முதல் சுற்றிலேயே வெளியேறிய பிரணாய்.. பின்லாந்து பேட்மிண்டனில் அதிர்ச்சி!

Prannoy Exits Arctic Open: பின்லாந்தின் வான்டாவில் நடைபெற்று வரும் ஆர்க்டிக் ஓபன் சூப்பர் 500 பேட்மிண்டன் தொடரில், இந்திய வீரர் எச்.எஸ். பிரணாய் முதல் சுற்றிலேயே வெளியேறினார்.

எச்.எஸ். பிரணாய்

ByPunitha Rajesh

Published on: October 8, 2026 at 1:47 pm

புதுடெல்லி, அக்.8, 2026: பின்லாந்து நாட்டின் வான்டாவில் நடைபெற்று வரும் ஆர்க்டிக் ஓபன் சூப்பர் 500 பேட்மிண்டன் தொடரில், இந்திய வீரர் எச்.எஸ். பிரணாய் முதல் சுற்றிலேயே வெளியேறினார். ஆசிய விளையாட்டுப் போட்டி அணியில் இடம்பெற்றிருந்த 34 வயதான பிரணாய், 4-ம் நிலை வீரரான டென்மார்க்கின் ஆண்டர்ஸ் ஆன்டன்சனிடம் 10-21, 9-21 என்ற நேர் செட் கணக்கில் தோல்வியடைந்தார். நடப்பு சீசனில் பிரணாயின் மோசமான பார்ம் தொடரும் நிலையில், இந்த தோல்வி அவருக்கு ஏமாற்றத்தை அளித்துள்ளது.

இதற்கிடையே, இந்திய ஆடவர் இரட்டையர் பிரிவில் கிருஷ்ண பிரசாத் கரகா – பிருத்வி கிருஷ்ணமூர்த்தி ராய் ஜோடி மிகப்பெரிய வெற்றியைப் பதிவு செய்து 2-வது சுற்றுக்கு முன்னேறியது. 5-ம் நிலை வீரர்களான சீனாவின் ஹீ ஜி டிங் – ரென் சியாங் யூ ஜோடியை எதிர்கொண்ட இந்திய இணை, முதல் செட்டை 10-21 என இழந்தாலும், அடுத்த இரு செட்களில் அபாரமாகத் திரும்பி 21-18, 22-20 என வெற்றி பெற்றது.

மே மாதத்தில் செயின்ட்-டெனிஸ் ரீயூனியன் ஓபன் மற்றும் வி.ஐ மெக்சிகன் இன்டர்நேஷனல் சேலஞ்ச் தொடர்களில் தொடர்ந்து பட்டம் வென்ற கிருஷ்ணா–பிருத்வி ஜோடிக்கு, இந்த வெற்றி அவர்களின் முக்கியமான வெற்றிகளில் ஒன்றாக அமைந்துள்ளது.

மகளிர் ஒற்றையர் பிரிவில் இந்தியாவின் தன்வி சர்மா 2-வது சுற்றுக்கு முன்னேறியுள்ளார். அவர் சீனத் தைபேயின் சியு பின் சியானை 21-15, 21-17 என்ற கணக்கில் வீழ்த்தினார். அதே நேரத்தில் இஷாராணி பருவா, தாய்லாந்தின் முதல் நிலை வீராங்கனை ரட்சனோக் இந்தனானிடம் 10-21, 15-21 என தோல்வியடைந்தார்.

தொடர்ந்து இந்தியாவின் தருண் மன்னேபள்ளி, ரௌனக் சவுகான் மற்றும் கிடாம்பி ஸ்ரீகாந்த் ஆகியோரும் தங்களது முதல் சுற்றுப் போட்டிகளில் களமிறங்கினர்.

இதையும் படிங்க : 10 ஆண்டுகள் அற்புதமான கேப்டன்ஷிப்.. ஹர்மன்ப்ரீத்தை பாராட்டிய ஸ்ருமிதி மந்தனா!