ரெப்போ வட்டி விகிதத்தில் மாற்றம் இல்லை.. இந்திய ரிசர்வ் வங்கி

Reserve bank of india: இந்திய ரிசர்வ் வங்கி ரெப்போ வட்டி விகிதத்தை மூன்றாவது முறையாக மாற்றாமல் 5.25 சதவீதம் ஆக தொடர்கிறது.

இந்திய ரிசர்வ் வங்கி கவர்னர் சஞ்சய் மல்ஹோத்ரா

BySaranya JK

Published on: August 5, 2026 at 11:37 am

மும்பை, ஆக.5, 2026: இந்திய ரிசர்வ் வங்கி தனது பணவியல் கொள்கை அறிவிப்பில் ரெப்போ வட்டி விகிதத்தை தொடர்ந்து மூன்றாவது முறையாக 5.25% என்ற அளவில் மாற்றமின்றி வைத்திருப்பதாக அறிவித்துள்ளது. நடுநிலையான நிலைப்பாட்டைத் தொடரும் இந்த முடிவை ஆளுநர் சஞ்சய் மல்ஹோத்ரா அறிவித்தார். இது குறித்து அவர், “பணவியல் கொள்கைக் குழு ஒருமனதாக வட்டி விகிதத்தையும் நிலைப்பாட்டையும் அப்படியே தக்கவைக்க முடிவு செய்துள்ளது.

நடப்பு நிதியாண்டின் ஏப்ரல்-ஜூன் காலாண்டில் இந்தியப் பொருளாதாரம் எதிர்பார்த்ததை விடச் சிறப்பாகச் செயல்பட்டுள்ளது. உலகளாவிய நிச்சயமற்ற சூழலுக்கு மத்தியிலும் உள்நாட்டு பொருளாதாரம் உறுதியான தன்மையை வெளிப்படுத்தி வருகிறது.

எனினும், மேற்கு ஆசியாவில் நிலவும் மோதல்கள், எரிசக்தி நெருக்கடி மற்றும் விநியோகச் சங்கிலித் தடைகள் உலகப் பொருளாதாரத்திற்குச் சவாலாக இருக்கின்றன. அதேசமயம், வலுவான உள்நாட்டு தேவை காரணமாக இந்தியப் பொருளாதார வளர்ச்சி தொடர்ந்து ஆதரவைப் பெற்று வருகிறது” என்றார்.

இதற்கிடையில், பணவீக்கம் தொடர்பாக, நுகர்வோர் விலைக் குறியீட்டு (CPI) அடிப்படையிலான சில்லறைப் பணவீக்கம் ஜூன் மாதத்தில் 4.38% ஆக உயர்ந்திருந்தாலும், வட்டி விகிதத்தில் மாற்றம் செய்யாமல் ரிசர்வ் வங்கி முடிவு செய்துள்ளது. FY27 நிதியாண்டிற்கான நாட்டின் ஜி.டி.பி வளர்ச்சி கணிப்பு 6.6% இலிருந்து 6.7% ஆக உயர்த்தப்பட்டுள்ளதுடன், சில்லறை பணவீக்கக் கணிப்பு 5.1% இலிருந்து 5% ஆகக் குறைக்கப்பட்டுள்ளது.

இந்த நிலையில், இந்தியாவின் வளர்ச்சி குறித்து ஆளுநர் மல்ஹோத்ரா, “உலகின் மிக வேகமாக வளரும் பெரிய பொருளாதார நாடாக இந்தியா தொடர்ந்து திகழ்கிறது” என்று குறிப்பிட்டார்.
மேற்கு ஆசியப் பதற்றங்கள், உலகளாவிய சந்தை ஏற்ற இறக்கங்கள் மற்றும் எல்-நினோ போன்ற காரணிகள் வளர்ச்சிக்கு அபாயங்களை ஏற்படுத்தினாலும், இந்தியப் பொருளாதாரம் உறுதியுடன் முன்னேறி வருவதாக அவர் தெரிவித்தார்.

இதையும் படிங்க : இந்தியாவில் யூரோப்கிரிப் பிரீமியம் மோட்டார்சைக்கிள் டயர்கள் அறிமுகம்.. சென்னை வந்த எம்.எஸ் தோனி!