கண்ணீரில் மூழ்கிய இசையுலகம்… எஸ். ஜானகி மறைவு.. குடியரசுத் தலைவர், பிரதமர் இரங்கல்!

S. Janaki Tribute : பழம்பெரும் பின்னணிப் பாடகி எஸ். ஜானகியின் மறைவுக்கு குடியரசுத் தலைவர் திரௌபதி முர்மு, பிரதமர் நரேந்திர மோடி உள்ளிட்ட தலைவர்கள் ஆழ்ந்த இரங்கல் தெரிவித்துள்ளனர்.

எஸ். ஜானகி

ByThilahavathy P

Published on: July 12, 2026 at 2:16 pm

மைசூர், ஜூலை 12, 2026: பழம்பெரும் பின்னணிப் பாடகி எஸ். ஜானகி மறைவால் நாடு முழுவதும் இசை ரசிகர்கள் மற்றும் திரையுலகினர் துயரத்தில் ஆழ்ந்துள்ளனர். அவரது உடலுக்கு மைசூரில் பொதுமக்கள் அஞ்சலி செலுத்தும் வகையில் ஏற்பாடு செய்யப்பட்டிருந்தது. ஆயிரக்கணக்கான ரசிகர்கள், இசைக் கலைஞர்கள் மற்றும் பொதுமக்கள் நேரில் வந்து மலர்தூவி கண்ணீருடன் இறுதி மரியாதை செலுத்தினர். மாநில மரியாதையுடன் அவரது இறுதிச்சடங்குகள் நடைபெற ஏற்பாடுகள் செய்யப்பட்டுள்ளன.

குடியரசுத் தலைவர் திரௌபதி முர்மு, எஸ். ஜானகியை இந்திய இசையின் ஒப்பற்ற அடையாளமாகப் போற்றியதுடன், ஆறு தசாப்தங்களுக்கு மேலாக ஆயிரக்கணக்கான பாடல்கள் மூலம் பல தலைமுறைகளை கவர்ந்தவர் என்று இரங்கல் தெரிவித்துள்ளார். அவரது குரல் என்றும் இசை உலகில் நிலைத்திருக்கும் என்றும் அவர் குறிப்பிட்டார்.

பிரதமர் நரேந்திர மோடி, எஸ். ஜானகியின் மறைவு இசை மற்றும் கலாச்சார உலகிற்கு ஈடுசெய்ய முடியாத இழப்பு என்று தெரிவித்துள்ளார். பல்வேறு மொழிகளில் அவர் பாடிய பாடல்கள் தலைமுறைகளைத் தாண்டி மக்களை கவர்ந்துள்ளன என்றும், அவரது இனிய குரல் காலம் கடந்தும் ரசிகர்களின் மனதில் ஒலித்துக்கொண்டே இருக்கும் என்றும் பிரதமர் தனது இரங்கல் செய்தியில் குறிப்பிட்டார்.

தமிழ், தெலுங்கு, மலையாளம், கன்னடம் உள்ளிட்ட பல மொழிகளில் ஆயிரக்கணக்கான பாடல்களைப் பாடி இந்திய இசை வரலாற்றில் தனித்துவமான இடத்தைப் பெற்ற எஸ். ஜானகியின் மறைவு திரையுலகிற்கும் இசை உலகிற்கும் மிகப்பெரிய இழப்பாகக் கருதப்படுகிறது. அரசியல் தலைவர்கள், திரைப்படப் பிரபலங்கள் மற்றும் இசைக் கலைஞர்கள் தொடர்ந்து இரங்கல் தெரிவித்து, அவரது இசைப் பாரம்பரியம் என்றென்றும் நிலைத்திருக்கும் என புகழஞ்சலி செலுத்தி வருகின்றனர்.

இதையும் படிங்க அரசு விழாக்களில் முதலில் மாநிலப் பாடல்.. மத்திய உள்துறை அமைச்சகத்தின் புதிய அறிவுறுத்தல்