Maharashtra Council Elections: மகாராஷ்டிரா மேலவைத் தேர்தலில் நாக்பூரில் காங்கிரஸ் வெற்றி பெற்றுள்ளது. எதிர்க்கட்சிக் கூட்டணிக்கு 3 இடங்கள் கிடைத்துள்ளன.
Maharashtra Council Elections: மகாராஷ்டிரா மேலவைத் தேர்தலில் நாக்பூரில் காங்கிரஸ் வெற்றி பெற்றுள்ளது. எதிர்க்கட்சிக் கூட்டணிக்கு 3 இடங்கள் கிடைத்துள்ளன.
Published on: October 30, 2026 at 2:24 pm
மும்பை, அக்.30, 2026: மகாராஷ்டிரா மாநில சட்ட மேலவைத் தேர்தலில், நாக்பூர் பட்டதாரிகள் தொகுதியில் காங்கிரஸ் வேட்பாளர் அபிஜீத் வஞ்சாரி வெற்றி பெற்றுள்ளார். பாஜக வேட்பாளர் சுதாகர் கோஹலேவை 3,271 வாக்குகள் வித்தியாசத்தில் தோற்கடித்த அவர், அந்தத் தொகுதியைத் தக்கவைத்துக் கொண்டார். வஞ்சாரி 67,231 வாக்குகளையும், சுதாகர் கோஹலே 63,960 வாக்குகளையும் பெற்றனர். செவ்வாய்க்கிழமை காலை தொடங்கிய வாக்கு எண்ணிக்கை, 40 மணி நேரத்திற்கும் மேலாக நீடித்து வியாழக்கிழமை அதிகாலை நிறைவடைந்தது.
இந்த வெற்றியின் மூலம், காங்கிரஸ், சிவசேனா (உத்தவ் தாக்கரே பிரிவு), தேசியவாத காங்கிரஸ் (சரத் சந்திர பவார் பிரிவு) ஆகிய கட்சிகளை உள்ளடக்கிய மகா விகாஸ் அகாடி (MVA) கூட்டணி, தேர்தல் நடைபெற்ற 5 சட்ட மேலவைத் தொகுதிகளில் 3 இடங்களைக் கைப்பற்றியுள்ளது. ஆளும் மகாயுதி கூட்டணியில் பாஜகவும், ஏக்நாத் ஷிண்டே தலைமையிலான சிவசேனாவும் தலா ஓர் இடத்தில் வெற்றி பெற்றுள்ளன. இதன் மூலம் ஆளும் கூட்டணிக்கு 2 இடங்கள் கிடைத்துள்ளன.
மற்ற தொகுதிகளில், புனே பட்டதாரிகள் தொகுதியில் தேசியவாத காங்கிரஸ் (சரத் சந்திர பவார் பிரிவு) வேட்பாளர் ஹர்ஷதா தேஷ்முக்-ஜாதவ் வெற்றி பெற்றார். சத்ரபதி சம்பாஜிநகர் பட்டதாரிகள் தொகுதியிலும் அதே கட்சி வெற்றி பெற்றது. புனே ஆசிரியர்கள் தொகுதியில் பாஜக வேட்பாளர் கௌஸ்துப் கவாடேவும், அமராவதி ஆசிரியர்கள் தொகுதியில் சிவசேனா வேட்பாளர் கிரண் சர்னாயக்கும் வெற்றி பெற்றனர். இதனால், எதிர்க்கட்சிக் கூட்டணி பட்டதாரிகள் தொகுதிகளில் மூன்றில் வெற்றி பெற்று தனது பலத்தை வெளிப்படுத்தியுள்ளது.
குறிப்பாக, மகாராஷ்டிரா முதல்வர் தேவேந்திர ஃபட்னாவிஸ் மற்றும் மத்திய அமைச்சர் நிதின் கட்கரி ஆகியோரின் சொந்தப் பகுதியாகக் கருதப்படும் நாக்பூரில் பாஜக தோல்வியடைந்தது அரசியல் முக்கியத்துவம் பெற்றுள்ளது. இந்தத் தேர்தலில் காங்கிரஸ் வெற்றி பெறாது என பாஜக தலைவர்கள் முன்பு தெரிவித்திருந்த கருத்துகளைச் சுட்டிக்காட்டி, காங்கிரஸ் தலைவர்கள் விமர்சனம் செய்துள்ளனர். இதற்கிடையே, தேர்தல் முடிவுகள் குறித்து மகாயுதி கூட்டணிக்குள் கருத்து வேறுபாடுகள் எழுந்துள்ளதாகவும், கூட்டணிக் கட்சிகளின் ஒத்துழைப்பு குறித்து பாஜக தலைவர்கள் கேள்வி எழுப்பியுள்ளதாகவும் தகவல்கள் தெரிவிக்கின்றன.
இதையும் படிங்க : உத்தரப் பிரதேச எம்.எல்.சி. தேர்தல்.. வாரணாசி, லக்னோவில் பாஜகவுக்கு பின்னடைவு!
திராவிடன் டைம்ஸின் செய்திகளை உடனுக்குடன் தெரிந்துக்கொள்ள
திராவிடன் டைம்ஸ்.காம் (www.dravidantimes.com) ஆன்லைன் செய்தித்தளம் ஆகஸ்ட் 18 2024ல் தொடங்கப்பட்டது. தமிழ்நாடு, இந்தியா, சர்வதேசம், வணிகம், லைஃப்ஸ்டைல், சினிமா, ஆன்மிகம், தொழில்நுட்பம், கல்வி மற்றும் வேலைவாய்ப்பு என பலதரப்பட்ட செய்திகளை பக்கச்சார்பின்றி வெளியிடுகிறது.
© 2024 dravidantimes.com – developed and designed by Thirdvizion.com
