1998 கோவை குண்டுவெடிப்பு வழக்கு கைதிகளுக்கு பரோல்.. விஜய் அரசுக்கு பாஜக கடும் எதிர்ப்பு!

Coimbatore Blasts : கடந்த 1998-ஆம் ஆண்டு பிப்ரவரி 14-ஆம் தேதி, பாஜக மூத்த தலைவர் எல்.கே. அத்வானி பங்கேற்கவிருந்த தேர்தல் பிரசாரக் கூட்டத்திற்கு முன்பாக கோவையின் பல்வேறு இடங்களில் தொடர் குண்டுவெடிப்புகள் நிகழ்ந்தன.

கோவை தொடர் குண்டுவெடிப்பு கைதிகளுக்கு பரோல்

ByPushpa Gopinath

Published on: October 21, 2026 at 10:13 am

கோவை, அக்.21, 2026: 1998-ஆம் ஆண்டு கோவை தொடர் குண்டுவெடிப்பு வழக்கில் ஆயுள் தண்டனை அனுபவித்து வரும் 5 பேருக்கு 60 நாட்கள் பரோல் வழங்கப்பட்டுள்ளதால் தமிழக அரசியல் வட்டாரத்தில் சர்ச்சை எழுந்துள்ளது. தமிழக வெற்றிக் கழகத் தலைவர் விஜய் தலைமையிலான அரசு எடுத்துள்ள இந்த முடிவுக்கு பாஜக கடும் எதிர்ப்புத் தெரிவித்துள்ளது.

கோவை மத்திய சிறையில் அடைக்கப்பட்டுள்ள முகமது அன்சாரி, முகமது அலி, மொனப்பா என்ற முகமது ஹசன், முகமது அஜம், நவாப் கான் ஆகிய 5 பேருக்கும் தனிப்பட்ட காரணங்கள் மற்றும் உடல்நலப் பிரச்சினைகளைக் கருத்தில் கொண்டு பரோல் வழங்கப்பட்டுள்ளது. அக்டோபர் 17-ஆம் தேதி முதல் 60 நாட்களுக்கு இந்தப் பரோல் நடைமுறைக்கு வந்துள்ளதாக சிறைத்துறை வட்டாரங்கள் தெரிவித்துள்ளன.

இதற்கு எதிர்ப்புத் தெரிவித்துள்ள தமிழக பாஜக தலைமைச் செய்தித் தொடர்பாளர் நாராயணன் திருப்பதி, பயங்கரவாதத் தாக்குதலின் தீவிரத்தைத் தனிப்பட்ட காரணங்கள் புறந்தள்ள முடியாது என்று தெரிவித்துள்ளார். மேலும், பரோல் உத்தரவை உடனடியாக ரத்து செய்ய வேண்டும் என்றும் அவர் வலியுறுத்தியுள்ளார். தவெக அரசு அரசியல் ஆதாயத்திற்காகக் குற்றவாளிகளிடம் மென்மையான அணுகுமுறையைக் கடைப்பிடிப்பதாகவும் பாஜக குற்றம்சாட்டியுள்ளது.

கடந்த 1998-ஆம் ஆண்டு பிப்ரவரி 14-ஆம் தேதி, பாஜக மூத்த தலைவர் எல்.கே. அத்வானி பங்கேற்கவிருந்த தேர்தல் பிரசாரக் கூட்டத்திற்கு முன்பாக கோவையின் பல்வேறு இடங்களில் தொடர் குண்டுவெடிப்புகள் நிகழ்ந்தன. இந்தத் தாக்குதல்களில் 58 பேர் உயிரிழந்ததுடன், 200-க்கும் மேற்பட்டோர் காயமடைந்தனர். இந்நிலையில், கைதிகளுக்குப் பரோல் வழங்கப்பட்ட விவகாரம் தமிழக அரசுக்கும் பாஜகவுக்கும் இடையே அரசியல் மோதலை ஏற்படுத்தியுள்ளது.

இதையும் படிங்க : குற்றங்கள், போதைப்பொருள் புழக்கம் அதிகரிப்பு.. தமிழக அரசைச் சாடிய மு.க.ஸ்டாலின்!