Sai Kishore: இங்கிலாந்து கவுண்டி கிரிக்கெட்டில் தனது பந்துவீச்சால் கவனம் ஈர்த்துள்ளார் தமிழகத்தைச் சேர்ந்த இடதுகை சுழற்பந்து வீச்சாளர் ஆர். சாய் கிஷோர்.
Sai Kishore: இங்கிலாந்து கவுண்டி கிரிக்கெட்டில் தனது பந்துவீச்சால் கவனம் ஈர்த்துள்ளார் தமிழகத்தைச் சேர்ந்த இடதுகை சுழற்பந்து வீச்சாளர் ஆர். சாய் கிஷோர்.
Published on: September 24, 2026 at 6:54 pm
சென்னை, செப்.24, 2026: இங்கிலாந்து கவுண்டி கிரிக்கெட்டில் தனது பந்துவீச்சால் கவனம் ஈர்த்த தமிழகத்தைச் சேர்ந்த இடதுகை சுழற்பந்து வீச்சாளர் ஆர். சாய் கிஷோர், இந்திய அணியின் உள்நாட்டு மற்றும் ‘ஏ’ அணி தேர்வுகளில் இடம்பெறாமல் இருப்பது கிரிக்கெட் வட்டாரத்தில் கேள்வியை எழுப்பியுள்ளது. 2022-23 ரஞ்சி டிராபி சீசன் முதல் தற்போது வரை 126 விக்கெட்டுகளை கைப்பற்றியுள்ள சாய் கிஷோர், இங்கிலாந்தில் கவுண்டி போட்டிகளில் விளையாடியபோது பல முக்கிய பேட்ஸ்மேன்களுக்கு சவால் அளித்துள்ளார். குறிப்பாக, அவரது பந்துவீச்சு இங்கிலாந்து ரசிகர்கள் மற்றும் கிரிக்கெட் உலகின் கவனத்தை ஈர்த்தது.
கடந்த மாதம் இங்கிலாந்து கோடைகால கிரிக்கெட் தொடரின்போது, குளோஸ்செர்டெஸ்ஸைர் அணியின் சமூக வலைதளப் பக்கத்தில் வெளியிடப்பட்ட வீடியோ ஒன்று வேகமாக வைரலானது. வோர்செஸ்டர்ஸைர் அணியின் கேப்டன் பிரெட் டி’ஒலிவெய்ரா-வை சாய் கிஷோர் வீழ்த்திய அந்தப் பந்து, லெக் ஸ்டம்புக்கு வெளியே 6-வது ஸ்டம்ப் பகுதியை நோக்கி பிட்ச் ஆனது. எதிர்பாராத வகையில் திரும்பி ஆஃப் ஸ்டம்பை பதம் பார்த்த அந்தப் பந்து, ‘ஆண்டின் சிறந்த பந்து’ போட்டிக்கான வேட்பாளர் என வர்ணிக்கப்படும் அளவுக்கு கவனம் பெற்றது.
அதற்கடுத்த வாரமே இங்கிலாந்து அணியின் நட்சத்திர வீரர் பென் ஸ்டோக்ஸையும் சாய் கிஷோர் தனது சுழலில் சிக்க வைத்தார். பசுமையான ஆடுகளத்தில், அவுட்ஃபீல்டையும் ஆடுகளத்தையும் வேறுபடுத்திப் பார்ப்பதே கடினமாக இருந்த சூழலில், சாய் கிஷோரின் பந்துவீச்சை கணிக்க முடியாமல் பென் ஸ்டோக்ஸ் ஆட்டமிழந்தார். இதன்பின்னர் டெர்பிஷைர் அணிக்கு எதிரான ஒரு போட்டியில் வெறும் 8 ஓவர்கள் வீசிய சாய் கிஷோர், 6 ரன்களை மட்டுமே விட்டுக்கொடுத்து 5 விக்கெட்டுகளை வீழ்த்தினார். இங்கிலாந்து கவுண்டி கிரிக்கெட்டில் தொடர்ந்து தாக்கத்தை ஏற்படுத்திய அவரது இந்த செயல்பாடுகள், அவரது பந்துவீச்சுத் திறனுக்கு மேலும் கவனம் பெற்றுத் தந்தன.
இத்தகைய செயல்பாடுகளுக்கு மத்தியில், இந்தியாவின் துலீப் டிராபி, இந்தியா A மற்றும் ரெஸ்ட் ஆஃப் இந்தியா அணிகளுக்கான சமீபத்திய தேர்வுகளில் சாய் கிஷோர் இடம்பெறவில்லை. குறிப்பாக 2022-23 முதல் ரஞ்சி போட்டிகளில் தொடர்ந்து விக்கெட்டுகளை குவித்து வரும் நிலையில், உள்நாட்டு கிரிக்கெட்டில் அவரது பங்களிப்பும், இங்கிலாந்து கவுண்டி கிரிக்கெட்டில் வெளிப்படுத்திய திறனும் மீண்டும் கவனத்திற்கு வந்துள்ளன. இதனால், இந்திய அணியின் அடுத்தடுத்த தேர்வுகளில் சாய் கிஷோருக்கு வாய்ப்பு கிடைக்குமா என்ற எதிர்பார்ப்பு கிரிக்கெட் ரசிகர்கள் மத்தியில் உருவாகியுள்ளது.
இதையும் படிங்க : ஆக்சர் படேல் வீசிய ஓவரில் ‘வைட்’முடிவு திரும்பப் பெறப்பட்டது சரியா? ஐசிசி விதிகள் சொல்வது என்ன?
திராவிடன் டைம்ஸின் செய்திகளை உடனுக்குடன் தெரிந்துக்கொள்ள
திராவிடன் டைம்ஸ்.காம் (www.dravidantimes.com) ஆன்லைன் செய்தித்தளம் ஆகஸ்ட் 18 2024ல் தொடங்கப்பட்டது. தமிழ்நாடு, இந்தியா, சர்வதேசம், வணிகம், லைஃப்ஸ்டைல், சினிமா, ஆன்மிகம், தொழில்நுட்பம், கல்வி மற்றும் வேலைவாய்ப்பு என பலதரப்பட்ட செய்திகளை பக்கச்சார்பின்றி வெளியிடுகிறது.
© 2024 dravidantimes.com – developed and designed by Thirdvizion.com
