அன்பில் மகேஷூக்கு ஜாமின் கிடைக்குமா? நவ.2இல் விசாரணை!

Anbil Mahesh: அன்பில் மகேஷ் ஜாமீன் மனுவும், போலீசார் தாக்கல் செய்துள்ள காவல் மனுவும், நவம்பர் 2-ம் தேதி விசாரணைக்கு வருகிறது.

அன்பில் மகேஷ்

BySaranya JK

Published on: October 30, 2026 at 2:04 pm

சென்னை, அக்.30, 2026: தனியார் பள்ளிகளுக்கு அங்கீகாரம் பெற்றுத் தருவதாகக் கூறி ரூ.100 கோடிக்கும் அதிகமாகப் பணம் வசூலித்ததாக எழுந்துள்ள வழக்கில் கைது செய்யப்பட்ட முன்னாள் பள்ளிக்கல்வித்துறை அமைச்சர் அன்பில் மகேஷ் பொய்யாமொழியின் ஜாமீன் மனு மீதான விசாரணையை நவம்பர் 2-ம் தேதிக்கு சென்னை சிறப்பு நீதிமன்றம் ஒத்திவைத்துள்ளது.

இந்த வழக்கில் கடந்த அக்டோபர் 26-ம் தேதி கைது செய்யப்பட்ட அன்பில் மகேஷ், நவம்பர் 6-ம் தேதி வரை நீதிமன்றக் காவலில் வைக்கப்பட்டுள்ளார். தற்போது புழல் சிறையில் இருக்கும் அவர், தனக்கு எதிராக லஞ்சம் பெற்றதற்கான நேரடி ஆதாரங்கள் இல்லை என்றும், காவல்துறை விசாரணைக்கு முழு ஒத்துழைப்பு அளித்துள்ளதாகவும் கூறி ஜாமீன் கோரியுள்ளார்.

இதற்கிடையே, அன்பில் மகேஷை ஐந்து நாட்கள் காவலில் எடுத்து விசாரிக்க அனுமதி கோரி சென்னை மத்திய குற்றப்பிரிவு போலீஸார் மனுத் தாக்கல் செய்துள்ளனர். தனியார் பள்ளிகளிடமிருந்து பணம் வசூலிக்கப்பட்ட விவகாரம், பணப் பரிவர்த்தனைகள் மற்றும் இந்த வழக்கில் தொடர்புடையதாகக் கூறப்படும் மற்ற நபர்களுடனான தொடர்புகள் குறித்து விசாரிக்க வேண்டியுள்ளதாக போலீஸார் தெரிவித்துள்ளனர்.

மேலும், தனது வீட்டில் நடைபெற்ற சோதனையின்போது பறிமுதல் செய்யப்பட்ட மின்னணு சாதனங்களைத் திரும்ப ஒப்படைக்கக் கோரியும் அன்பில் மகேஷ் தரப்பில் மனுத் தாக்கல் செய்யப்பட்டுள்ளது. இந்த மூன்று மனுக்கள் மீதான விசாரணையையும் நவம்பர் 2-ம் தேதிக்கு ஒத்திவைத்த நீதிமன்றம், ஜாமீன் மனுவுக்குப் பதிலளிக்க காவல்துறைக்கும், போலீஸ் காவல் கோரிய மனுவுக்குப் பதிலளிக்க அன்பில் மகேஷ் தரப்புக்கும் உத்தரவிட்டுள்ளது.

இதையும் படிங்க : கே.என். நேரு தொடர்புடைய 25 இடங்களில் ரெய்டு.. அடுத்து என்ன?