அமர்நாத் யாத்திரை இரு வழிகளில் நிறுத்தம்.. என்ன காரணம்?

Amarnath Yatra : மோசமான வானிலை மற்றும் மழை பொழிவு காரணமாக அமர்நாத் யாத்திரை இரு வழித்தடங்களில் நிறுத்தப்பட்டுள்ளது.

அமர்நாத் பனி லிங்கம்

ByPushpa Gopinath

Published on: August 12, 2026 at 2:28 pm

ஸ்ரீநகர், ஆக.12, 2026: ஜம்மு-காஷ்மீரில் சமீபத்திய மழைப்பொழிவு மற்றும் மோசமான வானிலை முன்னறிவிப்பு காரணமாக, வருடாந்திர அமர்நாத் யாத்திரை இன்று முதல் பஹல்காம் மற்றும் பல்தால் ஆகிய இரு வழிகளிலும் தற்காலிகமாக நிறுத்தப்பட்டுள்ளது. பாதைகளின் நிலைமையும், இந்திய வானிலை ஆய்வு மையம் வெளியிட்டுள்ள எச்சரிக்கையும் கருத்தில் கொண்டு இந்த முடிவு எடுக்கப்பட்டுள்ளது.

ராம்பன் மாவட்டம் மற்றும் காஷ்மீரின் சில பகுதிகளில் நிலவும் மழை காரணமாக, முன்னெச்சரிக்கை நடவடிக்கையாக ஜம்முவில் உள்ள பகவதி நகர் முகாமிலிருந்து புதிய யாத்திரைக் குழுவினர் புறப்பட அனுமதிக்கப்படவில்லை. அதேவேளையில், புனித குகையில் தரிசனம் முடித்த 1,202 யாத்ரீகர்களைக் கொண்ட 28-வது குழுவினர், 44 வாகனங்களுடன் ஜம்முவை நோக்கிச் செல்ல அனுமதிக்கப்பட்டனர். திரும்பும் யாத்ரீகர்களில் ஆண்கள், பெண்கள், சாதுக்கள், பெண் துறவிகள் மற்றும் ஒரு குழந்தையும் அடங்கினர்.

ஆக.9ஆம் தேதி மட்டும் 3,336 யாத்ரீகர்கள் புனித குகையில் தரிசனம் செய்தனர். இதில் ஆண்கள், பெண்கள், குழந்தைகள், சாதுக்கள், பெண் துறவிகள், திருநங்கை யாத்ரீகர்கள் மற்றும் பாதுகாப்புப் பணியாளர்கள் அடங்கினர். இதன் மூலம் இந்த ஆண்டு தரிசனம் செய்த மொத்த யாத்ரீகர்களின் எண்ணிக்கை 4,80,019-ஐ எட்டியுள்ளது.

57 நாட்கள் நடைபெறும் அமர்நாத் யாத்திரை ஜூலை 3 அன்று அனந்த்நாக் மாவட்டத்தில் உள்ள சந்தன்வாரி பாதை மற்றும் கந்தர்பால் மாவட்டத்தில் உள்ள பல்தால் பாதை ஆகிய இரண்டிலும் தொடங்கியது. ஆகஸ்ட் 28 அன்று பாரம்பரிய ‘சடி முபாரக்’ சடங்குடன் நிறைவடைய உள்ளது. ஆனால் சமீபத்திய மழையால் பாதைகள் பாதிக்கப்பட்டதால், எல்லைச் சாலைகள் அமைப்பு (BRO) அவற்றைச் சீரமைக்கும் பணிகளை மேற்கொண்டு வருகிறது.

அடுத்த சில நாட்களுக்கு மோசமான வானிலை நிலவும் என்று இந்திய வானிலை ஆய்வு மையம் கணித்துள்ளது. யாத்ரீகர்களின் பாதுகாப்பை உறுதிசெய்யும் வகையில், அதிகாரிகள் அவ்வப்போது வெளியிடும் அறிவுறுத்தல்களை பின்பற்றுமாறு யாத்ரீகர்களிடம் கேட்டுக்கொண்டுள்ளனர்.

இதையும் படிங்க : முதல்முறை ஹஜ் பயணம்.. தமிழக அரசின் நிதியுதவி ரூ.35 ஆயிரமாக உயர்வு!