இத்தாலி பள்ளிகளில் புர்கா அணியத் தடை.. பிரதமர் ஜார்ஜியா

Georgia: இத்தாலியில் பள்ளிகளில் புர்கா மற்றும் நிகாப் அணிவதற்கு தடை விதிப்பது உள்ளிட்ட புதிய நடவடிக்கைகளை அறிமுகப்படுத்த திட்டமிட்டுள்ளதாக பிரதமர் ஜார்ஜியா மெலோனி தெரிவித்துள்ளார்.

இத்தாலி பிரதமர் ஜார்ஜியா மெலோனி

BySaranya JK

Published on: September 22, 2026 at 12:17 pm

ரோம், செப்.22, 2026: இத்தாலியில் பள்ளிகளில் புர்கா மற்றும் நிகாப் அணிவதற்கு தடை விதிப்பது உள்ளிட்ட புதிய நடவடிக்கைகளை அறிமுகப்படுத்த திட்டமிட்டுள்ளதாக பிரதமர் ஜார்ஜியா மெலோனி தெரிவித்துள்ளார். மேலும், ஒரு வகுப்பறையில் சேர்க்கப்படும் வெளிநாட்டு மாணவர்களின் எண்ணிக்கைக்கும் உச்சவரம்பு நிர்ணயிக்கப்படும் என அவர் கூறியுள்ளார். ரோமில் நடைபெற்ற தனது பிரதர்ஸ் ஆஃப் இத்தாலி கட்சியின் இளைஞர் அணியின் வருடாந்திர நிகழ்ச்சியில் பேசிய மெலோனி, இந்த நடவடிக்கைகள் அடங்கிய முன்மொழிவு விரைவில் அமைச்சரவையில் தாக்கல் செய்யப்படும் என தெரிவித்தார்.

மெலோனி முன்வைத்துள்ள திட்டத்தின்படி, பள்ளிகளில் முகத்தை முழுமையாக மறைக்கும் புர்கா மற்றும் முகத்தை மூடி கண்கள் மட்டும் வெளியில் தெரியும் வகையிலான நிகாப் ஆகியவற்றுக்கு தடை விதிக்கப்படும். அதேநேரத்தில், தலைமுடி மற்றும் கழுத்தை மட்டும் மறைத்து முகத்தை வெளிப்படையாக வைத்திருக்கும் ஹிஜாப் குறித்து மெலோனி தனது அறிவிப்பில் குறிப்பிடவில்லை. எனவே, இந்த முன்மொழிவு அனைத்து இஸ்லாமிய உடைகளுக்கும் பொதுவான தடையாக இல்லாமல், குறிப்பாக முழுமுக மறைப்புகளை குறிவைப்பதாகவே தற்போதைய தகவல்கள் தெரிவிக்கின்றன.

மேலும், வெளிநாட்டு மாணவர்கள் அதிகமாக இருக்கும் வகுப்புகளில் மொழி மற்றும் ஒருங்கிணைப்பு தொடர்பான சிக்கல்கள் ஏற்படுவதாக மெலோனி குறிப்பிட்டுள்ளார். இதனால், ஒவ்வொரு வகுப்பிலும் சேர்க்கக்கூடிய வெளிநாட்டு மாணவர்களின் அதிகபட்ச எண்ணிக்கையை சட்டப்பூர்வமாக நிர்ணயிக்க நடவடிக்கை எடுக்கப்படும் என அவர் கூறினார்.

அந்த உச்சவரம்பு எத்தனை மாணவர்கள் என்பது குறித்து இதுவரை அறிவிக்கப்படவில்லை. மேலும், இத்தாலிய கல்வி முறையில் ஒருங்கிணைவதில் கடுமையான சிரமங்களை எதிர்கொள்ளும் வெளிநாட்டு மாணவர்களின் பெற்றோருக்கு இத்தாலிய மொழி கற்றல் வகுப்புகள் கட்டாயமாக்கப்படலாம் என்றும் அவர் தெரிவித்துள்ளார். இத்தாலிய பள்ளிகளில் பயிலும் மாணவர்களில் இத்தாலிய குடியுரிமை இல்லாதவர்கள் சுமார் 11.6 சதவீதம் என தரவுகளை மேற்கோள் காட்டி ராய்டர்ஸ் தெரிவித்துள்ளது.

இந்த நடவடிக்கைகளை குடியேற்றம் மற்றும் ஒருங்கிணைப்பு தொடர்பான தனது அரசின் கொள்கைகளின் ஒரு பகுதியாக மெலோனி முன்வைத்துள்ளார். “பள்ளிக்குச் செல்லும்போது முகம் வெளிப்படையாக இருக்க வேண்டும்” என்றும், பாரம்பரியம் என்ற பெயரில் இளம் பெண்கள் தங்கள் முகத்தை மறைக்க வேண்டும் என்று யாரும் கட்டாயப்படுத்த முடியாது என்றும் அவர் தெரிவித்துள்ளார்.

எனினும், இந்த திட்டம் முதலில் இத்தாலி அமைச்சரவையின் ஒப்புதலைப் பெற வேண்டும்; அதன்பின்னர் சட்டமாக அமல்படுத்த நாடாளுமன்றத்தின் ஒப்புதல் தேவைப்படும். அரசின் ஒப்புதலுக்குப் பிறகு 60 நாட்களுக்குள் நாடாளுமன்ற ஒப்புதல் பெற வேண்டிய நடைமுறை இருப்பதாக தகவல்கள் தெரிவிக்கின்றன.

இதையும் படிங்க : இந்தியாவுக்கு 100% வரி விதிக்க டிரம்புக்கு அதிகாரம்.. ரஷ்ய எண்ணெய் வாங்கும் நாடுகளுக்கு புதிய கட்டுப்பாடு!