உடைத்து ஊற்றிய முட்டை குழம்பு இப்படி செஞ்சு பாருங்க; சுவை அள்ளும்!

How to make muttai kulambu | சுவையான உடைத்து ஊற்றிய முட்டை குழம்பு இப்படி பண்ணுங்க.

உடைத்து ஊற்றிய முட்டை குழம்பு

ByDravidan Times Bureau

Published on: November 6, 2024 at 7:30 am

How to make muttai kulambu | சாதம், இட்லி, தோசை, சப்பாத்தி இடியாப்பம் போன்ற எல்லாவற்றோடும் சேர்த்து சாப்பிடக்கூடிய சுவையான உடைத்து ஊற்றிய முட்டை குழம்பு எப்படி செய்யலாம் என்று பார்க்கலாம்.

தேவையான பொருட்கள்

முட்டை -5
எண்ணெய் – 3 டேபிள் ஸ்பூன்
சோம்பு -1 டீஸ்பூன்
பட்டை-1
தக்காளி -2
மிளகாய்த்தூள் -1 டேபிள் ஸ்பூன் (காரத்திற்கு ஏற்ப)
மல்லித்தூள் -1 டேபிள் ஸ்பூன்
கரம் மசாலா-1/2 டேபிள் ஸ்பூன்
மஞ்சள் தூள் -1/4 டீஸ்பூன்
உப்பு- தேவையான அளவு
கஸ்தூரி மேத்தி -1 டேபிள் ஸ்பூன்

அரைக்க வேண்டியவை

பெரிய வெங்காயம்-1
இஞ்சி -2 துண்டு
பூண்டு -15 பல்லு
முந்திரி -4
கிராம்பு -4
நட்சத்திர சோம்பு -1
ஏலக்காய் -1
மிளகு -1/2 டீஸ்பூன்
பட்டை -1
சிறிய பிரிஞ்சி இலை -1
சோம்பு-1 டீஸ்பூன்
சீரகம் -1 டீஸ்பூன்
நெய் -1 டீஸ்பூன்

செய்முறை

ஒரு மிக்ஸி ஜாரில் நறுக்கிய பெரிய வெங்காயம், இஞ்சி, பூண்டு, முந்திரி, கிராம்பு, நட்சத்திர சோம்பு, ஏலக்காய், மிளகு, பட்டை, சிறிய பிரிஞ்சி இலை, சோம்பு மற்றும் சீரகம் சேர்த்து இதனுடன் தேவையான அளவு தண்ணீர் சேர்த்து நன்கு மை போன்று அரைத்து எடுக்க வேண்டும். பின்னர் ஒரு கடாயில் எண்ணெய் சேர்த்து எண்ணெய் காய்ந்ததும் அதனுடன் சோம்பு மற்றும் பட்டை சேர்த்து பொரிய விட வேண்டும்.

இதனுடன் அரைத்து வைத்த மசாலா விழுதினை சேர்த்து கிளறி விட வேண்டும். மசாலா பேஸ்ட் சேர்க்கும் போது அடுப்பு தீயை லோ ஃப்ளேமில் வைக்க வேண்டும். இதனுடன் 2 அரைத்த தக்காளியை சேர்த்து அடுப்பு தீயை மீடியம் ஃப்ளேமில் வைத்து வதக்க வேண்டும். தக்காளியின் பச்சை வாடை நீங்கிய பின்னர் இதனுடன் மிளகாய் தூள், மல்லித்தூள், கரம் மசாலா, மஞ்சள் தூள் மற்றும் தேவையான அளவு உப்பு சேர்த்து நன்கு வதக்க வேண்டும்.

பின்னர் இதனுடன் கஸ்தூரி மேத்தி மற்றும் தேவையான அளவு தண்ணீர் சேர்த்து கலந்து விட வேண்டும். இதை ஐந்து முதல் பத்து நிமிடம் மூடி போட்டு லோ ஃபிளேமில் வேக வைக்க வேண்டும். மசாலா வெந்து குழம்பில் எண்ணெய் பிரிந்து வந்த பின்னர் இதனுடன் முட்டைகளை சேர்க்க வேண்டும். முட்டையை உடைத்து ஒரு கிண்ணத்தில் ஊற்றி பின்னர் மெதுவாக குழம்பில் சேர்க்க வேண்டும்.

முதலில் வெள்ளை படலம் குழம்பில் விழும்படி செய்து பின்னர் மஞ்சள் கருவை நிதானமாக உடைக்காமல் சேர்க்க வேண்டும். முட்டை சேர்க்கும் பொழுது அடுப்பு தீயை லோ ஃபிளேமில் வைத்து முட்டை வெந்து வரும் வரை கிளறி விடாமல் மூடி போட்டு பத்து நிமிடம் வேக வைக்க வேண்டும். ஹை ஃபிளேமில் வைத்து வேக விட்டால் முட்டை உடைந்து குழம்புடன் கலந்து சுவை மாறிவிடும். பத்து நிமிடத்திற்கு பின்னர் முட்டை வெந்து குழம்பு தயார் நிலையில் இருக்கும். இதன் மீது ஒரு டீஸ்பூன் நெய் சேர்த்து பரிமாறவும். இப்போது சுவையான உடைத்து ஊற்றிய முட்டை கறி தயார்.

இதையும் படிங்க : அரை கிலோ மட்டனில் செட்டிநாட்டு ஆட்டுக்கறி!