தலைமை நீதிபதி பி.ஆர் கவாய் மீது காலணி வீச முயன்ற வழக்கறிஞர்.. உச்ச நீதிமன்றத்தில் பரபரப்பு.. பின்னணி என்ன?

Chief Justice of India BR Gavai in Supreme Court : உச்ச நீதிமன்ற தலைமை நீதிபதி பி.ஆர் கவாய் மீது உச்ச நீதிமன்றத்திற்குள் வழக்கறிஞர் ஒருவர் காலணியை அகற்றி வீச முயன்ற சம்பவம் பெரும் பரபரப்பை ஏற்படுத்தியுள்ளது.

உச்ச நீதிமன்ற தலைமை நீதிபதி பி.ஆர் கவாய்

BySaranya JK

Published on: October 6, 2025 at 9:41 pm

புதுடெல்லி, அக்.6, 2025: உச்ச நீதிமன்றத்தில் தன் மீது நடத்தப்பட்ட தாக்குதலுக்கு இந்திய தலைமை நீதிபதி பி.ஆர். கவாய் திங்கள்கிழமை பதிலளித்தார். அப்போது, இதுபோன்ற விஷயங்கள் தன்னைப் பாதிக்காது என்று கூறிய தலைமை நீதிபதி, விசாரணையைத் தொடருமாறு நீதிமன்றத்தைக் கேட்டுக் கொண்டார். தலைமை நீதிபதி தலைமையிலான அமர்வு வழக்கு விசாரணையின் போது இந்தச் சம்பவம் நடந்துள்ளது.

வழக்கறிஞர் ஒருவர் தலைமை நீதிபதி அமர்ந்திருந்த மேடையை நெருங்கி, தனது காலணியை கழற்றி, நீதிபதியை நோக்கி வீச முயன்றார். அப்போது, பாதுகாப்புப் பணியாளர்கள் உடனடியாக தலையிட்டு, சம்பந்தப்பட்ட வழக்கறிஞரை நீதிமன்ற வளாகத்திற்கு வெளியே அழைத்துச் சென்று தாக்குதலைத் தடுத்தனர். அப்போது சம்பந்தப்பட்ட வழக்கறிஞர், “சனாதனுக்கு ஏற்படும் எந்தவொரு அவமதிப்பையும் நாங்கள் பொறுத்துக்கொள்ள மாட்டோம்” என்றார்.

தலைமை நீதிபதி மீது காலணி வீச முயன்றவர் வழக்கறிஞர் ராகேஷ் கிஷோர் என கூறப்படுகிறது. இந்த சம்பவம் குறித்து உச்ச நீதிமன்றத்தின் பாதுகாப்பு அதிகாரிகள் விசாரணையைத் தொடங்கியுள்ளனர்.

கஜுராஹோ கோவில் விஷ்ணு சிலை சர்ச்சை காரணமா?

மத்தியப் பிரதேசத்தில் உள்ள யுனெஸ்கோ உலக பாரம்பரிய கஜுராஹோ கோவில் வளாகத்தின் ஒரு பகுதியான ஜவாரி கோவிலில் ஏழு அடி உயர விஷ்ணு சிலையை புனரமைத்து மீண்டும் நிறுவ உத்தரவிடக் கோரி மனு ஒன்று தாக்கல் செய்யப்பட்டது. இந்த மனுவை தலைமை நீதிபதி பி.ஆர். கவாய் நிராகரித்தார். இது, சமூக ஊடகங்களில் பெரும் சர்ச்சையைத் தூண்டிய நிலையில், இது நடந்து சில நாள்களுக்குப் பிறகு இந்தச் சம்பவம் நடந்துள்ளது குறிப்பிடத்தக்கது.

இதையும் படிங்க : பீகார் சட்டமன்ற தேர்தல் தேதி அறிவிப்பு.. நவ.14 ரிசல்ட்.. யாருக்கு அதிக எம்.எல்.ஏ பலம்? திடீர் கவனம் ஈர்த்த ஆம் ஆத்மி!