ஆசிய பாரா விளையாட்டுப் போட்டியில் இரு தங்கம்.. புதிய சாதனை படைத்த நிஷாத் குமார்!

India’s Gold Rush : ஆசிய பாரா விளையாட்டுப் போட்டியில் தடகளத்தில் இந்தியா 5 தங்கப் பதக்கம் வென்ற நிலையில், பதக்க எண்ணிக்கை 35 ஆக உயர்ந்துள்ளது.

நிஷாத் குமார்

ByPunitha Rajesh

Published on: October 21, 2026 at 10:31 am

நகோயா, அக்.21, 2026: ஜப்பானின் நகோயா நகரில் நடைபெற்று வரும் ஆசிய பாரா விளையாட்டுப் போட்டியில், இந்திய வீரர்கள் தடகளப் போட்டிகளில் சிறப்பான ஆட்டத்தை வெளிப்படுத்தி ஒரே நாளில் 5 தங்கப் பதக்கங்களை வென்றனர். போட்டியின் இரண்டாவது நாள் முடிவில் இந்தியாவின் மொத்தப் பதக்க எண்ணிக்கை 35 ஆக உயர்ந்துள்ளது. இதில் 9 தங்கம், 11 வெள்ளி, 15 வெண்கலப் பதக்கங்கள் அடங்கும்.

உயரம் தாண்டுதல் போட்டியில் இந்திய வீரர் நிஷாத் குமார் 2.04 மீட்டர் உயரம் தாண்டி தங்கப் பதக்கம் வென்றதுடன், போட்டியின் சாதனையையும் முறியடித்தார். முன்னதாக, நீளம் தாண்டுதலிலும் தங்கம் வென்றிருந்த அவர், ஒரே ஆசிய பாரா விளையாட்டுப் போட்டியில் இரண்டு பிரிவுகளில் தங்கம் வென்ற மூன்றாவது இந்தியர் என்ற பெருமையைப் பெற்றார்.

மகளிர் 400 மீட்டர் டி20 பிரிவில் இந்திய வீராங்கனை தீப்தி ஜீவன்ஜி 56.36 விநாடிகளில் இலக்கைக் கடந்து தங்கப் பதக்கம் வென்றார். இதன் மூலம் தொடர்ந்து இரண்டாவது முறையாக இப்பிரிவில் ஆசிய அளவில் முதலிடத்தைப் பிடித்ததுடன், போட்டி சாதனையையும் படைத்தார்.

இதுதவிர, பார்வைக் குறைபாடு கொண்ட வீராங்கனை சிம்ரன் மகளிர் 200 மீட்டர் டி12 பிரிவிலும், சக்கர நாற்காலியில் போட்டியிடும் பிரணவ் சூர்மா மற்றும் தேவேந்தர் குமார் ஆகியோர் வட்டு எறிதல் பிரிவுகளிலும் தங்கப் பதக்கங்களை வென்றனர். இந்தியாவின் மொத்தப் பதக்கங்களில் தடகளப் போட்டிகள் மட்டும் 20 பதக்கங்களைப் பெற்றுத் தந்துள்ளன. பதக்கப் பட்டியலில் இந்தியா தற்போது ஆறாவது இடத்தில் உள்ளது.

இதையும் படிங்க : ரூ.2 ஆயிரம் கோடி மதிப்பு.. தோனி இல்லாமலும் நீடிக்குமா சிஎஸ்கே புகழ்?