நடைப்பயிற்சிக்குப் பின் திடீர் நெஞ்சு வலி.. கே. பாக்யராஜ் மரணம் நிகழ்ந்தது எப்படி?

K Bhagyaraj Passes away : நடிகர் பாக்யராஜ் குஷ்பு மகள் திருமணத்தில் மிக சந்தோஷமாக கலந்து கொண்டார்; இன்று காலை நடைபயிற்சி மேற்கொண்டுவிட்டு வீடு திரும்பியபோது கொஞ்சம் நெஞ்சு வலி என சொல்லியிருக்கிறார் என்ற தகவல் வெளியாகியுள்ளது.

கே. பாக்யராஜ்

ByThilahavathy P

Published on: June 27, 2026 at 12:48 pm

சென்னை ஜூன் 27 2026;தமிழ் திரைப்பட உலகின் பிரபல இயக்குநரும் நடிகருமான கே. பாக்யராஜ் இன்று (சனிக்கிழமை) காலை திடீரென ஏற்பட்ட நெஞ்சுவலி காரணமாக உயிரிழந்தார். நடிகை சுஹாசினி தெரிவித்ததாவது, குஷ்பு மகள் திருமணத்தில் மிகுந்த மகிழ்ச்சியுடன் கலந்து கொண்ட பாக்யராஜ், இன்று காலை நடைபயிற்சி மேற்கொண்டுவிட்டு வீடு திரும்பியபோது நெஞ்சுவலி ஏற்பட்டதாக கூறியுள்ளார். உடனடியாக மருத்துவமனைக்கு கொண்டு செல்லப்பட்ட நிலையில் அவர் உயிரிழந்தார்.

பாக்யராஜ், தமிழ் சினிமாவில் திரைக்கதை மன்னன் என அழைக்கப்பட்டவர். 1970களில் பாரதிராஜா இயக்குநரிடம் உதவி இயக்குநராக பணியாற்றிய அவர், பின்னர் ‘சுவர் இல்லாத சித்திரங்கள்’ மூலம் இயக்குநராக அறிமுகமானார். தொடர்ந்து ‘அந்த 7 நாட்கள்’, ‘முந்தானை முடிச்சு’, ‘அவசர போலீஸ் 100’, ‘எங்க சின்ன ராசா’ போன்ற பல வெற்றிப் படங்களை இயக்கி நடித்தார். குடும்பக் கதைகள், நகைச்சுவை, உணர்ச்சி பூர்வமான காட்சிகள் ஆகியவற்றின் மூலம் ரசிகர்களிடையே தனித்துவமான இடத்தைப் பெற்றார்.

திரைப்படங்களில் மட்டுமல்லாமல், பாக்யராஜ் திரைக்கதை எழுத்தாளர், தயாரிப்பாளர், தொலைக்காட்சி நிகழ்ச்சி தொகுப்பாளர் என பல்வேறு துறைகளில் பணியாற்றினார். அவரது படங்களில் நடுத்தரக் குடும்ப வாழ்க்கை, சமூக பிரச்சினைகள், நகைச்சுவை வசனங்கள் ஆகியவை பெரும் வரவேற்பைப் பெற்றன. ஹிந்தி உள்ளிட்ட பிற மொழிகளிலும் படங்களை இயக்கிய அவர், தென்னிந்திய சினிமாவின் முக்கியமான படைப்பாளிகளில் ஒருவராக திகழ்ந்தார்.

அவரது திடீர் மறைவால் திரையுலகில் பெரும் துயர அலை பரவியுள்ளது. பல்வேறு அரசியல் தலைவர்கள், திரைப்பட பிரபலங்கள், ரசிகர்கள் அனைவரும் இரங்கல் தெரிவித்து வருகின்றனர்.

இதையும் படிங்க திரைக்கதை மன்னன் கே. பாக்யராஜ் மரணம்.. திரை உலகினர் அதிர்ச்சி!