இன்று முதல் 4 நாட்களுக்கு வங்கிகள் இயங்காது.. என்ன காரணம்?

BANK STRIKE: வங்கி ஊழியர்களின் ஒருநாள் வேலைநிறுத்தம், சனி மற்றும் ஞாயிறு விடுமுறை, திங்கள்கிழமை விநாயகர் சதுர்த்தி விடுமுறை என இன்று முதல் தொடர்ந்து 4 நாட்கள் வங்கி சேவைகள் பாதிக்கப்பட உள்ளன.

வங்கி ஊழியர்களின் ஒருநாள் வேலைநிறுத்தம்

BySaranya JK

Published on: September 11, 2026 at 6:05 pm

சென்னை, செப்.11, 2026: வங்கி ஊழியர் சங்கங்கள் அறிவித்துள்ள ஒருநாள் அடையாள வேலைநிறுத்தப் போராட்டம் காரணமாக, நாடு முழுவதும் வங்கி சேவைகள் தொடர்ந்து 4 நாட்களுக்கு பாதிக்கப்படும் நிலை ஏற்பட்டுள்ளது. வாரந்தோறும் சனி, ஞாயிற்றுக்கிழமைகளில் விடுமுறை வழங்க வேண்டும், சாதாரண ஊழியர்களிடம் காட்டப்படும் பாரபட்சமான நடவடிக்கைகளை கைவிட வேண்டும் உள்ளிட்ட பல்வேறு கோரிக்கைகளை வலியுறுத்தி இந்த வேலைநிறுத்தம் நடைபெறுகிறது.

இன்று (செப்டம்பர் 11) வெள்ளிக்கிழமை வங்கி ஊழியர்களின் வேலைநிறுத்தம் நடைபெறுகிறது. இதனைத் தொடர்ந்து சனி, ஞாயிறு விடுமுறை நாட்களாக உள்ளன. மேலும், திங்கள்கிழமை விநாயகர் சதுர்த்தி விடுமுறை என்பதால், வெள்ளிக்கிழமை முதல் திங்கள்கிழமை வரை தொடர்ந்து 4 நாட்கள் வங்கிகளின் நேரடி சேவைகள் பாதிக்கப்படுகின்றன.

இந்த தொடர் வேலைநிறுத்தம் மற்றும் விடுமுறை காரணமாக வங்கிகளின் கிளைகளில் நேரடி சேவைகள் பாதிக்கப்பட வாய்ப்புள்ளது. அதேநேரத்தில், இணையவழி வங்கி சேவைகள் மற்றும் ஏ.டி.எம். உள்ளிட்ட சில சேவைகள் வழக்கம்போல் செயல்படக்கூடும்.

இந்த போராட்டம் இரண்டு கட்டங்களாக நடைபெற உள்ளது. இன்று ஒரு நாள் அடையாள வேலைநிறுத்தம் நடைபெறும் நிலையில், செப்டம்பர் 28 முதல் 30-ம் தேதி வரை 3 நாட்கள் தொடர் வேலைநிறுத்தம் நடைபெற உள்ளது. ஊக்கத்தொகை வழங்குவதில் உயர் அதிகாரிகளுக்கும் சாதாரண ஊழியர்களுக்கும் இடையே காட்டப்படும் பாரபட்சத்தை கண்டித்தும், நீண்ட காலமாக நிலுவையில் உள்ள கோரிக்கைகளை நிறைவேற்ற வலியுறுத்தியும் இந்தப் போராட்டங்கள் அறிவிக்கப்பட்டுள்ளதாக அனைத்திந்திய வங்கி அதிகாரிகள் சங்கத்தின் தமிழக பொதுச்செயலர் ரோஷன் கார்க்கி தெரிவித்துள்ளார்.

இதையும் படிங்க: சென்னையில் தங்கம் விலையில் அதிரடி வீழ்ச்சி!