கரீனா கபூர் கேரியரில் மிகக்குறைந்த ஓபனிங் வசூல்? தாய்ரா சறுக்கியது எப்படி?

Daayra box office day 1 : நடிகை கரீனா கபூர் கேரியரில் தாய்ரா திரைப்படம் முதல் நாளில் மிகவும் குறைவான வசூல் செய்த படமாக பதிவாகியுள்ளது.

தாய்ரா படத்தில் கரீனா கபூர்

ByThilahavathy P

Published on: September 19, 2026 at 11:20 am

மும்பை, செப்.19, 2026: மேக்னா குல்சார் இயக்கத்தில் கரீனா கபூர் மற்றும் மலையாள நடிகர் பிருத்விராஜ் சுகுமாரன் முதன்முறையாக இணைந்து நடித்துள்ள தாய்ரா (Daayra) திரைப்படம் திரையரங்குகளில் வெளியாகியுள்ளது. குற்றவியல் பின்னணியிலான இந்தப் படத்தில், சர்ச்சைக்குரிய என்கவுன்டர் கொலையைத் தொடர்ந்து தார்மீக சிக்கலில் சிக்கிக்கொள்ளும் இரண்டு காவல்துறை அதிகாரிகளின் கதையை மையமாகக் கொண்டு திரைக்கதை அமைக்கப்பட்டுள்ளது.

கொடூரமான பாலியல் வன்கொடுமை மற்றும் கொலை வழக்குடன் தொடர்புடைய சம்பவம் படத்தின் முக்கிய பின்னணியாக இடம்பெற்றுள்ளது. இப்படம் வெளியான முதல் நாளில் இந்தியாவில் வசூல் எதிர்பார்த்த அளவில் இல்லை என ஆரம்பகட்ட பாக்ஸ் ஆபிஸ் தகவல்கள் தெரிவிக்கின்றன. சாக்னிலிக் (Sacnilk) வெளியிட்டுள்ள மதிப்பீட்டின்படி, தாய்ரா திரைப்படம் முதல் நாளில் இந்தியாவில் சுமார் ₹85 லட்சம் நிகர வசூல் செய்துள்ளது.

வெள்ளிக்கிழமை படத்துக்கு இந்திய அளவில் சுமார் 11.1 சதவீத திரையரங்கு இருக்கை நிரம்பிய விகிதம் பதிவாகியுள்ளதாகவும் தெரிவிக்கப்பட்டுள்ளது. முதல் நாளில் நாடு முழுவதும் 2,332 காட்சிகளில் படம் திரையிடப்பட்டதாகவும் தகவல் வெளியாகியுள்ளது. தாய்ரா திரைப்படம் ஒரே நேரத்தில் இந்தி மற்றும் மலையாளம் ஆகிய இரு மொழிகளில் வெளியாகியுள்ளது.

இதில் இந்தி பதிப்புதான் பெரும்பாலான வசூலை ஈட்டியுள்ளது. முதல் நாள் ₹85 லட்சம் இந்திய நிகர வசூலில், இந்தி பதிப்பு சுமார் ₹82 லட்சம் வசூலித்துள்ளதாகவும், மலையாளப் பதிப்பு சுமார் ₹3 லட்சம் மட்டுமே வசூலித்துள்ளதாகவும் சாக்னிலிக் மதிப்பீட்டில் குறிப்பிடப்பட்டுள்ளது. இதன் மூலம் ஆரம்ப நாளில் படத்துக்கு இந்தி பதிப்பிலேயே அதிக வரவேற்பு கிடைத்துள்ளது தெரியவந்துள்ளது.

இதனிடையே, தாய்ரா திரைப்படத்தின் முதல் நாள் வசூல் கரீனா கபூரின் திரையுலகப் பயணத்தில் குறைந்த தொடக்க வசூலாக பதிவாகியுள்ளது. இதற்கு முன்பு அவரது சமீபத்திய படங்களில் குறைந்த முதல் நாள் வசூலைப் பெற்ற திரைப்படமாக ஹன்சல் மேத்தா இயக்கிய தி பங்கிங்காம் மர்டர்ஸ் (The Buckingham Murders) இருந்தது. 2024ஆம் ஆண்டு வெளியான அந்த திரைப்படம் இந்தியாவில் முதல் நாளில் சுமார் ₹1.15 கோடி நிகர வசூல் செய்ததாக கூறப்படுகிறது. தற்போது, தாய்ரா அதைவிடக் குறைவான வசூலைப் பதிவு செய்துள்ளது.

கரீனா கபூர் மற்றும் பிருத்விராஜ் சுகுமாரன் ஆகியோரின் முதல் கூட்டணி என்பதாலும், மேக்னா குல்சார் இயக்கம் என்பதாலும் தாய்ரா திரைப்படம் வெளியீட்டுக்கு முன்பே கவனம் பெற்றிருந்தது. இருப்பினும், முதல் நாள் வசூல் ஆரம்பகட்டத்தில் மந்தமாகவே அமைந்துள்ளது. அடுத்தடுத்த நாட்களில் பார்வையாளர்களின் வரவேற்பு, விமர்சனங்கள் மற்றும் வார இறுதி வசூல் ஆகியவை படத்தின் மொத்த பாக்ஸ் ஆபிஸ் நிலவரத்தை தீர்மானிக்கும் முக்கிய காரணிகளாக இருக்கும் என எதிர்பார்க்கப்படுகிறது.

இதையும் படிங்க : ₹2 கோடியில் தயாரிக்கப்பட்டு ₹307 கோடி வசூலித்த திரைப்படம்..