தீபாவளிக்கு அச்சு முறுக்கு சுட போறீங்களா? ஒரு கப் தேங்காய் பால்: இப்படி ட்ரை பண்ணுங்க!

How to make achu murukku | தீபாவளிக்கு வீட்டிலே அச்சு முறுக்கு செஞ்சு அசத்துங்க.

மொறுமொறு அச்சு முறுக்கு

ByDravidan Times Bureau

Published on: October 26, 2024 at 9:53 am

How to make achu murukku | தீபாவளி என்றாலே பலகாரங்கள் தான். அதிலும் அச்சு முறுக்கு ரொம்பவே ஸ்பெஷலான ஒன்று. இந்த தீபாவளிக்கு வீட்டிலே அச்சு முறுக்கு எப்படி செய்யலாம் என்று பார்க்கலாம்.

தேவையான பொருட்கள்

பச்சரிசி -2 கப்
துருவிய தேங்காய்- 1கப்
முட்டை -2
உப்பு – 1/2 டீஸ்பூன்
சீனி -1/2 கப்
எள்ளு -1 டீஸ்பூன்

செய்முறை

ஒரு பாத்திரத்தில் பச்சரிசியை நன்கு கழுவி சுத்தம் செய்து எடுத்துக் கொள்ள வேண்டும். இந்த அரிசியில் தேவையான அளவு தண்ணீர் ஊற்றி இரண்டு முதல் மூன்று மணி நேரம் வரை ஊற வைக்க வேண்டும். அரிசி நன்கு கூறினால் தான் மாவு நன்கு அரைபட்டு வெண்ணெய் போன்று வரும். அரிசி நன்கு ஊற வெதுவெதுப்பான நீரை பயன்படுத்தலாம்.

ஒரு கப் தேங்காய் துருவலுடன் ஒரு கப் தண்ணீர் சேர்த்து மிக்ஸி ஜாரில் நன்கு அரைத்து தேங்காய் பால் தயார் செய்து எடுத்துக் கொள்ளவும். கெட்டியான முதல் தேங்காய் பாலை மட்டும் எடுத்துக் கொள்ளவும். இரண்டாவது தேங்காய் பாலை எடுத்து ஃப்ரிட்ஜில் வைத்து ஏதேனும் கிரேவி செய்யும் பொழுது பயன்படுத்திக் கொள்ளலாம்.மிக்ஸி ஜாரில் ஊறவைத்த அரிசி மற்றும் தேங்காய்ப்பால் சேர்த்து அரைத்து எடுத்துக் கொள்ள வேண்டும்.

இதனுடன் தண்ணீர் சேர்க்கக்கூடாது. இரண்டு கப் அரிசிக்கு ஒரு கப் தேங்காய் பால் சேர்த்து அரைக்க வேண்டும். அரிசி மூழ்கும் அளவிற்கு தேங்காய்ப்பால் இருக்க வேண்டும். ஒருமுறை அரிசியை அரைத்து எடுத்த பின்னர் இதனுடன் இரண்டு முட்டைகளை சேர்த்து மீண்டும் வெண்ணெய் பதத்தில் அரைத்து எடுத்துக் கொள்ள வேண்டும்.

இந்த மாவினை வேறொரு பாத்திரத்தில் மாற்றி அதனுடன் உப்பு, எள்ளு மற்றும் சுவைக்கு ஏற்ப சீனி சேர்த்து நன்கு கலந்து மாவினை தயார் செய்ய வேண்டும். பின்னர் ஒரு பாத்திரத்தில் தேவையான அளவு எண்ணெய் சேர்த்து எண்ணெய் சூடானதும் அச்சு முறுக்கு செய்வதற்கான அச்சியை எண்ணெயில் மூழ்கும்படி வைத்து அச்சு நன்கு சூடானதும் தயார் செய்து வைத்த மாவினில் பாதி அளவிற்கு மூழ்கும்படி செய்து எண்ணெயில் சேர்த்து பொரித்து எடுக்க வேண்டும்.

பொன்னிறமாக பொரிந்து வந்ததும் அச்சு முறுக்கை மாற்றி மறுபக்கமும் பொறிக்க வேண்டும். பின்னர் கவனமாக வேறொரு பாத்திரத்தில் சேகரிக்கவும். ஒவ்வொரு முறையும் அச்சு முறுக்கு சுடும் பொழுதும் மாவை கலந்து விட வேண்டும். இல்லையெனில் அச்சு முறுக்கு சரியாக வராது. மீதமுள்ள மாவையும் இதே போன்று பொரித்து எடுத்துக் கொள்ள வேண்டும். இப்போது சுவையான மொறு மொறு அச்சு முறுக்கு தயார்.

இதையும் படிங்க : நவராத்திரி ஸ்பெஷல் 2024; அதிரசம் இப்படி பண்ணுங்க: ருசி அள்ளும்!