அனுபமா, ‘கிரேஸி கல்யாணம்’.. அக்.16 தியேட்டரில் வெளியீடு!

Anupama Parameswaran: நடிகை அனுபமா பரமேஸ்வரனின் கிரேஸி கல்யாணம் அக்டோபர் 16ஆம் தேதி தியேட்டர்களில் வெளியாகிறது.

அனுபமாவின் கிரேஸி கல்யாணம்

ByThilahavathy P

Published on: October 8, 2026 at 1:59 pm

சென்னை, அக்.8, 2026: நடிகை அனுபமா பரமேஸ்வரன் கதாநாயகியாக நடித்துள்ள தெலுங்கு திரைப்படமான ‘கிரேஸி கல்யாணம்’ படத்தின் வெளியீட்டுத் தேதி மாற்றப்பட்டுள்ளது. பத்ரப்பா கஜுலா இயக்கத்தில் உருவாகியுள்ள இப்படம் முதலில் அக்டோபர் 30-ம் தேதி வெளியாகும் என அறிவிக்கப்பட்டிருந்த நிலையில், தற்போது இரண்டு வாரங்களுக்கு முன்பாக அக்டோபர் 16-ம் தேதி உலகம் முழுவதும் திரையரங்குகளில் வெளியாகும் என படக்குழு தெரிவித்துள்ளது. அனுபமா தனது சமூக வலைதளப் பதிவிலும் புதிய வெளியீட்டுத் தேதியை உறுதிப்படுத்தியுள்ளார்.

படத்தின் டீசர் ஏற்கெனவே ரசிகர்களிடையே எதிர்பார்ப்பை ஏற்படுத்தியுள்ளது. இதில் அனுபமா கீர்த்தி என்ற கதாபாத்திரத்தில் நடித்துள்ளார். மகளுக்கு பிரம்மாண்டமாக திருமணம் நடத்த வேண்டும் என ஆசைப்படும் அவரது தந்தை கதாபாத்திரத்தில் டாக்டர் நரேஷ் நடிக்கிறார். மகளுக்குத் தகுந்த மணமகனைத் தேடும் தந்தையின் முயற்சிகள், குடும்பத்துக்குள் உருவாகும் கருத்து மோதல்கள் மற்றும் கீர்த்தியின் சொந்த முடிவுகள் ஆகியவற்றை மையமாகக் கொண்டு நகைச்சுவை கலந்த குடும்பக் கதையாக இப்படம் உருவாகியுள்ளதாக டீசர் காட்டுகிறது.

ஆரோ சினிமாஸ் தயாரிக்கும் இப்படத்தில் அனுபமா பரமேஸ்வரனுடன் அகில் ராஜ் உடேமரி, தருண் பாஸ்கர் மற்றும் வி.கே. நரேஷ் உள்ளிட்டோர் முக்கிய கதாபாத்திரங்களில் நடித்துள்ளனர். இயக்குநர் பத்ரப்பா கஜுலாவே கதை மற்றும் திரைக்கதையை உருவாக்கியுள்ள நிலையில், ஸ்ரீனிவாச ரவீந்திரா திரைக்கதைப் பணியில் இணைந்துள்ளார். ஷ்யாம் துபதி ஒளிப்பதிவையும், சுரேஷ் பொப்பிலி இசையையும் கவனித்துள்ளனர். பாடல்களுக்கு ரசிகர்களிடம் நல்ல வரவேற்பு கிடைத்துள்ள நிலையில், அக்டோபர் 16 வெளியீடு படத்தின் மீதான எதிர்பார்ப்பை மேலும் அதிகரித்துள்ளது.

இதையும் படிங்க : நடிகர் நானா படேகர் மரணம்.. ரசிகர்கள் அதிர்ச்சி!