தோசை, சப்பாத்திக்கு தொட்டுக்கலாம்.. குழந்தைங்க மறுபேச்சு பேசாம சாப்பிடுவாங்க.. சுவையான பன்னீர் மிளகு மசாலா இப்படி பண்ணுங்க!

How to make Paneer pepper masala: குழந்தைகள் விரும்பி உண்ணக்கூடிய சுவையான பன்னீர் மிளகு மசாலா எப்படி செய்ய வேண்டும் என்று தெரியுமா?

பன்னீர் மிளகு மசாலா

ByDravidan Times Bureau

Published on: February 13, 2025 at 11:10 am

வெஜ் பிரியர்கள் விரும்பி உண்ணக்கூடிய காரசாரமான பன்னீர் மிளகு மசாலா எப்படி செய்யலாம் என்று பார்க்கலாம்.

தேவையான பொருட்கள்

பன்னீர் – 200 கிராம்
கான்பிளவர் மாவு -1 டேபிள்ஸ்பூன்
உப்பு – சிறிதளவு
சோம்பு -½ டீஸ்பூன்
பட்டை -1
கிராம்பு – 2
ஏலக்காய் -2
கருவேப்பிலை -1 கொத்து
வெங்காயம் -2
தக்காளி -1
மிளகுத்தூள் -1 டீஸ்பூன்
மல்லித்தூள் – 1½ டீஸ்பூன்
கரம் மசாலா- ½ டீஸ்பூன்
மஞ்சள் தூள் -¼ டீஸ்பூன்
உப்பு – தேவையான அளவு

அரைக்க வேண்டியவை

பச்சை மிளகாய் -2
இஞ்சி -1 துண்டு
பூண்டு -3 பல்லு

செய்முறை

ஒரு பாத்திரத்தில் பன்னீர், கான்பிளவர் மற்றும் உப்பு சேர்த்து கலந்து விட்டு சிறிது நேரம் ஊற விட வேண்டும். ஒரு கடாயில் எண்ணெய் சேர்த்து எண்ணெய் காய்ந்ததும் ஊற வைத்த பன்னீர் துண்டுகளை ஒன்றன்பின் ஒன்றாக சேர்த்து பொன்னிறமாக மாறும் வரை பொரித்து எடுக்க வேண்டும்.

பின்னர் ஒரு கடாயில் எண்ணெய் சேர்த்து எண்ணெய் காய்ந்ததும் அதில் சோம்பு, பட்டை, ஏலக்காய், சீரகம் மற்றும் ஒரு கொத்து கருவேப்பிலை சேர்த்து வறுக்கவும். பின்னர் இதனுடன் பொடியாக நறுக்கிய வெங்காயத்தை சேர்த்து வெங்காயம் நிறம் மாறி பொன்னிறமாக வரும் வரை வதக்கவும். வெங்காயம் வதங்கிய பின்னர் அதில் இஞ்சி, பூண்டு, பச்சை மிளகாய் இடித்து சேர்த்துக் கொள்ளவும்.

மிக்ஸி ஜாரில் அரைத்து விழுதாகவும் சேர்த்துக் கொள்ளலாம். இஞ்சி பூண்டு விழுதின் பச்சை வாடை நீங்கும் வரை வதக்கவும். இதனுடன் தக்காளி சேர்த்து வதக்கவும். பின்னர் மிளகுத்தூள், மல்லி தூள், கரம் மசாலா, மஞ்சள் தூள் சேர்த்து தொக்கு பதத்தில் வரும்வரை சிறிது தண்ணீர் மற்றும் தேவையான அளவு உப்பு சேர்த்து நன்கு கலந்து விட வேண்டும்.

மசாலா நன்கு வதங்கி தொக்கு பதத்தில் வந்த பின்னர் இதனுடன் பொறித்து வைத்த பன்னீர் துண்டுகளை சேர்த்து கலந்து விடவும். இப்போது காரசாரமான பன்னீர் மிளகு மசாலா தயார். இதை புலாவ், வெஜ் பிரியாணி, தோசை, சப்பாத்தியுடன் சேர்த்து சாப்பிட்டால் சுவையாக இருக்கும்.

இதையும் படிங்க மட்டன் சுவையில் காலிஃபிளவர் கோலா உருண்டை கிரேவி – இப்டி செஞ்சு பாருங்க!