சர் அன்பில் மகேஷ் உதவியாளர் வீடுகளில் 5 மணி நேரம் மத்திய குற்றப் பிரிவு போலீசார் சோதனை நடத்தினார்கள்.

அன்பில் மகேஷ்

BySaranya JK

Published on: September 30, 2026 at 12:25 pm

சென்னை, செப்.30, 2026: சென்னை மத்திய குற்றப்பிரிவு போலீசார், தனியார் பள்ளி நிர்வாகிகளிடம் அரசு அங்கீகாரம் மற்றும் பல்வேறு சட்டப்பூர்வ அனுமதிகளை பெற்றுத் தருவதாகக் கூறி பணம் வசூலித்ததாக எழுந்த புகார் தொடர்பான வழக்கில் விசாரணையை தீவிரப்படுத்தியுள்ளனர். இந்த வழக்கில் திமுக முன்னாள் பள்ளிக்கல்வித்துறை அமைச்சர் அன்பில் மகேஷ் பொய்யாமொழி மற்றும் அவருடன் தொடர்புடைய சிலரிடம் ஏற்கனவே விசாரணை நடத்தப்பட்டுள்ள நிலையில், அதன் தொடர்ச்சியாக செப்டம்பர் 29-ம் தேதி சென்னை மற்றும் புறநகர் பகுதிகளில் 5 இடங்களில் போலீசார் ஒரே நேரத்தில் சோதனை மேற்கொண்டனர்.

சாலிகிராமம், கோடம்பாக்கம், சூளைமேடு, பூந்தமல்லி மற்றும் நாவலூர் ஆகிய 5 இடங்களில் இந்த சோதனைகள் நடைபெற்றன. முன்னாள் அமைச்சர் அன்பில் மகேஷ் பொய்யாமொழியின் உதவியாளர்களுடன் தொடர்புடைய வீடுகள், வழக்கில் தொடர்புடையதாகக் கூறப்படும் பி.டி. அரசகுமாரின் வீடு மற்றும் தலைமறைவாக உள்ளதாக போலீசார் தெரிவிக்கும் முத்துக்குமாரின் உறவினர் தொடர்புடைய இடங்களிலும் சோதனை நடத்தப்பட்டது. வழக்கில் பணப் பரிமாற்றங்கள் மற்றும் பள்ளிகளுக்கான அங்கீகாரம் தொடர்பான நடவடிக்கைகளில் சம்பந்தப்பட்டவர்களின் பங்கு குறித்து போலீசார் விசாரணை நடத்தி வருகின்றனர்.

இந்த சோதனைகள் சுமார் 5 மணி நேரத்திற்கும் மேலாக நடைபெற்றதாக போலீஸ் வட்டாரங்கள் தெரிவித்துள்ளன. சோதனையின் முடிவில், வழக்குடன் தொடர்புடையதாகக் கருதப்படும் 44 ஆவணங்கள் மற்றும் ஒரு லேப்டாப் ஆகியவை கைப்பற்றப்பட்டதாக மத்திய குற்றப்பிரிவு போலீசார் தெரிவித்துள்ளனர். கைப்பற்றப்பட்ட ஆவணங்கள் மற்றும் லேப்டாப்பில் உள்ள தகவல்கள், வழக்கில் கூறப்பட்டுள்ள பணப் பரிமாற்றங்கள், பள்ளி அங்கீகார நடவடிக்கைகள் உள்ளிட்ட அம்சங்களுக்கு தொடர்புடையதா என்பது குறித்து போலீசார் ஆய்வு செய்து வருகின்றனர்.

இதற்கு முன்னதாக செப்டம்பர் 16-ம் தேதி, அன்பில் மகேஷ் பொய்யாமொழி மற்றும் அவரது உதவியாளர்களான வாலாடி கார்த்திக், அருண் பிரகாஷ், பிரகாஷ் ஆகியோருடன் தொடர்புடைய சென்னை மற்றும் திருச்சி பகுதிகளில் உள்ள வீடுகள் மற்றும் அலுவலகங்களிலும் மத்திய குற்றப்பிரிவு போலீசார் சோதனை மேற்கொண்டிருந்தனர். அப்போது ஆவணங்கள் மற்றும் மின்னணு சாதனங்கள் உள்ளிட்டவை கைப்பற்றப்பட்டதாக தெரிவிக்கப்பட்டது. மேலும், தலைமறைவாக உள்ளதாகக் கூறப்படும் முத்துக்குமாரின் உறவினர்களான சரவணன், ரமேஷ், கோகுலகிருஷ்ணன் ஆகியோருக்கு தொடர்புடைய கள்ளக்குறிச்சி வீடுகள் மற்றும் கடைகளிலும் முன்பு சோதனை நடைபெற்றதாக போலீசார் தெரிவித்துள்ளனர்.

தனியார் பள்ளி நிர்வாகங்களிடம் அரசு அங்கீகாரம் மற்றும் பிற அனுமதிகளை பெற்றுத் தருவதாகக் கூறி பணம் வசூலித்ததாக எழுந்த புகாரை மையமாகக் கொண்டு இந்த வழக்கில் விசாரணை தொடர்ந்து நடைபெற்று வருகிறது. ஏற்கனவே மேற்கொள்ளப்பட்ட சோதனைகளில் கைப்பற்றப்பட்ட பொருட்களுடன் தற்போது கைப்பற்றப்பட்டுள்ள 44 ஆவணங்கள் மற்றும் லேப்டாப்பில் உள்ள தகவல்களையும் போலீசார் ஒப்பிட்டு ஆய்வு செய்ய உள்ளனர். இந்த விசாரணையின் அடிப்படையில் வழக்கில் தொடர்புடையதாகக் கூறப்படும் மற்ற நபர்களிடமும் விசாரணை நடத்தப்படலாம் எனத் தெரிவிக்கப்பட்டுள்ளது.

இதையும் படிங்க : முதலமைச்சர் விஜய் பிரதமர் வேட்பாளரா? தொல். திருமாவளவன் பரபரப்பு பேட்டி!