அன்பில் மகேஷ் ஜாமீன் மனு தாக்கல்.. 5 நாள் காவலில் விசாரிக்க போலீசார் கோரிக்கை!

Anbil Mahesh Bail Plea: அன்பில் மகேஷ் ஜாமீன் மனு தாக்கல் செய்துள்ள நிலையில், 5 நாள் காவலில் விசாரிக்க போலீசார் கோரிக்கை விடுத்துள்ளனர்.

அன்பில் மகேஷ்

ByPushpa Gopinath

Published on: October 29, 2026 at 11:49 am

சென்னை, அக்.29, 2026: தனியார் பள்ளிகளுக்கு நிரந்தர அங்கீகாரம் மற்றும் பல்வேறு அனுமதிகளைப் பெற்றுத் தருவதாகக் கூறி, ரூ.100 கோடிக்கும் மேல் முறைகேடாகப் பணம் வசூலிக்கப்பட்டதாக எழுந்த புகாரில், திமுக முன்னாள் பள்ளிக்கல்வித்துறை அமைச்சர் அன்பில் மகேஷ் பொய்யாமொழி கைது செய்யப்பட்டுள்ளார். அக்டோபர் 26ஆம் தேதி கைது செய்யப்பட்ட அவர், தற்போது புழல் சிறையில் அடைக்கப்பட்டுள்ளார்.

இந்த வழக்கில் ஜாமீன் கோரி அன்பில் மகேஷ், சென்னை ஊழல் தடுப்பு சிறப்பு நீதிமன்றத்தில் மனுத் தாக்கல் செய்துள்ளார். தனது மனுவில், அரசியல் பழிவாங்கும் நோக்கில் பொய்யான வழக்கு தொடரப்பட்டுள்ளதாகவும், தாம் லஞ்சம் பெற்றதற்கான ஆதாரங்கள் எதுவும் முன்வைக்கப்படவில்லை என்றும் அவர் குறிப்பிட்டுள்ளார்.

இதற்கிடையே, அன்பில் மகேஷை ஐந்து நாட்கள் காவலில் எடுத்து விசாரிக்க அனுமதி கோரி சென்னை மத்திய குற்றப்பிரிவு போலீசார் நீதிமன்றத்தில் மனுத் தாக்கல் செய்துள்ளனர். தலைமறைவாக உள்ள முன்னாள் எம்எல்ஏ முத்துக்குமாருடனான தொடர்பு, பணம் வசூலிக்கப்பட்ட விவரங்கள், இடைத்தரகர்களின் பங்கு மற்றும் பணப் பரிவர்த்தனைகள் குறித்து விசாரிக்க வேண்டியுள்ளதாக போலீசார் தெரிவித்துள்ளனர்.

மேலும், உடல்நலப் பிரச்சினை இருப்பதைக் குறிப்பிட்டு அன்பில் மகேஷ் ஜாமீன் கோரியுள்ளார். அவரது ஜாமீன் மனு மற்றும் போலீஸ் காவல் கோரும் மனு ஆகியவை அக்டோபர் 29ஆம் தேதி சென்னை ஊழல் தடுப்பு சிறப்பு நீதிமன்றத்தில் விசாரணைக்கு வர உள்ளன. இந்த வழக்கில் முன்வைக்கப்பட்டுள்ள குற்றச்சாட்டுகள் நீதிமன்ற விசாரணைக்கு உட்பட்டவை.

இதையும் படிங்க : வேலைக்கு லஞ்சம் பெற்ற வழக்கு.. KN நேரு சகோதரர்களின் மனுக்கள் தள்ளுபடி!