தென் ஆப்பிரிக்காவை உலுக்கிய துப்பாக்கிச் சூடு.. 12 பேர் பலி.. பரபரப்பு தகவல்கள்!

Johannesburg shooting: தென் ஆப்பிரிக்காவை உலுக்கிய துப்பாக்கிச் சூட்டில் 12 பேர் பரிதாபமாக உயிரிழந்தனர்.

தென் ஆப்பிரிக்காவில் துப்பாக்கிச் சூடு

BySaranya JK

Published on: June 10, 2026 at 1:53 pm

ஜோகன்னஸ்பர்க், ஜூன் 10, 2026: தென்னாப்பிரிக்காவின் ஜோகன்னஸ்பர்க்கில் உள்ள கிளீவ்லேண்ட் பகுதியில் செவ்வாய்க்கிழமை மாலை நடந்த துப்பாக்கிச் சூட்டில் குறைந்தது 12 பேர் உயிரிழந்துள்ளனர். ஜம்பர்ஸ் எனப்படும் முறைசாரா குடியிருப்புப் பகுதியில் நடந்த இந்த தாக்குதலில் ஒன்பது பேர் காயமடைந்ததாக காவல்துறை புதன்கிழமை தெரிவித்துள்ளது. சம்பவம் பெரும் பரபரப்பை ஏற்படுத்திய நிலையில், தாக்குதலுக்கான காரணம் இன்னும் தெரியவில்லை.

காவல்துறை வெளியிட்ட அறிக்கையில், 10க்கும் மேற்பட்ட சந்தேக நபர்களைத் தேடும் வேட்டையைத் தொடங்கியுள்ளதாக கூறப்பட்டுள்ளது. ராய்ட்டர்ஸ் வெளியிட்ட தகவலின்படி, சந்தேக நபர்கள் வெள்ளை நிற டொயோட்டா குவாண்டம் வாகனத்தில் வந்து, இரண்டு நுழைவாயில்கள் வழியாக குடியிருப்புப் பகுதிக்குள் நுழைந்து, பல இடங்களில் துப்பாக்கிச் சூடு நடத்திவிட்டு அதே வாகனத்தில் தப்பிச் சென்றுள்ளனர்.

ஸ்கை நியூஸ் தகவலின்படி, சம்பவ இடத்தில் துப்பாக்கிச் சூட்டுக் காயங்களுடன் பலரை அதிகாரிகள் கண்டதாக தெரிவித்துள்ளனர். இந்நிலையில், அங்கு எட்டு ஆண்கள் மற்றும் மூன்று பெண்கள் உயிரிழந்ததாக அறிவிக்கப்பட்ட நிலையில், மற்றொரு ஆண் பின்னர் மருத்துவமனையில் சிகிச்சை பலனின்றி உயிரிழந்தார். இதனால் உயிரிழந்தோர் எண்ணிக்கை 12 ஆக உயர்ந்தது.

தென்னாப்பிரிக்காவில் உள்ள முறைசாரா குடியிருப்புகள் பெரும்பாலும் குடிசைகள் அல்லது திட்டமிடப்படாத கட்டமைப்புகளைக் கொண்ட பகுதிகளாகும். இத்தகைய இடங்களில் குற்றச்செயல்கள் அதிகம் நடைபெறுவதால், காவல்துறை விசாரணையை தீவிரமாக மேற்கொண்டு வருகிறது. தாக்குதலுக்கான நோக்கம் குறித்து இன்னும் தெளிவான தகவல் வெளியாகவில்லை.

இதையும் படிங்க : கென்யா: பள்ளி மாணவிகள் விடுதியில் தீ விபத்து..16 பேர் பலி