GST Revenue: இந்தியாவின் அக்டோபர் மாத மொத்த ஜிஎஸ்டி வசூல் கடந்த ஆண்டைவிட 22.9 சதவீதம் உயர்ந்து ரூ.2,31,290 கோடியாக அதிகரித்துள்ளது. குறிப்பாக, இறக்குமதி வாயிலான வரி வருவாய் 42.2 சதவீதம் உயர்ந்துள்ளது. வரித் திருப்பிச் செலுத்துதலுக்குப் பிறகான நிகர வசூல் ரூ.2.03 லட்சம் கோடியாக உள்ளது.
Published on: November 2, 2026 at 3:03 pm
புதுடெல்லி, நவ. 2 2026: இந்தியாவின் சரக்கு மற்றும் சேவை வரி (ஜிஎஸ்டி) வசூல் கடந்த அக்டோபர் மாதத்தில் 23 சதவீதம் அதிகரித்து ரூ.2.31 லட்சம் கோடியைத் தாண்டியுள்ளது. கடந்த ஆண்டின் இதே மாதத்துடன் ஒப்பிடுகையில் இந்த வளர்ச்சி பதிவாகியுள்ளது. நாட்டின் உள்நாட்டுப் பொருளாதார நடவடிக்கைகள் வலுப்பெற்றதும், இறக்குமதி வாயிலான வரி வருவாய் கணிசமாக உயர்ந்ததும் இந்த அதிகரிப்புக்கு முக்கியக் காரணங்களாகக் கூறப்படுகிறது.
உள்நாட்டு விற்பனை மூலம் கிடைத்த மொத்த ஜிஎஸ்டி வருவாய் 15.8 சதவீதம் உயர்ந்து ரூ.1,59,044 கோடியாக உள்ளது. அதேநேரத்தில், இறக்குமதி மூலம் கிடைத்த வரி வருவாய் 42.2 சதவீதம் அதிகரித்து ரூ.72,246 கோடியாக உயர்ந்துள்ளது. உள்நாட்டு வருவாயைவிட இறக்குமதி வாயிலான வருவாய் வளர்ச்சி அதிகமாகப் பதிவாகியுள்ளது.
அக்டோபர் மாத மொத்த ஜிஎஸ்டி வசூலில் மத்திய சரக்கு மற்றும் சேவை வரியாக (CGST) ரூ.42,935 கோடியும், மாநில சரக்கு மற்றும் சேவை வரியாக (SGST) ரூ.51,340 கோடியும், ஒருங்கிணைந்த சரக்கு மற்றும் சேவை வரியாக (IGST) ரூ.1,37,015 கோடியும் வசூலாகியுள்ளன. மேலும், வரித் திருப்பிச் செலுத்துதல் ரூ.27,934 கோடியாக இருந்ததால், அதைக் கழித்த பிறகான நிகர ஜிஎஸ்டி வசூல் ரூ.2,03,356 கோடியாக உயர்ந்துள்ளது.
நடப்பு நிதியாண்டின் ஏப்ரல் முதல் அக்டோபர் வரையிலான முதல் ஏழு மாதங்களில் மொத்த ஜிஎஸ்டி வசூல் 13.2 சதவீதம் அதிகரித்து ரூ.14.77 லட்சம் கோடியாகப் பதிவாகியுள்ளது. அக்டோபர் மாத வசூல் கடந்த ஆண்டுடன் ஒப்பிடுகையில் குறிப்பிடத்தக்க வளர்ச்சியைப் பெற்றிருப்பது நாட்டின் வரி வருவாயில் முக்கிய முன்னேற்றமாகப் பார்க்கப்படுகிறது.
இதையும் படிங்க: சென்னையில் மீண்டும் உயர்ந்த தங்கம் விலை.. ஒரே நாளில் சவரனுக்கு ரூ.360 அதிகரிப்பு
திராவிடன் டைம்ஸின் செய்திகளை உடனுக்குடன் தெரிந்துக்கொள்ள
திராவிடன் டைம்ஸ்.காம் (www.dravidantimes.com) ஆன்லைன் செய்தித்தளம் ஆகஸ்ட் 18 2024ல் தொடங்கப்பட்டது. தமிழ்நாடு, இந்தியா, சர்வதேசம், வணிகம், லைஃப்ஸ்டைல், சினிமா, ஆன்மிகம், தொழில்நுட்பம், கல்வி மற்றும் வேலைவாய்ப்பு என பலதரப்பட்ட செய்திகளை பக்கச்சார்பின்றி வெளியிடுகிறது.
© 2024 dravidantimes.com – developed and designed by Thirdvizion.com
