ஆசிய கிரிக்கெட்.. பாகிஸ்தானை 19 ரன்னில் வீழ்த்திய இந்தியா.. தங்கப் பதக்கம் வென்று அசத்தல்!

Asian Games Cricket Gold : ஜப்பானில் நடைபெற்று வரும் 20-வது ஆசிய விளையாட்டுப் போட்டிகளில் ஆடவர் கிரிக்கெட்டில் இந்திய அணி தொடர்ந்து 2-வது முறையாக தங்கப் பதக்கம் வென்றுள்ளது.

பாகிஸ்தானை வென்ற இந்தியா

ByPunitha Rajesh

Published on: October 4, 2026 at 1:56 pm

டோக்கியோ, அக்.4, 2026: ஜப்பானில் நடைபெற்று வரும் 20-வது ஆசிய விளையாட்டுப் போட்டிகளில் ஆடவர் கிரிக்கெட்டில் இந்திய அணி தொடர்ந்து 2-வது முறையாக தங்கப் பதக்கம் வென்றுள்ளது.

நிசின் நகரில் சனிக்கிழமை நடைபெற்ற இறுதிப்போட்டியில் பாகிஸ்தான் அணியை 19 ரன்கள் வித்தியாசத்தில் வீழ்த்தி இந்தியா தங்கத்தைத் தக்கவைத்தது. முதலில் பேட்டிங் செய்த இந்திய அணி 20 ஓவர்களில் 6 விக்கெட் இழப்புக்கு 211 ரன்கள் குவித்தது. தொடக்க வீரர் அபிஷேக் சர்மா 28 பந்துகளில் 61 ரன்களும், திலக் வர்மா ஆட்டமிழக்காமல் 51 ரன்களும் விளாசினர்.

211 ரன்கள் என்ற இலக்கை துரத்திய பாகிஸ்தான் அணிக்கு ஹசன் நவாஸ் அதிரடியாக விளையாடி 51 பந்துகளில் 96 ரன்கள் எடுத்தார். இதனால் ஆட்டத்தில் பரபரப்பு ஏற்பட்டாலும், இந்திய அணியின் சுழற்பந்து வீச்சாளர்கள் மற்றும் ஆல்ரவுண்டர்கள் பாகிஸ்தானின் ரன் வேகத்தை கட்டுப்படுத்தினர்.
வாஷிங்டன் சுந்தர் 4 ஓவர்களில் 29 ரன்களுக்கு 2 விக்கெட்டுகளையும், அக்சர் படேல் 29 ரன்களுக்கு 2 விக்கெட்டுகளையும் கைப்பற்றினர். இறுதியில் பாகிஸ்தான் 20 ஓவர்களில் 6 விக்கெட் இழப்புக்கு 192 ரன்கள் மட்டுமே எடுத்து தோல்வியடைந்தது.

இந்த வெற்றியின் மூலம் ஆசிய விளையாட்டுப் போட்டிகளில் கிரிக்கெட்டில் இந்திய அணி தொடர்ந்து 2-வது தங்கப் பதக்கத்தை கைப்பற்றியுள்ளது. இந்தியாவின் பேட்டிங்கில் அபிஷேக் சர்மாவின் அதிரடி தொடக்கமும், இறுதிக்கட்டத்தில் திலக் வர்மா மற்றும் சிவம் துபே இணைந்து எடுத்த 62 ரன்களும் முக்கிய பங்காற்றின. பாகிஸ்தானுக்கு எதிரான இறுதிப்போட்டி 19 ரன்கள் வித்தியாசத்தில் இந்தியாவின் வெற்றியுடன் நிறைவடைந்தது.

இதையும் படிங்க : குத்துச் சண்டையை விட்டு விலக நினைத்தேன்.. லோவ்லினா